IGIHE

U Rwanda rwasigiye Mali ubuyobozi bw’Akanama ku rujya n’uruza rw’abantu

0 7-11-2019 - saa 19:06, Akayezu Jean de Dieu

Mali yatorewe kuyobora Akanama ku rujya n’uruza rw’abantu (Specialized Technical Committee on Migration, Refugees and Internally Displaced Persons) isimbuye u Rwanda rwari rumaze imyaka ibiri kuri izi nshingano.

Minisitiri muri Perezidansi, Uwizeye Judith uri i Addis Abeba ku cyicaro cy’Umuryango wa Afurika Yunze Ubumwe niwe witabiriye umuhango w’ihererekanyabubasha ryasigiye Mali inshingano zo kuyobora ako kanama mu myaka ibiri.

Umuhango wo guhererakanya ububasha hagati y’ibihugu byombi wabereye muri Ethiopia ahateraniye Inama Nyafurika yiga ku rujya n’uruza kuri uyu mugabane iri kuba ku nshuro ya gatatu.

Mu myaka ibiri u Rwanda ruyoboye aka kanama nibwo hasinywe amasezerano y’urujya n’uruza rw’abantu, ishyirwa mu bikorwa ryayo n’ibijyanye na Pasiporo Nyafurika.

Ku ruhande rw’u Rwanda kandi rwafunguye amarembo ku buryo Umunyafurika urujemo abonera viza aho yinjiriye ndetse abaturage ba bimwe mu bihugu byo mu Karere binjira mu Rwanda basabwe kwerekana indangamuntu gusa.

Ku wa 10 Nzeri 2019 nibwo Guverinoma y’u Rwanda , Umuryango wa Afurika Yunze Ubumwe (AU) na UNHCR, bashyize umukono ku masezerano y’ubufatanye, yatumye rutangira kwakira impunzi zizaturuka muri Libya, aho zahageze zishakisha amayira yazambutsa Méditerranée zikagera i Burayi.

Kugeza uyu munsi mu Rwanda hamaze kugera ibyiciro bibiri by’izi mpunzi aho icya mbere cyaje mu mpera za Nzeri kirimo abagera kuri 66 mu gihe icya kabiri cyaje ku wa 11 Ukwakira 2019 kigizwe n’impunzi 123. Bose bacumbikiwe mu nkambi y’agateganyo ya Gashora iherereye mu Karere ka Bugesera.

Umuryango w’Abibumbye uvuga ko abimukira bagera ku 5000 baheze muri Libya, 70 ku ijana bakaba ari impunzi n’abavuye mu byabo kubera ibibazo binyuranye. Ababashije kurenga Libya, ni kenshi humvikana inkuru z’uko barigise mu Nyanja ya Méditerranée bagerageza kwambuka bajya i Burayi.

Minisitiri Uwizeye ashyikiriza ububasha mugenzi we wa Mali, Amadou Koïta
Umuhango w'ihererekanyabuhasha hagati y'u Rwanda na Mali wabereye i Addis Abeba ku cyicaro cya AU
Abahagarariye ibihugu byabo bitabiriye inama ku rujya n'uruza muri Afurika
Minisitiri muri Perezidansi, Uwizeye Judith ageza ijambo ku bitabiriye inama
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza