IGIHE

Ikibazo cy’ibura ry’amazi mu Ntara y’Iburasirazuba kigiye kuvugutirwa umuti

0 10-06-2021 - saa 11:22, Kanamugire Emmanuel

Ikigo cy’Igihugu Gishinzwe Amazi, Isuku n’Isukura, WASAC n’Ikigo cy’Abayapani gishinzwe Iterambere Mpuzamahanga (JICA), byashyize umukono ku masezerano y’ubufatanye mu mushinga ugamije gukemura ikibazo cy’ibura ry’amazi meza mu Ntara y’Iburasirazuba.

Aya masezerano yashyizweho umukono ku wa 10 Kamena 2021 i Kigali. Umushinga ibigo byombi bigiye guhuriraho ushingiye ku bufatanye mu bya tekinike uzamara imyaka ine, ukaba ugamije kongera ingano y’amazi meza agera ku baturage mu turere uko ari turindwi tugize Intara y’Iburasirazuba.

Mu bikorwa biteganyijwe harimo kubaka ubushobozi bw’inzego zose zifite aho zihuriye n’imicungire y’amazi zirimo iz’ibanze, abikorera ndetse n’abayakoresha umunsi ku munsi.

Inzego z’uturere zizafashwa kunoza igenamigambi mu gushyiraho ibikorwa remezo by’amazi, bizatuma agera ku baturage yiyongera.

Biteganyijwe ko u Buyapani buzajya bwohereza impuguke z’abakorerabushake mu byo kubaka no gucunga ibikorwa remezo by’amazi bakaza gutanga ubumenyi mu nzego zitandukanye mu Rwanda ndetse aba enjeniyeri b’Abanyarwanda bakajya kwihugurira mu Buyapani.

Jica kandi izajya itanga ibikoresho bitandukanye bikenerwa muri uru rwego nk’uko byatangajwe n’Umuyobozi wayo mu Rwanda, Maruo Shin.

Ati “Twiyemeje gufatanya n’u Rwanda mu mugambi wo kugeza amazi kuri buri munyarwanda nk’uko biri mu muhigo rugomba kuba rwesheje mu 2024.”

Umuyobozi Mukuru w’Ikigo cy’Igihugu gishinzwe Amazi, Isuku n’Isukura (WASAC), Eng. Alfred D. Byigero, yavuze ko ikibazo cy’amazi meza gihangayikishije mu Ntara y’Iburasirazuba ikaba ari yo mpamvu leta yahisemo ko uyu mushinga ukorera muri iki gice.

Yavuze ko uyu mushinga bawitezeho gukemura iki kibazo atari muri iyi Ntara honyine ahubwo no mu tundi duce tugize igihugu.

WASAC izaba ifite inshingano zo gukurikirana ishyirwa mu bikorwa ryawo, kugeza ibikoresho aho bikenewe no kwishyura ikiguzi cy’ingendo ku nzobere zizajya zituruka mu Buyapani n’ibindi nk’uko Eng. Dusenge yakomeje abisobanura.

Umushinga uzashorwamo miliyoni enye z’amadolari ya Amerika mu gihe cy’imyaka ine.Ushingiye ahanini ku bufatanye mu bya tekiniki.

Mu byo JICA imaze igihe ifatanyamo na WASAC harimo ibikorwa byo kugabanya amazi apfa ubusa no gushyiraho igenamigambi ryo kuyakwirakwiza mu Mujyi wa Kigali.

Muri gahunda y’Igihugu y’Iterambere (NST1), u Rwanda rwihaye intego ko mu 2024, abaturage bose bazaba bagerwaho n’amazi meza mu gihe kuri ubu abagera kuri 86% ari bo bayabona.

Umuyobozi Mukuru w’Ikigo cy’Igihugu gishinzwe Amazi, Isuku n’Isukura (WASAC), Eng. Alfred D. Byigero n’Umuyobozi wa JICA mu Rwanda, Maruo Shin bashyira umukono ku masezerano
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza