IGIHE

Minisiteri y’Uburezi yatangiye gutekereza uburyo bwafasha abanyeshuri kwigira aho bari hose

0 1-08-2020 - saa 09:58, Umwali Zhuri

Minisiteri y’Uburezi isobanura ko icyorezo cya Coronavirus cyatanze umukoro wo gushaka uburyo imyigishirize yashyirwa mu buryo bw’ikoranabuhanga, aho ubu mu igenamigambi ryayo yatangiye gushyiramo uburyo no mu gihe abana baba basubiye mu ishuri, amasomo amwe yajya atangwa hifashishijwe ikoranabuhanga.

Muri Werurwe nibwo u Rwanda rwafashe ingamba zikomeye zirimo no gufunga amashuri mu gukumira ikwirakwira ry’icyorezo cya Coronavirus. Kugeza ubu muri gahunda n’uko ashobora gufungurwa muri Nzeri nubwo nta cyizere ntakuka ko bizashoboka bitewe n’imibare y’abarwayi ikomeje kwiyongera umunsi ku wundi.

Umuyobozi Mukuru ushinzwe Igenamigambi muri Minisiteri y’Uburezi, Rose Baguma, yabwiye IGIHE ko kuva Coronavirus yatangira, byagaragaye ko ari ngombwa ko hatekerezwa ubundi buryo bwakwifashishwa mu kwigisha.

Ati “Kuba umwana yakwigira aho ariho hose, ubu nibwo dutangiye kuvuga tuti mu myaka iri imbere tugomba gutekereza uburyo bw’iyo gahunda buhamye, tukagira imbuga abana bakwigiraho zifatika, muri REB barazifite, muri UR no muri za IPRC ariko turapanga uburyo dutangirana na gahunda y’uko nubwo umwana yasubira mu ishuri ariko turashaka kugira ubundi buryo bwa kabiri bwo kujya dutangira amasomo mu ikoranabuhanga.”

Nubwo iyi gahunda iri gutekerezwaho, hari ikibazo cy’abana baba mu bice by’ibyaro hatari amashanyarazi, internet, badafite mudasobwa cyangwa se telefoni nubwo hari abandi ubu bo biga neza kuko bafite ibyo bikorwa remezo.

Baguma avuga ko hari abiga neza kuko bafite ubushobozi ariko hari n’abatabufite bagomba gutekerezwaho. Mu igenamigambi rya Minisiteri y’Uburezi avuga ko hari gushyirwamo ubundi buryo bwafasha kugira ngo abana bazajye bakurikirana amasomo aho bari hose.

Ati “N’ubu turavuga ngo muri Nzeri [amashuri azafungurwa] ariko ntawabimenya bashobora kudatangira. Bibaye ko badatangira se? Na none hakenerwa ubundi buryo bwabafasha kwiga. Turatekereza ku gutangirana na gahunda yo kwiga hifashishijwe ikoranabuhanga bijyana n’imyigishirize isanzwe, bagakomeza kwigira mu mashuri ariko hari n’indi gahunda yo gukomeza gukurikirana amasomo, noneho tukazareba aho Isi ituganisha.”

Minisitiri w’Intebe, Dr Ngirente Edouard, aherutse kuvuga ko igihe cyo gufungura amashuri kizatangazwa muri uku kwezi nyuma yo kugenzura uko icyorezo kizaba gihagaze n’ingamba zashyizweho mu guhangana nacyo.

Ubwo yagezaga ku Nteko Ishinga Amategeko, Imitwe yombi ishusho y’ibikorwa bya Guverinoma mu guhangana n’icyorezo cya COVID-19, yabajijwe uko igihugu cyiteguye gufungura amashuri muri Nzeri.

Ati “Amashuri tuvuga ko afunze kugeza mu kwezi kwa Cyenda kugira ngo n’ufite ishuri ryigenga yitegure. Mbere y’ukwa Cyenda nta cyashobokaga gukorwa bitewe n’uko icyorezo cyari kimeze. Nyuma y’ukwa Cyenda nibwo tuzamenya uko bizaba bihagaze, ariko ntituzarindira ko kugera, bizagera hagati mu kwezi kwa munani dukurikije uko icyorezo kizaba kimeze tugatangaza niba amashuri azafungura cyangwa atazafungura.’’

"Ntibisobanuye ko amashuri azafungura ku itariki ya mbere, nyuma y’ukwa Cyenda ibizakorwa tuzabiganiraho muri Kanama bitewe n’uko icyorezo kizaba kimeze.’’

Minisitiri w’Ubuzima, Dr Ngamije Daniel, yashimangiye ko igihe cyose Abanyarwanda bakomeza kudohoka ku ngamba zo kwirinda icyorezo cya Coronavirus, imibare y’abandura igakomeza kwiyongera, bizatuma amashuri nayo akomeza gufungwa.

Ati “Nibikomeza gutya se uratekereza ko ari nde wafungura amashuri tukibona abantu 40 buri munsi barwaye, ntabwo bishoboka. Ni ukuvuga rero ngo ingaruka ziraza kutugeraho mu buryo butandukanye nitudafata ingamba zikomeye zo kubahiriza aya mabwiriza”.

Magingo aya mu Rwanda harabarurwa abantu 2022 bamaze kwandura icyorezo cya Coronavirus mu gihe batanu aribo kimaze guhitana. Abamaze gukira bo kugeza ubu ni 1106.

Umuyobozi Mukuru ushinzwe Igenamigambi muri Minisiteri y’Uburezi, Rose Baguma, yasobanuye ko hatangiye gutekerezwa uburyo imyigishirize isanzwe yajyanishwa no kwifashisha ikoranabuhanga
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza