IGIHE

Ishoramari rya RSSB ryungutse miliyari 14,2 Frw mu gihembwe cya mbere cya 2020/21

0 21-11-2020 - saa 12:22, Ishimwe Israel

Ikigo cy’Ubwiteganyirize mu Rwanda, RSSB, cyatangaje ko ishoramari ryacyo ryungutse miliyari 14,2 Frw mu gihembwe cya mbere cy’umwaka w’ingengo y’imari wa 2020/21.

Ni imibare yatangajwe ku wa 20 Ugushyingo 2020 mu kiganiro abayobozi ba RSSB bagiranye n’itangazamakuru cyibanze ku buryo iki kigo cyitwaye mu mezi atatu n’icyerekezo gifite mu myaka itanu iri imbere.

Umuyobozi Mukuru wa RSSB, Rugemanshuro Régis, yatangaje ko umusaruro ikigo cyabonye atari mubi kuko ari igihe cyahuriranye n’ingamba zo guhangana n’icyorezo cya Coronavirus.

Ati “Mu mezi atatu ashize ntibyagenze nabi, ni igihembwe twavuga ko cyagenze neza.’’

Yakomeje ati “Ku bijyanye n’umusaruro uva mu ishoramari n’ahandi hava amafaranga, twinjije miliyari 14 Frw; biri munsi y’igipimo twari twiyemeje [miliyari 18 Frw] bitewe na none n’ingaruka za COVID-19.’’

Yavuze ko uteranyije umusaruro uva mu misanzu n’ishoramari rya RSSB, iki kigo cyageze kuri 89% y’ibyo yari yateganyije mu gihembwe cya mbere.

Ati “Urebye amafaranga yasohotse, ku bijyanye n’ibigenerwa abanyamuryango twatanze miliyari 32 Frw [birenzeho 1% y’ibyari byateganyijwe]. Miliyari 79 Frw niyo twari twiyemeje.’’

Mu gihembwe cya mbere cy’umwaka w’ingengo y’imari ya 2020/21 kandi RSSB yishimira ko abatanga umusanzu wa pansiyo, ubwisungane mu kwivuza, abizigamira muri Ejo Heza wazamutse.

Muri gahunda ya Pansiyo, RSSB yanditse abanyamuryango bashya 78,399 bangana na 209% y’intego yari yashyizweho.

Rugemanshuro yagize ati “Twese tuzi ubwubatsi bw’amashuri bwabaye muri iki gihe, iyo mirimo mishya yahanzwe ngo ibyumba by’amashuri byubakwe yadufashije kuzamura umubare w’abatanga ubwo bwizigame bwa pansiyo.’’

Binyuze muri pansiyo, RSSB yakusanyije imisanzu ingana na miliyari 24,2 Frw mu gihe yishyuye miliyari 8,7 Frw nk’inyungu mu gihembwe cya mbere. Iyi mibare ingana n’igabanuka rya 3,2% mu misanzu n’inyongera ya 16% mu nyungu ugereranyije n’igihembwe cya mbere cy’umwaka ushize.

RSSB kandi yishyuye miliyoni 427,7 Frw ku bagore bagiye mu kiruhuko cy’ababyeyi byemewe n’amategeko.

Ku bijyanye n’umusanzu w’ubwisungane mu kwivuza, RSSB yabonye abafatanyabikorwa bashya 2177 mu gihe yari yateganyije 3500. Ibi byatumye umusanzu wakusanyijwe ugera kuri miliyari 12.6 Frw.

Kuri ubu umusanzu wa mituweli wanganaga na 80,1% mu mpera z’igihembwe cya mbere mu gihe kuri ubu wageze kuri 82,1%. Mu mwaka ushize wose ubwitabire mu kwishyura uyu musanzu bwari kuri 79,7%.

Rugemanshuro yashimiye abayobozi bagize uruhare mu kumvisha abaturage ko ari ingenzi kwishyura ubwisungane.

Ati “Inkuru nziza ni uko twishimiye ko mituweli uko yishyuwe byarushije umwaka washize, muri mituweli abiyandikishije bishyuye 100%.’’

Mu gihembwe cya mbere cy’umwaka w’ingengo y’imari, RSSB kandi yagaragaje ko Abanyarwanda barushaho kugana ubwizigame bw’igihe kirekire buzwi nka Ejo Heza.

Binyuze muri Ejo Heza, muri icyo gihe hiyandikishije abanyamuryango 770.450 barimo 528.003 batangaga umusanzu. Aba biyongereyeho 186.576 (55%) kuva ku wa 30 Kamena 2020, babikije miliyari 6,6 Frw.

Muri rusange Ejo Heza ifite abanyamuryango 950.000 barimo abizigama 700.000 bamaze kwizigama miliyari 8 Frw.

Mu cyerekezo gishya cya RSSB, abanyamuryango bijejwe ko serivisi bahabwa zizihuta ku buryo zitangwa ‘nta rupapuro nta n’urugendo rukozwe’, ahubwo byose bigakorerwa kuri telefoni.

RSSB muri gahunda yo gufasha Abanyarwanda bafite ubushobozi buke iteganya kubaka inzu ibihumbi birindwi i Gasogi mu Karere ka Gasabo zifite agaciro kari hagati ya miliyoni 10 na 20 Frw.

Nyuma yo gusoza kubaka icyiciro cya mbere cy’inzu ziri muri Vision City zatangiye no kugurishwa, hari gukorwa inyigo y’icyiciro cya kabiri. RSSB irateganya n’undi mushinga wo kubaka inzu ziciriritse i Kinyinya.

Mu cyerekezo cya RSSB cy’imyaka itanu ishaka guhinduka ikigo gishyira abanyamuryango bacyo ku isonga, cyubakiye ku mibare kandi gikora uko bikwiye.

Umuyobozi Mukuru w’Ikigo cy'Ubwiteganyirize mu Rwanda, RSSB, Régis Rugemanshuro (uwa kabiri iburyo) atanga ishusho y'imikorere ya RSSB mu gihembwe cya mbere cy'ingengo y'imari y'umwaka wa 2020/2021
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza