IGIHE

Niba muhembwa mukwiye kubazwa ibyo mukora-Minisitiri Shyaka abwira ba Gitifu b’imirenge

6 13-11-2019 - saa 22:01, Hakizimana Jean Paul

Minisitiri w’Ubutegetsi bw’Igihugu Prof Shyaka Anastase, yabwiye abayobozi bo mu nzego z’ibanze barimo ba gitifu b’imirenge n’ab’utugari ko bazajya babazwa ibyo bakora mbere y’uko bibazwa ba Meya n’abandi bayobozi kuko nabo bahembwa.

Yabigarutseho kuri uyu wa Gatatu tariki ya 13 Ugushyingo 2019 ubwo yari yitabiriye inama yaguye y’umutekano y’Akarere ka Ngoma. Iyi nama ikaba yitabiriwe n’abandi bayobozi barimo abakuriye ingabo na Polisi ndetse na Guverineri w’Intara y’Iburasirazuba, Mufulukye Fred.

Umuyobozi wa Polisi mu Ntara y’Iburasirazuba ACP Hatari Emmanuel, yagaragaje ko mu Karere ka Ngoma umutekano wifashe neza gusa hakigaragara ibyaha bimwe na bimwe birimo ubujura, gukubita no gukomeretsa, gusambanya abana, guhozanya ku nkeke kw’abashakanye, ibiyobyabwenge mu mirenge imwe n’imwe n’ibindi.

Minisitiri Shyaka yavuze ko kurwanya ibi byaha bitareba abayobozi bo mu nzego zo hejuru gusa ahubwo bireba ubufatanye bw’abayobozi bose kugera hasi ku mudugudu, yibukije ba gitifu b’imirenge n’ab’utugari ko mbere yuko ba Meya babazwa ibyo bakora nabo bazajya babanza kubazwa ibyo bakora kuko na bo bahembwa badakwiye guhunga inshingano.

Ati "Niba muhembwa mukwiye kubazwa ibyo mukora ntabwo inshingano zose tuzajya tuzibaza ba Meya n’abandi bayobozi kandi Gitifu w’Akagari nawe ahari kandi ahembwa na leta. Ubu mubimenye ntabwo Meya tuzajya tumubaza inshingano zose ahubwo mbere y’uko tumubaza tuzajya tubanza tubabaze ibyo muri gukora kugira ngo muzamure imibereho y’umuturage."

Minisitiri Shyaka yavuze ko nta cyuho kigaragara mu buyobozi bwo mu nzego z’ibanze ahubwo ngo hakenewe kongerwa imbaraga nyinshi n’ubufatanye kurushaho.

Ati “Ubufatanye ahenshi usanga butuzuye n’aho wabona ibisubizo hafi yawe ntugire imbaraga zo kwegera uvuga rikumvikana, kwegera urundi rwego runaka kugira ngo bafatanye mu bintu runaka, ntabwo ari abantu bafite ibyuho ahubwo ni ahantu bifitemo imbaraga zidakoreshwa ku gipimo zagakoreshejweho.”

Yasabye abayobozi bo mu nzego z’ibanze muri aka Karere gukoresha udushya twinshi bafite mu guteza imbere abaturage, muri utwo dushya harimo, Nkwiture iki Rwanda, Igiti cy’ibisubizo, Amasibo, Isaha mu Mihigo, Agatabo Nyoborasuzuma ry’iterambere ry’umuryango, Imihigo Cup n’ibindi.

Umuyobozi w’Akarere ka Ngoma, Nambaje Aphrodis, yavuze ko zimwe mu ngamba bafashe zirimo kwirinda icyahungabanya umutekano no kongera imbaraga mu kurwanya bimwe mu byaha bigaragara ko imibare y’ababikoa yazamutse.

Yakomeje agira ati “Icyo twafata rero nk’ingamba ni uko umutekano tugomba kuwufata nk’uwacu, tukongera imbaraga mu marondo y’umwuga ndetse n’amarondo asanzwe tukabishyiramo imbaraga kugira ngo tubashe kumenya ikintu icyo aricyo cyose gishaka guhungabanya umutekano tukanagikumira.”

Ruzindana Alexandre uyobora umudugudu wa Rwamutabazi mu Kagari ka Ndekwe mu Murenge wa Remera, yavuze ko kimwe mu byo yungukiye muri iyi nama harimo gushishikariza abaturage kwitabira gahunda za leta no kurushaho gufatanya mu kwicungira umutekano.

Iryivuze Isaie uhagarariye Njyanama y’Umurenge wa Remera we yavuze ko yungukiyemo uburyo bushya bwo gukora burimo gukorera hamwe no guhanahana amakuru hakiri kare.

Mu mezi atatu ashize bimwe mu byaha byakunze kugaragara muri aka Karere birimo gukubita no gukomeretsa, ubujura buciye icyuho, gusambanya abana, gutema amatungo no kwangiza imyaka n’ibindi.

Minisitiri Prof Shyaka Anastase yavuze ko mbere yo kubaza Meya inshingano runaka zitakozwe neza bagiye kujya babanza kubaza n'abandi bayobozi
Umuyobozi wa Polisi mu ntara y'iburasirazuba ACP Hatari Emmanuel yavuze ko ibyaha birimo ubujura, ihohoterwa biri mu byakozwe cyane mu mezi atatu ashize
Ruzindana Alexandre uyobora umudugudu yishimiye guhabwa impanuro na minisitiri w'ubutegetsi bw'igihugu Prof Shyaka Anastase
Iryivuze Isaie Perezida wa njyanama y'umurenge wa Remera yavuze ko bagiye kongera imbaraga mu gushyira hamwe kugira ngo bakumire byinshi mu byaha bikorerwa mu Murenge wabo
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
bimawuwa 2019-11-14 11:25:08

ariko ubundi nibyo ntabwo wajya kubaza mayo ibibazo byose byo mu karere nawe afite abo abamwunganira bahembwa na reta ,mayo azajye abatera igitutu bakore inshingano zabo barahiriye.

2
Rwema 2019-11-14 04:05:04

Ariko Nyakubahwa Ministre mujye mureba neza koko niba abavanwa ku mirimo ari uko badakora cg niba haba hari ikindi kibyihishe inyuma kuko hari benshi banakora neza cyane bajya bagendera mu nkubiri kuko yenda bafite ibyo bifujweho binyuranije n’amategeko ntibabikore kdi ikibabaje iyo bagiye hari abatangira kwaka amaf ngo bazabaha imyanya cyane cyane ku bugitifu bw’umurenge! Njye mbona ku giti cyanjye ariyo mpamvu byinshi bidahinduka mugahora mu mpanuro, buriya mu turere tumwe na tumwe haracyariyo utuntu n’utundi

3
MUKIZA Adolphe 2019-11-13 23:58:59

murakoze cyane nyakubahwa minisitiri, no mu karere ka rulindo muzadusure
nkubu hari ikibazo cy ziriya mashini zitwa ibiryabarezi zigikinirwa ahantu hanyuranyije namabwiriza yasohotse,
mu mirenge imwe nimwe nka tumba ,base byarubahirijwe ariko mu murenge wa kinihira gitifu wumurenge ntacyo yabikozeho ,kuko ziracyakinirwa mu tubari no muri butique kandi ukurikije amabwiriza yasohotse byaba binyuranije nayo,tukibaza ni kuki umurenge wa kinihira utagize icyo ukora mugihe muyindi mirenge byakoze uko amabwiriza abigena?muzadusure muzabyibonera,nukuri turasaba ko icyo kibazo cyabonerwa igisubizo kuko nta n’ibyangombwa bagira.gusa turashima imirenge nka base na tumba ko bakurikije uko amabwiriza avuga.

4
MUKIZA Adolphe 2019-11-13 23:27:38

yego birakwiye nukuri nyakubahwa minisitiri,
no mu karere ka Rulindo muzadusure,nkubu dufite ikibazo cya ziriya mashini zitwa ibiryabarezi zigikinwa mu buryo bunuranyije n’amabwiriza aherutse gusohoka avuga ko zitemerewe gukinwa mu tubari ,muri za butique,ariko mu murenge wa kinihira ntacyo gitifu wumurenge yabikozeho ,ahubwo tukibaza impamvu muyindi mirenge iri mu karere ka rulindo imwe nimwe yashyize mu bikorwa ayo mabwiriza urugero umurenge wa base ,tumba ,ariko kinihira baterera iyo,nukuri muzadusure muzabyibonera.

5
Vincent 2019-11-13 22:33:26

Ese kongerera urwego Rw’akagari ubushobozi bigezehe

6
Kanyanjye 2019-11-13 14:40:06

Niba ashyigikiye iri hamagazwa ry’abaturage ninzego z’umutekano bagasinya ku ngufu igihe bazatangira mitiweli nawe ubwo azajya mu mateka en reculons. Nkuko Tiken Jah abiririmba.

Kwamamaza