IGIHE

Mu Rwanda hatangijwe ubuvuzi bw’umutima bwifashisha ikoranabuhanga rihambaye (Amafoto)

0 19-11-2020 - saa 18:51, Iradukunda Serge

Bwa mbere mu Rwanda hatangijwe ubuvuzi bw’umutima bwifashisha ikoranabuhanga ryo ku rwego rwo hejuru mu gutahura uburwayi n’ibibazo bitandukanye bishobora kwibasira uru rugingo.

Ubu buvuzi bwitezweho korohereza abantu bavaga mu Rwanda bakajya kwivuriza mu mahanga kuko mu gihugu butahabonekaga.

Iri koranabuhanga ryatangirijwe muri King Faisal Hospital, kuri uyu wa 19 Ugushyingo 2020, ryuzuye ritwaye asaga miliyoni 800 Frw. Rigizwe n’ibyuma byifashishwa mu gutahura ikibazo imitsi ijyana cyangwa ivana amaraso mu mutima yaba ifite, bigakorwa umurwayi atabanje kubagwa.

Umuyobozi wungirije wa King Faisal Hospital, Dr Edgar Kalimba, yavuze ko iri koranabuhanga ari igisubizo kuko ubundi ubuvuzi bw’umutima bwatangirwaga muri ibi bitaro bwifashishaga imiti gusa, ubundi abafite ubushobozi bakoherezwa kuvurirwa mu mahanga.

Yagize ati “Ubusanzwe twajyaga twakira abarwayi b’umutima tukabavura dukoresheje imiti gusa ariko ikintu mwabonye cyo kuzibura imitsi umurwayi akaba yakira neza ntacyo twari dufite. Mbese umurwayi yavurwaga igice, noneho bake mu bafite ubushobozi bakajya hanze y’igihugu aribyo byasabaga igiciro kinini cyane.’’

"Ubu rero ikigiye guhinduka umurwayi azajya aza avurwe mu buryo bwose ahabwe ibyari bikenewe byose kandi ku giciro gito ugereranyije no kujya hanze y’igihugu.”

Dr Edgar Kalimba yavuze ko King Faisal Hospital yari isanganywe abaganga bafite ubumenyi mu gukoresha iri koranabuhanga kuri ubu bakaba bari kongera kwihugura babifashijwemo n’inzobere yaturutse muri Agha-Khan Hospital muri Kenya.

Ati “Twari dusanzwe dufite inzobere hano mu Rwanda by’umwihariko mu bitaro byacu, twari dusanzwe dufite abaganga babiri b’inzobere mu by’umutima, ni abaganga bize hanze y’igihugu bahabwa ubumenyi buhagije ariko bari gukorana n’inzobere yavuye muri Kenya kugira ngo biyibutse.”

Iri koranabuhanga ryifashishwa mu gutanga ubuvuzi bwo kuzibura imitsi ijyana cyangwa ikura amaraso mu mutima yazibye, yaba yarangiritse cyane agace kamwe kawo kakaba kasimbuzwa utundi dukoresho dufasha amaraso gukomeza gutembera neza.

Minisitiri w’Ubuzima, Dr Daniel Ngamije, yavuze ko kugeza iri koranabuhanga muri King Faisal Hospital biri muri gahunda ndende ya guverinoma yo kunoza ubuvuzi butangirwa mu bitaro byo hirya no hino mu gihugu.

Ati “Ni ikintu twakwishimira ko Guverinoma yabashije gufasha King Faisal Hospital kugera kuri iyi ntego. Biri mu mugambi rusange wo kunoza serivisi muri ibi bitaro no mu bindi bitaro bya kaminuza kugira ngo tugabanye ababuraga uko babona serivisi hano mu gihugu bamwe bakahasiga ubuzima cyangwa se n’ababishoboye bibahenze cyane bakagomba kujya gushaka izo serivisi muri Kenya, mu Buhinde, Afurika y’Epfo n’ahandi.”

Dr Ngamije yakomeje avuga ko ubu buvuzi buzagera no ku bafite amikoro make binyuze mu bwishingizi mu kwivuza butandukanye kandi bukazaba amahirwe ku Rwanda kuko ruzajya rwakira n’abarwayi bavuye mu bindi bihugu cyane cyane ibyo mu Karere.

Ubwo iri koranabuhanga ryatangizwaga ku mugaragaro muri King Faisal Hospital hari abarwayi babiri bavuwe ryifashishijwe, barishimira ko ryatumye babona ubuvuzi bari kujya gushakira hanze kandi ku giciro gito.

Umwe mu baganga b’inzobere mu kuvura indwara z’umutima muri King Faisal Hospital, Dr Mukeshimana Gloria, yavuze ko mu isesengura bakoze basanze abagera kuri 40 buri kwezi bazajya bakenera iyi serivisi nshya y’ubuvuzi bw’umutima.

Kugeza ubu ubuyobozi bwa King Faisal Hospital buvuga ko umuntu uzajya uvurirwa mu Rwanda hifashishijwe iri koranabuhanga bizajya bimusaba amafaranga ari hagati ya miliyoni 2 Frw na miliyoni 4 Frw, mu gihe iyo bajyaga hanze byabatwara atari munsi ya miliyoni 20 Frw.

Ku bafite mituweli bo kuri aya mafaranga bacibwa bazajya bishyura 10% andi atangwe n’ubwishingizi.

Inzobere mu gukoresha iri koranabuhanga zerekana uko rikora
Dr Mukeshimana asobanura imikorere y'iri koranabuhanga
Minisitiri w'Ubuzima, Dr Ngamije Daniel, yavuze ko iri koranabuhanga rizafasha muri byinshi
Rifasha gutahura uburwayi bw'umutima umuntu atabanje kubagwa
Iri koranabuhanga ryatangirijwe muri King Faisal Hospital
Abarwayi bavuwe hakoreshejwe ubu buryo bushya bavuze ko bukora neza kandi bwatumye batirirwa bajya mu mahanga
Minisitiri w'Ubuzima, Dr Ngamije Daniel, yavuze ko ubu buvuzi bushya buzatuma abantu batongera gutakaza amafaranga menshi bajya kwivuriza hanze
Dr Mukeshimana Gloria ni umwe mu nzobere zizajya zitanga ubuvuzi bwifashisha iri koranabuhanga
Dr Jeilan Mohamed wo muri Agha-Khan ni umwe mu bahuguye abaganga b'Abanyarwanda
Umuyobozi wungirije wa King Faisal Hospital, Dr Edgar Kalimba yavuze ko iri koranabuhanga rije kunoza ubuvuzi bw'umutima batangaga nk'ibitaro
Umuhango wo gutangiza iri koranabuhanga witabiriwe n'abantu batandukanye

Amafoto: Igirubuntu Darcy

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza