IGIHE

Ruhango: Imiryango icyenda itishoboye yahawe inzu yubakiwe n’abagore

0 17-10-2020 - saa 07:00, Prudence Kwizera

Imiryango icyenda itishoboye yo mu Karere ka Ruhango yashyikirijwe inzu yubakiwe n’abagore bo mu rugaga rushamikiye ku muryango FPR Inkotanyi muri ako karere, mu rwego rwo kuyifasha kubona aho kuba kuko yari imaze imyaka myinshi isembera.

Ni umuhigo abo bagore bahize muri Kanama 2020 ko mu gufasha Akarere ka Ruhango kubakira abatagira aho kuba, bazubaka inzu imwe muri buri murenge.

Kuri uyu wa Kane tariki ya 15 Ukwakira 2020 nibwo besheje uwo muhigo kuko bashyikirije izo nzu abo zubakiwe.

Perezida w’urwo rugaga mu Karere ka Ruhango, Ingabire Ruhumuriza Claudine, yavuze ko biyemeje gutanga umusanzu wabo bafasha igihugu gukemura ibibazo bibangamiye imibereho myiza y’abaturage.

Ati “Twari twihaye umuhigo wo kubaka inzu muri buri murenge dufatanyije n’abandi bagore, none twabigezeho kuko izo nzu uko ari icyenda twazishyikirije abatishoboye twazubakiye.”

Yavuze ko buri imwe mu nzu icyenda bubakiye abatishoboye ifite gaciro k’amafaranga arenga miliyoni ebyiri.

Abazihawe bashyikirijwe n’ibikoresho by’ibanze mu buzima birimo matola, imyambaro, ibikoresho by’isuku bahabwa n’ibiribwa ndetse bamwe muri bo borozwa ihene.

Abahawe inzu ni abagore batishoboye, bavuga ko bari bamaze igihe kinini babaho mu buzima bugoranye kuko babaga ahantu hatabereye ikiremwamuntu.

Musabimana Béata ati “Nabagaho nabi mu nzu imeze nka Nyakatsi nyikingisha inzitiramibu ariko mbonye aho kuba ndumva nduhutse. Ndashimira abagore bampaye aho kubambasabira umugisha ku Mana.”

Abahawe inzu bose bavuze ko bazazifata neza kandi zigiye kubabera umusingi wo kwitabira umurimo bakiteza imbere kuko bafite aho bataha heza.

Umuyobozi wa FPR Inkotanyi mu Ntara y’Amajyepfo, Vuganeza Aaron, yashimiye abagore bo mu Karere ka Ruhango igikorwa cyiza bakoze, avuga ko ari umusaruro w’imiyoborere myiza iri mu gihugu.

Yasabye abagore gukomeza kuyoboka ibikorwa bibateza imbere kandi bagakorera hamwe kugira ngo hatagira usigara inyuma.

Ibarura ryakozwe mu Karere ka Ruhango mu 2019 ryagaragaje ko hari imiryango 530 isembera kuko idafite aho kuba hahita hatangira ibikorwa byo kuyubakira.

Ubuyobozi bw’Akarere ka Ruhango bwihaye umuhigo ko uyu mwaka uzarangira iyo miryango yose yarubakiwe.

Bavuga ko biyemeje gufasha Akarere ka Ruhango gukemura ibibazo byugarije abaturage
Buri muryango wahawe inzu irimo n'ibikoresho by'ibanze mu buzima nk'ibiryamirwa n'ibindi

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza