IGIHE

Kigali: Serivisi z’abinjira n’abasohoka zatangiye gutangwa hifashishijwe ikoranabuhanga

0 21-01-2021 - saa 21:19, Dufitumukiza Salathiel

Ibiro bishinzwe Abinjira n’Abasohoka mu gihugu byatangaje ko muri ibi bihe Umujyi wa Kigali washyiriweho gahunda yihariye ya Guma mu rugo, bizakomeza gutanga serivisi ku babigana hifashishijwe ikoranabuhanga.

Ni itangazo ryaje nyuma y’ibyemezo by’Inama y’Abaminisitiri yateranye ku wa 18 Mutarama 2021, igashyiraho ingamba nshya zo guhangana n’icyorezo cya COVID-19, aho ibikorwa bya Leta n’abikorera byafunzwe hagasigara ahatangirwa serivisi z’ibanze zirimo iz’ubuzima, guhaha ibiribwa, n’ibindi byihutirwa.

Icyakora iyo myanzuro ikubiyemo ko urwego rw’ubukerarugendo mu gihugu ndetse n’Ikibuga Mpuzamahanga cy’Indege cya Kigali bizakomeza gukora, hubahirizwa amabwiriza yashyizweho yo kwirinda gukwirakwiza icyorezo.

Ni muri urwo rwego abinjira n’abasohoka mu Rwanda bamazwe impungenge ko serivisi bakenera zirimo gusaba pasiporo, visa, ibyangombwa by’impunzi, na laissez-passer n’izindi mpushya zizakomeza gutangwa, ariko hakifashishwa iya kure (online) hirindwa ikwirakwizwa ry’icyorezo.

Abasaba serivisi basabwe kunyura ku rubuga rw’Ibiro by’Abinjira n’Abasohoka ari rwo: www.migration.gov.rw cyangwa bakanyura kuri www.irembo.gov.rw.

Itangazo rikomeza rivuga ko abakeneye serivisi zibasaba kujya ku cyicaro cy’ibyo Biro bahamagara ku mirongo ya telefoni cyangwa bakabyandikira kuri email.

Urutonde rw’imirongo ya telefoni na email abakeneye izo serivisi bazajya bifashisha baka ubufasha byashyizwe ku rukuta rwa Twitter rw’ibyo Biro.

Ku bashaka andi makuru, bayasaba banyuze ku mbuga nkoranyambaga z’ibyo Biro zirimo Twitter “@Rwandamigration” na Facebook “RwandaImmigration.”

Urwego rw’ubukerarugendo n’Ikibuga Mpuzamahanga cy’indege cya Kigali zemerewe gukomeza gukora, ariko abinjiye mu Rwanda basabwa kwerekana icyemezo kigaragaza ko nta Coronavirus barwaye, bakaba baragihawe mu masaha 120 mbere yo kugera mu gihugu.

Bagomba kandi guhita bishyira mu kato bakigera mu gihugu, mu mahoteli atandukanye yabiherewe uburenganzira.

Abajya hanze nabo basabwa icyangombwa ko bapimwe COVID-19 ntibayisanganwe.

Itangazo ry'Ibiro by'Abinjira n'Abasohoka ririho imirongo ya telefoni na email byo kwakiraho ubufasha
Serivisi zigenewe Abinjira n'Abasohoka zikomeje gutangwa hifashishijwe ikoranabuhanga
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza