IGIHE

Minisitiri w’Intebe Dr Ngirente yasabye abarangije muri UR kuba umusemburo w’impinduka nziza (Amafoto na Video)

5 8-11-2019 - saa 15:04, Prudence Kwizera

Minisitiri w’Intebe, Dr Edouard Ngirente, yasabye abarangije muri Kaminuza y’u Rwanda kuba umusemburo w’impinduka nziza bagamije guteza imbere igihugu n’abagituye.

Yabitangaje kuri uyu wa Gatanu, tariki ya 8 Ugushyingo 2019, ubwo yayoboraga umuhango wo gutanga impamyabumenyi ku banyeshuri basaga ibihumbi icyenda barangije amasomo mu byiciro bitandukanye muri Kaminuza y’u Rwanda.

Uwo umuhango wabereye kuri Stade Mpuzamahanga ya Huye mu Karere ka Huye nk’ahantu hambere habanje Kaminuza mu Rwanda mu 1963.

Ni ku nshuro ya kabiri iyi stade yakiriye iki gikorwa nyuma y’icyo mu mwaka ushize cyahabereye ubwo abasaga ibihumbi birindwi bahabwaga impamyabumenyi.

Minisitiri w’Intebe, Dr Ngirente, yasabye abasoje amasomo yao gukoresha ubumenyi bahawe mu byiza bigamije impinduka nziza.

Ati “Murasabwa kuba umusemburo w’impinduka nziza muteza imbere igihugu cyacu mu iterambere ry’ubukungu n’imibereho myiza y’abaturage b’u Rwanda na Afurika muri rusange.”

Yashimye ko abahawe impamyabumenyi barangije neza kandi ari umwanya wo gushimira ababyeyi n’abarezi bagize uruhare mu kubategura.

Yavuze ko gahunda y’igihugu y’iterambere yatangiye mu 2017 izarangira muri 2024 igamije kubaka iterambere ry’igihugu rishingiye ku bumenyi.

Minisitiri w’Intebe Dr Ngirente yavuze ko kuri ubu imishahara n’ibindi bigenerwa abarimu n’abakozi ba Kaminuza y’u Rwanda bisigaye bitangwa ku gihe bityo ari ibyo kwishimirwa kandi bizakomeza bityo.

Yavuze ko amafaranga agenerwa abanyeshuri biga muri Kaminuza (buruse) yavuye ku bihumbi 25 Frw agera ku bihumbi 35 Frw kandi Inama y’Abaminisitiri iherutse kwemeza ko hagiye kujya hatangwa ibihumbi 40 Frw.

Minisitiri w’Uburezi, Dr Mutimura Eugène, yashimiye abahawe impamyabumenyi ababwira ko ari umwanya mwiza kuri bo wo kujya gushyira mu bikorwa ibyo bize.

Umuyobozi w’Icyubahiro wa Kaminuza y’u Rwanda (Chancellor) Patricia Shehan Campbel, yashimiye Pereziza Kagame Paul wamuhaye izo nshingano avuga ko azakomeza gukorana umurava agamije kuyiteza imbere.

Abafashe ijambo bahurije ku gushimira Leta y’u Rwanda yita ku banyeshuri n’abarimu haba muri Kaminuza y’u Rwanda no mu yandi mashuri.

Bashimye kandi gahunda yashyizweho na Leta y’u Rwanda yo guteza imbere ibikorerwa mu Rwanda (Made in Rwanda), abanyeshuri barangije n’abacyiga basabwa kuyiteza imbere.

Umunyeshuri wavuze mu izina rya bagenzi be barangije, Steven Mila, yashimiye Kaminuza y’u Rwanda ubumenyi yabahaye yizeza ko bazabwifashisha mu kwiteza imbere no guteza imbere igihugu banakirinda.

Ati “Urubyiruko twarangije uyu munsi twiteguye gukorera igihugu no kucyirinda n’imbaraga zacu zose.”

Abahawe impamyabumenyi bose hamwe ni 9382 barimo abahungu 3488 n’abakobwa 5894.

Muri Koleji y’Ubumenyi n’Ikoranabuhanga, CASS, harangije abagera kuri 638 barimo ab’igitsina gabo 188 n’ab’igitsina gore 450; muri Koleji y’Ubuhinzi n’Ubworozi, CAVM, ni 911 barimo abahungu 348 n’abakobwa 563.

Muri Koleji y’Icungamutungo n’Ubukungu, CBE, abahawe impamyabumenyi ni 2 606 barimo abahungu 1 137 n’abakobwa 1469; muri Koleji y’Uburezi, CE, ni 2 129 bagizwe n’abahungu 765 n’abakobwa 1364.

Muri Koleji y’Ubumenyi n’Ikoranabuhanga, CST, abarangije ni 1 495 barimo abahungu 373 n’abakobwa 1 122. Muri Koleji y’Ubuvuzi, CMHS, hahawe impamyabumenyi abagera ku 1 603 bagizwe n’abahungu 677 n’abakobwa 926

Kuri ubu Kaminuza y’u Rwanda ihagaze neza ugereranyije na mbere ya Jenoside yakorewe Abatutsi.

Kuva yatangira mu 1963 kugeza mu 1993 mbere ya Jenoside muri iyo myaka 30 yari imaze gushyira hanze abanyeshuri 1962 gusa. Mu mwaka w’amashuri wa 1997/98 abayirangijemo ni 4 250 naho uyu mwaka wa 2019 ni 9 382.

Minisitiri w’Intebe, Dr Edouard Ngirente, yasabye abarangije muri Kaminuza y’u Rwanda kuba umusemburo w’impinduka nziza mu gihugu
Minisitiri w’uburezi, Dr Mutimura Eugene, yashimiye abahawe impamyabumenyi ababwira ko ari umwanya mwiza kuri bo wo kujya gushyira mu bikorwa ibyo bize
Abahawe impamyabumenyi muri Kaminuza y'u Rwanda batumwe kuba umusemburo w'impinduka nziza ziteza imbere imibereho myiza y'abaturage
Abarangije muri UR barimo abahungu 3 488 abakobwa 5 894
Abasoje amasomo muri UR bitezweho impinduka mu iterambere n'imibereho myiza y'Abanyarwanda
Abayobozi bakuru batandukanye mu mutambagiro unogeye ijisho mbere yo gutanga impamyabumenyi ku barenga ibihumbi icyenda barangije muri UR
Biyemeje kujya gukoresha ubushobozi bafite mu guteza imbere igihugu no kukirinda
Kuri iyi nshuro abahawe impamyabumenyi muri UR ni 9 382
Byari ibyishimo byinshi ku basoje amasomo yabo muri UR bahawe impamyabumenyi
Steven Mila, wavuze mu izina ry'abahawe impamyabumenyi yashimiye Kaminuza y’u Rwanda ubumenyi yabahaye yizeza ko bazabwifashisha mu kwiteza imbere no guteza imbere igihugu banakirinda
Vincent Ntaganira, umwe mu banyeshuri ba UR warangije mu cyiciro gihanitse (Phd)
Minisitiri w’Intebe, Dr Edouard Ngirente, yasabye abarangije muri Kaminuza y’u Rwanda gufasha u Rwanda mu rugamba rw'iterambere
Ni ku nshuro ya gatandatu kaminuza y'u Rwanda itanze impamyabumenyi kuva muri 2013 yaba imwe
Ni umuhango witabiriwe n'abayobozi batandukanye muri Kaminuza y'u Rwanda

Amafoto: Muhizi Serge

Mugwiza Olivier

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Bv 2019-11-08 23:10:59

Turashimira ubuyobozi, abarezi ba Kaminuza kubwo igikorwa cy, indashikirwa cyakozwe, umuhango wo kubaha impamyabumenyi wagenze neza ariko hari ibyo tutareka kuvuga ngo ejo bizakosorwe :
- Kuba harabaye embouteillage mu muhanda ku buryo bibaye ngombwa uriya muhango wajya ubera i Kigali kuri stade Amahoro byaba ari byiza
- Hagurwa kandi indangururamajwi ituma abaje mu muhango bumva ubutumwa butangwa
- Nkurikije ibyo naganiye n, umunyeshuri umwe urangije mu ikoranabuhanga cg se ICT hakewe ubumenyi bwinshi kurusha uko hakenewe umubare mwinshi w, abitwa ko barangije ntacyo bazi, cg ntamenyereza mwuga rihagije babonye. Kugirango ibyo bigerweho bigomba guhera muri école primaire utsinzwe agasibira, secondaire hakabaho délibération cg se ijonjora bahereye ku bumenyi, na conduite cg imyitwarire, automatiquement ugize amanota make muri conduite niyo yaba yatsinze agataha iwabo, mu bumenyi hakabaho, abimuka kuko batsinze neza, abasibira kuko bagerageje ariko ntibatsinde, n, abirukanwa kuko batsinzwe koko, ibyo bizatuma kwiga bigira isura yo kwiga KO KO, noneho université hinjiremo umubare wizewe kandi wiga neza.
Ntabwo ibyo guhanga akazi bigerwaho.

2
Gasongo 2019-11-08 13:12:13

Ndabona amaherezo nyamara muzafata undi mwanya wo kwita k’uburezi bw’abana b’abahungu. Ndabona mu Rwanda abakobwa aribo barimo kwiga bonyine.

3
Mine 2019-11-08 09:13:35

Ariko mujye musobanura neza!! Mwagaragaje umubare wa bakibwa na bahungu nukuvuga ko nta bagabo cg abagore barimo???!!!!

4
rugira gabriel 2019-11-08 07:40:07

twishimiye ayomaraso mashya aje ng dufatanye .gutezs igihugu cyacu imbere

5
Isma B 2019-11-08 07:33:24

Sorry ntabwo CASS ari koleji yubumenyi nikoranabuhanga? Ntabwo amakuru bayaguhaye neza

Kwamamaza