IGIHE

Perezida Kagame yagaragaje icyo u Rwanda rwiteze ku musanzu wa miliyoni y’amadolari rwatanze muri AU

0 1-08-2020 - saa 14:41, Philbert Girinema

Perezida Kagame yasobanuye ko u Rwanda rwiteze byinshi kuri miliyoni y’amadolari rwatanze muri AU, aho yavuze ko ari umusanzu ugamije gushimangira imikoranire nk’umugabane aho nk’igihe urukingo rwa Coronavirus ruzaba rwabonetse bizaba byoroshye ko ibihugu bya Afurika birubonera rimwe aho gusanga ugera ku gihugu kimwe ikindi bikagorana.

Muri Mata u Rwanda rwatanze umusanzu wa miliyoni imwe y’amadolari ya Amerika, $500.000 mu Kigega cy’Umuryango wa Afurika Yunze Ubumwe cyashyiriweho kurwanya icyorezo cya Coronavirus, AU COVID Fund, andi $500.000 ashyirwa mu Kigo Nyafurika gishinzwe kurwanya indwara, Africa CDC.

Mu kiganiro yagiranye na The East African, Umukuru w’Igihugu yasobanuye ko aya mafaranga ajya gutangwa, yari agamije gushimangira imikoranire nk’umugabane mu guhangana n’ibibazo.

Ati “Ibihugu byinshi byari byarabikoze mbere y’uko twe tubitekereza. Twabikoze nk’ikimenyetso cyo gukorera hamwe nk’umugabane.”

Perezida Kagame yavuze ko uhereye ku Muyobozi wa AU muri iki gihe, Perezida wa Afurika y’Epfo, Cyril Ramaphosa n’abandi bayobozi hamwe n’izindi ntumwa z’uyu muryango; hakozwe ibiganiro n’amahanga mu kugaragaza ibibazo byugarije Afurika.

Yatanze urugero ku kibazo cy’udupfukamunwa tuba tugomba kugurwa, avuga ko bishoboka kubona ibindi bihugu bidufite ku bwinshi two kimwe n’ibikoresho byifashishwa mu gupima iki cyorezo cyangwa se ibindi bikenerwa, ariko ibyo bikoresho bikazagera muri Afurika icyorezo cyaramaze gutwara ubuzima bw’abantu benshi, ibintu ashimangira ko bitaba bikwiriye.

Ati “Hari uburyo bwo kugura ibintu ku bwinshi bikenewe ku mugabane wacu, aho kugira ngo igihugu kimwe kijye gushaka ibyo gikeneye. Twagerageje kubihuriza hamwe hanyuma tukabisaba nk’akarere cyangwa se ibihugu.”

Perezida Kagame yavuze ko umusanzu wa miliyoni y’amadolari u Rwanda rwatanze, wari ugamije kubashisha Ikigo gishinzwe kurwanya indwara z’ibyorezo kutagira umuntu n’umwe gisiga inyuma muri uru rugamba.

Ati “Urugero, ubwo inkingo zizaba zimaze kuboneka, tuzakenera ingano yazo nyinshi. Birasa n’aho mu gihe tudakoreye hamwe nk’umugabane dushobora kuzisanga umugabane wibagiranye mu gihe ibindi bice by’Isi byo biri kubona urukingo.”

“Niba igihugu gito gitonze umurongo ku giti cyacyo, buri gihugu uko ari 55 cyangwa se ibihugu byose bigatonda umurongo ku giti cyabyo, ntaho twagera. Ariko niba dukomeje gukorera hamwe nk’umuryango, biduhesha amahirwe yo kugerwaho n’urukingo icya rimwe hanyuma rugakwirakwizwa mu bihugu, bituma byoroha.”

Mu kiganiro Umukuru w’Igihugu yagiranye n’abanyamakuru muri Mata, yavuze ko uyu musanzu udakwiriye kugaragara nk’ubushobozi bwashyizwe ahadakwiye, kuko iyo izo nzego zikora neza narwo rubyungukiramo.

Ati “Niba CDC irimo gukora neza, niba Umuryango wa Afurika Yunze Ubumwe urimo gukora neza, natwe biratugarukira nk’Abanyarwanda tukabyungukiramo. Twatanze umusanzu kimwe n’ibindi bihugu muri ibi bigega bibiri, nizera ko ari igikorwa cyiza. Niba dufite CDC idukorera neza, nibyo dushaka kandi nibyo twungukiramo, niba Umuryango wa Afurika yunze Ubumwe urimo gukora neza mu guhangana n’icyorezo cya COVID-19, tuzabyungukiramo kandi nibyo dushaka.”

“Rero miliyoni imwe: ibihumbi magana atanu by’amadolari ya Amerika mu kigega kimwe, ibihumbi magana atanu mu kindi, ushobora kumva ko ari ikintu gikomeye iyo uyashyize mu ntoki z’Abanyarwanda, ariko ntekereza ko twashatse andi menshi agenewe Abanyarwanda aruta iyo miliyoni imwe, ari naho iyo miliyoni yavuye.”

Perezida Kagame yavuze ko ayo mafaranga yavuye mu bushobozi bwakusanyijwe kandi hari andi mafaranga menshi agenewe gufasha Abanyarwanda kurusha ayo rwatanze nk’umusanzu muri ibyo bigega bibiri, AU COVID-19 Fund na Africa CDC.

Perezida Kagame yavuze ko gufata iyi nkunga ukundi byaterwa n’uburyo umuntu yafashemo iki kibazo, kuko hari inyungu nyinshi izava mu guhuza imbaraga kurusha izava muri miliyoni imwe y’amadolari yatanzwe.

Perezida Kagame yavuze ko umusanzu u Rwanda rwatanze muri AU ugamije gushimangira imikoranire nk'Umugabane wa Afurika
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza