IGIHE

Imishinga 10 itanga icyizere mu kwita ku kibazo cy’inda ziterwa abangavu yatoranyijwe muri iAccelerator

0 7-11-2019 - saa 11:48, Ishimwe Israel

Imishinga 10 y’indashyikirwa itanga icyizere mu guhangana n’ikibazo cy’inda ziterwa abangavu yatoranyirijwe kwinjira mu cyiciro cya nyuma mu irushanwa rya ‘Innovation Accelerator’ (iAccelerator) rishishikariza urubyiruko kwihangira imirimo no kwishakamo ibisubizo ku bibazo biremereye sosiyete.

Irushanwa rya iAccelerator riri kuba ku nshuro ya kabiri, iry’uyu mwaka ryahaye ikaze imishinga igaragaza uburyo bwo guhangana n’inda ziterwa abangavu.

Igikorwa cyo gutangiza iAccelerator II, nka gahunda yunganira izisanzweho mu guhangana n’icyo kibazo cyabereye i Kigali ku wa 20 Nzeri 2019.

Ku ikubitiro hatanzwe imishinga 752 itoranywamo 40 ari nayo yamurikiwe akanama nkemurampaka ku wa 6 Ugushyingo 2019, mu gikorwa cyabereye muri Cenetra Hotel i Kabuga.

Imishinga yamuritswe yiganjemo iy’abanyeshuri biga ibijyanye n’Ubuvuzi mu mashuri makuru na za kaminuza. Ishingiye ku biganiro n’ikoranabuhanga rigezweho rya porogaramu zitanga amakuru akwiye ku bangavu no guhwitura ababyeyi mu rugamba rwo guhangana n’inda ziterwa abangavu.

Ikibazo cy’inda ziterwa abangavu cyahawe umwihariko bitewe n’ubukana gifite nkuko bigaragazwa na raporo zitandukanye.

Raporo y’Ikigo cy’Igihugu cy’Ibarurishamibare ku Miturire n’Ubuzima (RDHS) yerekanye ko abangavu baterwa inda bavuye kuri 6.1% mu 2010 bagera kuri 7.3% mu 2015. Nibura umwe mu bakobwa batanu abyara atarageza imyaka 19 y’amavuko. Abana b’abakobwa batewe inda bangana na 49.6% basamye bafite imyaka iri hagati ya 12 na 17.

Imibare yo mu 2016 ya Minisiteri y’Uburinganire n’Iterambere ry’Umuryango igaragaza ko abangavu 17,500 bari hagati y’imyaka 15-17 batewe inda, bivuze ko nibura abana 47 bavukaga buri munsi.

Ubushinjacyaha Bukuru bwo bwagaragaje ko kuva muri Nyakanga 2017 kugeza muri Kamena 2018, bwakiriye dosiye zigera ku 2996 z’abasambanyije abana.

Imishinga 10 yatoranyijwe mu guhangana n’icyo kibazo irimo itanga ubutumwa buburira buri wese wagira uruhare mu gushaka umuti urambye w’ikibazo.

Muri yo harimo filimi yiswe ‘Ibanga’; ikiganiro ’The Open Book - Impamba y’Ubuzima’; umukino witwa ’Urukundo’; ikiganiro cya televiziyo kigenewe abana biganjemo ab’abahungu; umushinga wo gukora amashusho n’amajwi byo gufasha abafite ubumuga kugerwaho n’ubutumwa bubagenewe; uwo gushyira inyigisho ku bifuniko by’amakaye y’abanyeshuri; porogaramu y’umukino ukubiyemo ubutumwa yiswe ‘Keza’ na ’Tubivuge platform’ itanga ubujyanama bwo mu mutwe ku bangavu bahohotewe.

Mu yindi yatsinze harimo ikiganiro cya televiziyo cyinjiza abagabo muri gahunda yo kuboneza urubyaro hakoreshejwe ibikoresho byo mu gikoni cyiswe ’Flavors of Family Planning’. Ni umushinga wa Uwimana Jean Berchmas, Gisaro Alice na Iradukunda Cyprien.

Gisaro yavuze ko umushinga wabo wigisha kuboneza urubyaro hifashishijwe ibirungo n’imbuto zirimo intoryi, imineke n’ibindi.

Ati “Turashaka kwibanda ku bahungu, no kubinjiza muri gahunda yo kuboneza urubyaro. Ikiganiro cyacu gifite ibirungo tugaragaza nk’uburyo bwo kuboneza urubyaro.’’

Niyizibyose Jean Confident Irénée uvuka i Karongi ni we muntu ku giti cye umushinga we wa porogaramu itanga amakuru anyuze mu mashusho n’ibishushanyo yise “Sobanukirwa’ washyizwe mu icumi myiza.

Ati “Kuri radio na televiziyo haba ibiganiro, natekereje ko wasanga abantu batabona umwanya wo kubikurikirana nubaka uburyo bwabafasha. Umuntu azajya agura agapapuro kariho kode, ashyire application ye muri telefoni bimufashe kubona ubutumwa bubitse mu ikoranabuhanga.’’

Urubyiruko rwatoranyijwe ruzahugurwa ku bijyanye no kunoza, gutegura imishinga, gukoresha ingengo y’imari mbere yo guhura mu cyiciro kindi kizasozwa hahembwa imishinga yahize indi.

Umuhuzabikorwa wa Gahunda y’Iterambere ry’Urubyiruko mu Muryango Imbuto, Murenzi Joël, wari no mu bakemurampaka yatangaje ko guhitamo imishinga ihiga indi byari bikomeye biteye n’imiterere yayo.

Ati “Ntikari akazi koroshye. Twatoye imishinga myiza tugendeye ku mwimerere w’umushinga, agashya wifitemo n’uburyo abantu bayikoresha byoroshye. Kureba niba umushinga wubakiye ku bushakashatsi kandi ukabasha gukoreshwa na bose.’’

Yavuze imishinga irimo porogaramu ya Tantine yahembwe mu cyiciro cyabanje, itanga umusaruro kuko abagera ku 1000 basura urubuga rwayo buri munsi mu gihe abasaga 5000 batunze iyo application.

Imishinga itatu ya mbere ni yo izahabwa inkunga ya $10,000 yo gukomeza gukora ndetse ba nyirayo banahugurwe ku buryo bwo kuyinoza.

Gahunda ya iAccelerator ishyirwa mu bikorwa na Imbuto Foundation ifatanyije n’Ikigega cya Loni cyita ku baturage (UNFPA), Ikigo cya Koreya y’Epfo gitsura Amajyambere (KOICA) na Minisiteri y’Urubyiruko n’Umuco.

Eric Rugerinyange, Justin Nkunzimana, Alice Tembasi, na Aline Nyampinga baragaraza umushinga wabo
Innocente Kabasinga,Serge Ndagijimana,Jerôme Bimenyimana na Daniel Sibomana basobanura uburyo bashaka gukora konti ya Youtube izajya inyuraho ibiganiro bigamije kwamagana ihohotera rishingiye ku gitsinda
Veronique Mukashyaka asobanura umushinga we wo kwigisha abakobwa biga mu mashuri yisumbuye ibijyanye n’imyororokere
Mick Ndayishimiye, Frederick Ntabana, Honoré Isimbi, na Christelle Giraneza bavuga ku mushinga wo gukora imikino y’ikoranabuhanga itanga ubutumwa bugamije kurwanya inda ziterwa abangavu
Daniel Tuzanesha, Clarisse Uwineza, Levia Kanyanja na Gasagire Anitha Merci basobanura umushinga bafite wo gukora ibiganiro byigisha abangavu batewe inda uburyo bwo kubyaza imyenda ishaje imishya
Umuhuzabikorwa wa Gahunda y’Iterambere ry’Urubyiruko mu Muryango Imbuto, Murenzi Joël, yari no mu bagize akanama nkemurampaka
Inzobere mu by’Ikoranabuhanga mu Kigo cy'Igihugu gishinzwe Ikoranabuhanga mu Itumanaho n'Isakazabumenyi (RISA), Nsanga Sylvie na we yari mu kanama nkemurampaka katanze amanota ku mishinga itandukanye igamije gutanga ibisubizo ku guhangana n'inda ziterwa abangavu
Dushime Kagina Azza ari mu bamuritse umushinga uzajya utanga ubutumwa ku rubyiruko rwose ruri mu mashuri yo mu cyaro binyuze mu kubwandika ku bifuniko by’amakaye
Mukundane Malachie yamuritse umushinga w’imashini izajya itanga ibinini ku bangavu mu kwirinda gusama
Mukundane aheruka gusoza amasomo ye muri IPRC Kigali uyu mwaka
Umukinnyi wa filimi, Laura Musanase, yamuritse umushinga wo gukina filimi ngufi mu kwigisha abangavu kwirinda inda zitateganyijwe ahereye ku nkuru mpamo ye
Niyizibyose Jean Confident Irénée amurika umushinga we yise "Sobanukirwa" uzakoresha porogaramu yo gusobanurira urubyiruko ibijyanye n'ubuzima bw'imyororokere
Niyizibyose yasobanuye umushinga we unyura abagize akanama nkemurampaka
Umutoni Michelline yasobanuye umushinga we wo kwifashisha inkuru z’abakobwa batwaye inda mu kuburira abakiri bato
Inkuru y’ubutwari bwo kuvuga ibyamubayeho yashimishije Nsanga Sylvie ahita amusanga imbere aramuhobera, amubwira amagambo amukomeza
iAccelerator yatangijwe mu 2016, ishyiriweho gufasha urubyiruko kwishakira ibisubizo ku bibazo birwugarije bijyanye n’ubuzima bw’imyororokere n’imihindagurikire y’umubiri
Urubyiruko rwatsinze n'abagize akanama nkemurampaka bafashe ifoto y'urwibutso
Imishinga yamuritswe ishingiye ku biganiro n’ikoranabuhanga rigezweho rya porogaramu zitanga amakuru akwiye ku bangavu no guhwitura ababyeyi mu rugamba rwo guhangana n’inda ziterwa abangavu.
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza