IGIHE

Imbamutima z’abanye-Congo batuye mu Rwanda: Ishuri n’isoko rya kijyambere mu mishinga yagutse bahanze amaso

5 16-09-2020 - saa 06:51, Nkurunziza Ferdinand

Gutsura umubano hagati y’ibihugu bituranye ni umusingi ntakuka w’ibikorwa biteza imbere abaturage babyo kandi bikarushaho gutanga icyizere cyo kubaka no kwagura imbago mu bijyanye n’ubuhahirane, uburezi, itumanaho n’ibindi.

Iyi ni yo ntero n’icyerekezo bigaragazwa n’Abanye-Congo batuye mu Rwanda kuko basanga imibanire y’ibihugu byombi muri iki gihe itanga icyizere cy’impinduka nziza nyuma y’amateka yaranzwe no kwishishanya mu bihe byatambutse.

Ubu icyizere cy’umubano mwiza cyageze no mu bikorera b’Abanye-Congo bari mu Rwanda, ku buryo bizeye gukomeza kwagura ibikorwa byabo byungukira impande zombi.

Ni mu gihe kuko Repubulika Iharanira Demokarasi ya Congo ni rimwe mu masoko akomeye y’ibicuruzwa bituruka mu Rwanda, kuko imibare yerekana ko mu gihembwe cya mbere cya 2020 ibyo u Rwanda rwohereza mu mahanga byari bigeze ku gaciro ka miliyoni 1221.07$.

Mu bihugu biza ku isonga mu byo u Rwanda rwoherezamo ibicuruzwa byinshi ku mwanya wa mbere hari Leta Zunze Ubumwe z’Abarabu aho mu gihembwe cya mbere cya 2020 cyari kimaze koherezayo ibicuruzwa bifite agaciro ka Miliyoni 118.26$.

Igihugu cyiza ku mwanya wa kabiri ni icy’abaturanyi bo muri Repubulika Iharanira Demokarasi ya Congo, aho mu gihembwe cya mbere cya 2020 cyoherejeyo ibicuruzwa bifite agaciro ka miliyoni 19.80$.

Usibye kohererezanya ibicuruzwa, RDC yatangije ibikorwa bitandukanye mu Rwanda, ibizwi kandi bimaze igihe kinini ni ishuri rya [Groupe Scolaire Consulaire Congolais] riri mu Mujyi wa Kigali, ryahubatswe mu 1972.

Ni mu gihe kandi abanye-Congo bagaragara mu yindi mirimo y’agaciro mu Rwanda irimo nk’ubukanishi, ibijyanye no gutunganya ubwiza bikorerwa muri za salon de coiffure n’indi ituma baba abantu b’ingirakamaro mu gihugu.

Umuyobozi Mukuru w’iri shuri, Jean Maurice Burasa, avuga ko n’ubwo ari irya Leta ya RDC riri ku butaka bw’u Rwanda, ryakira buri wese urigannye yifuza kwiga mu buryo ryigishamo yaba Umunyarwanda cyangwa umunyamahanga.

Avuga ko kuva iri shuri ryatangira ryatanze umusaruro ugaragara mu burezi bw’u Rwanda kuko hari benshi barinyuzemo, bavuyemo abantu bakomeye ndetse naryo ubwaryo rikaba ryarakomeje kwiyubaka no kwagura ibikorwa.

Ati “Iri shuri ryageze kuri byinshi […], uramutse usuye Umujyi wa Kigali mu nzego hafi ya zose wahasanga abakozi banyuze muri iri shuri. Nubwo wajya mu mahanga ya kure nka Canada, u Burayi, Leta Zunze Ubumwe za Amerika n’ahandi wahasanga abize hano. N’uwahoze ahagarariye u Rwanda mu Burusiya, ubu ni Minisitiri w’ibidukikije hano, yize muri iri shuri.”

Mu mwaka ushize iri shuri ryahawe igihembo n’Umuryango Mpuzamahanga wa Francophonie, mu marushanwa ngarukamwaka ahuza amashuri yose yigisha mu Gifaransa mu Rwanda. Iri shuri kandi ryanahawe ibihembo bitandukanye birimo n’icyo ryahawe n’Urwego rw’Igihugu rw’Iterambere, RDB.

Ubuyobozi bw’iri shuri buvuga ko bufite imbogamizi yo kubona ibikorwaremezo bihwanye n’umubare w’abifuza kuryigamo kuko ryakira ubusabe bwa benshi, nyamara rifite ubushobozi bwo kwakira abanyeshuri batarenze 1500 mu byiciro bitatu biribarizwaho.

Umuyobozi Mukuru wa Groupe Scolaire Consulaire Congolais, Jean Maurice Burasa, avuga ko n’ubwo iri shuri ari irya leta ya RDC riri ku butaka bw’u Rwanda, ryakira buri wese urigannye

Usibye iri shuri kandi, hari ibikorwa by’Abanye-Congo bitandukanye mu Rwanda, byinshi byibanda ku bucuruzi mu ngeri nyinshi, amavuriro, abarimu bakomoka muri RDC bigisha mu mashuri ya leta n’ayigenga n’ibindi.

Abaturuka i Goma nabo usanga barashimye ubushyitsi mu Rwanda kuko abatari bake usanga bakodesha inzu zabo amafaranga menshi, bakaza kwibera mu Rwanda, bakwishyurwa ukwezi gushize bakagira ayo basagura kandi i Rubavu babaye mu nzu zigezweho.

Albert Kambale, Umunye-Congo ucururiza imitako (Bijouterie) mu Rwanda akaba ari naho atuye avuga ko icyo barukundiye ari umutekano, isuku n’umutuzo barubonamo.

Yagize ati “Maze imyaka 10 nkorera ubucuruzi mu Rwanda kuko twebwe Abanye-Congo tuhakorera, tuhakundira uburyo ibintu byose usanga biri ku murongo n’abana bacu niho biga.”

Wilonja Daniel na we w’Umunye-Congo ufite akabari gakomeye mu Mujyi wa Rubavu avuga ko ubufatanye bwa leta zombi kuva Tshisekedi agiye ku butegetsi bwazamuye ubucuruzi ku buryo budasanzwe.

Ati “Njyewe nari mfite akabari mu Mujyi wa Goma nkimurira hano i Rubavu kubera umutekano nahabonye utuma abantu bakora amasaha 24, ariko nakomeje gukorera no muri RDC.’’

Mwamini Jeannette ufite iduka ry’ibikoresho byo mu gikoni i Rubavu avuga ko mu Rwanda habaye iwabo.

Ati “Mu Rwanda habaye mu rugo, nkanjye mpatuye imyaka irindwi yose kandi n’abana banjye bavuga Ikinyarwanda. Ndashima Leta y’u Rwanda kubera umutekano n’ukuntu itwitaho ariko badufashe imipaka ijye ikora amasaha yose kuko nka twe dukoresha umupaka muto, hari ubwo usanga ibicuruzwa waranguye byihutirwa babifungiraho umupaka bikararayo.’’

Aba Banye-Congo bavuga ko bagorwa no kuba mu gihugu cyabo nta wemerewe gutunga ubwenegihugu burenze bumwe, ngo naho ubundi bakabaye mu Rwanda.

Igiteranyo mbumbe cy’amafaranga u Rwanda rwakuye mu bicuruzwa rwohereza muri Congo mu 2019 kigera kuri miliyoni 376.71$.

Ku isonga mu bicuruzwa byinjirije u Rwanda akayabo haza ibijyanye n’ingufu n’ibikomoka kuri peteroli byinjije agera kuri miliyoni 113.43$, hagakurikiraho ibikomoka ku matungo, imboga n’amavuta, byinjije asaga miliyoni 37.48$ ndetse n’ibijyanye n’ifu byinjije miliyoni 33.60$.

Mu bindi byinjirije u Rwanda amafaranga menshi harimo ibinyampeke, imyenda n’ibindi bikoze mu bitambaro, isukari, ibikoresho by’ikoranabuhanga, umunyu n’amasabune.

Gutangiza isoko ryihariye ku bikomoka muri RDC

Ihuriro ry’Abanye-Congo batuye mu Rwanda (Organisation des Congolais Resident au Rwanda) rivuga ko rigiye gutangiza isoko ryihariye rizajya ricururizwamo ibikomoka muri Repubulika Iharanira Demokarasi ya Congo gusa, mu rwego rwo kurushaho kongera imbaraga mu bikorwa bafite mu Rwanda no kubyaza umusaruro amahirwe aturuka ku mubano mwiza hagati y’ibihugu byombi.

Ubuyobozi bw’iri huriro kandi buvuga ko gutangiza iri soko bizaba inzira yagutse yo kugeza muri RDC ibicuruzwa bikomoka mu Rwanda, cyane cyane mu bice by’icyaro bitari byagerwaho n’iterambere.

Umuyobozi w’Ihuriro ry’Abanye-Congo batuye mu Rwanda, Djuma Ngoma Cyambilo, avuga ko mu bicuruzwa bizagezwa ku isoko ryo mu Rwanda birimo ibiribwa bitandukanye bifite umwihariko wo muri Congo, amafumbire y’umwimerere, ibikorwa by’ubukorikori n’ubugeni n’ibindi.

Ku byo bateganya kujyana muri Congo birimo ibikorwa by’ubwubatsi nk’amabati n’ibindi bidasanzwe bibonekayo.

Ihuriro ry’Abanye-Congo batuye mu Rwanda ryashinzwe mu 2005, biturutse ku gitekerezo cya Djuma Ngoma washakaga kwihuza na bagenzi be bagashyigikira ikipe y’umupira w’amaguru ya Daring Club Motema Pembe yari yaje mu Rwanda gukina na Rayon Sports.

Nyuma icyari ugushyigikira ikipe y’umupira w’amaguru bakibyajemo ishyirahamwe ryatumye bamenyana, batangira no gufashanya mu bibazo by’ubuzima bwa buri munsi.

Kugeza ubu iri huriro risaba buri munyamuryango gutunga ikarita yawo igurwa 10 000 Frw kandi agatanga umusanzu ungana n’igihumbi buri kwezi.

Kuva Perezida Tshisekedi yajya ku butegetsi, Abanye-Congo benshi bamushimira ko yahinduye isura ya RDC mu ruhando mpuzamahanga ndetse bikaba byarafashije abatari bake kurushaho guturiza aho bari kubera umubano mwiza uri kuzahuka hagati y’ibihugu babamo n’igihugu bakomokamo.

Agahenge muri iki gihugu kanatumye umubano wacyo n’u Rwanda ugera ku rwego rushimishije. Muri Mata 2019, Sosiyete y’Ubwikorezi ya RwandAir yatangiye gukorera ingendo mu Mujyi wa Kinshasa.

Tshisekedi yashyize imbaraga mu kunga ubumwe n’ibindi bihugu, guhashya imitwe y’inyeshyamba no kugarura ituze muri RDC, yanatangiye kubaka imihanda n’ibindi bikorwa by’iterambere byasaga n’inzozi ku butegetsi bwamubanjirije.

Umuyobozi w’Ihuriro ry’Abanye-Congo batuye mu Rwanda, Djuma Ngoma Cyambilo, avuga ko mu bicuruzwa bizagezwa ku isoko ryo mu Rwanda birimo ibiribwa, amafumbire, ibikorwa by’ubukorikori n’ubugeni n’ibindi
Isuku ni kimwe mu byitabwaho cyane ku bakoresha umupaka uri hagati y'u Rwanda na RDC mu rwego rwo kwirinda indwara z'ibyorezo
Abanye-Congo benshi bifite bakorera i Goma, bakoresha umupaka mu gitondo, mu masaha y'umugoroba ku ruhande rw'u Rwanda niho haba hari abantu benshi
Ku mupaka muto (Petite Barrière) i Rubavu, habaga hari urujya n'uruza ku mpande zombi
Kuri 'Grande Barrière' ku ruhande rwa RDC, mbere ya Coronavirus habaga hari abantu bake mu masaha y'umugoroba kubera Abanye-Congo benshi baba bari gutaha bagana mu Rwanda
Mu masaha y'umugoroba, abaturage ku mpande zombi baba bari kuva kuri buri ruhande, aho bakorera imirimo yabo ibyara inyungu
Si ngombwa ko abanyura ku mupaka (Grande Barrière) berekana ibyangombwa kuri buri ruhande kubera 'One Stop Border Post'
Ugeze ku mupaka wo ku ruhande rw'u Rwanda mu masaha ya mu gitondo nta bantu benshi baba bahari nkuko byabaga bimeze mu masaha y'umugoroba
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Butera 2020-09-18 00:10:05

Abacongoman ntakibazo bigirira n aba vrai types. Ukuyemo bamwe b’abatekamutwe gusa basebya abandi. Muhawe ikaze Mu rwagasabo

2
Kayijuka 2020-09-17 09:34:45

Uburyohe nkubu tubuheruka kera kuri Papa Mobutu na Habyarimana muri CEPGL nibyiza gukomeza uyu mubano ariko nta buryarya kugirango bitazajya bitugiraho ingaruka.

3
Alexandre 2020-09-16 13:08:47

Bravo l’Ecole congolaise pour le grand prix de la Francophonie! Courage vraiment! Bien qu’elle ait cette connotation de nationalité congolaise, elle est au fait une école internationale. Merci aussi àson dirigeant pour s’être excellemment exprimé aux questions du journaliste de IGIHE.

4
MP1 2020-09-16 03:36:46

MUTUFUNGULIYE MASOMO BATOTO BASOME. KUBA MU RWANDA ABANA BACU BATIGA BIRATUMUGAZA

5
Chantal 2020-09-16 00:47:45

Ooh,nos freres Congolais tolingaki bango mingi ,tango toebani mozalaka batu bazuli sana.sentez-vous a la maison ici au Rwanda,Nzambeapambola bango mingi,mutuleteye Samaki mingi za Vicumbi.

Kwamamaza