IGIHE

Guhisha amakuru ku mibiri y’abazize Jenoside ni imbogamizi ku nzira y’ubwiyunge bw’Abanyarwanda

1 16-10-2020 - saa 19:58, Mukahirwa Diane

Inteko Ishinga Amategeko yagaragaje ko kuba hakiri abantu bagenda biguru ntege mu gutanga amakuru ku hakiri imibiri y’Abatutsi bazize Jenoside yakorewe Abatutsi mu 1994, bikibangamiye inzira y’ubumwe n’ubwiyunge bw’Abanyarwanda.

Ubwo Komisiyo y’Igihugu ishinzwe kurwanya Jenoside, CNLG, yagezaga ku Nteko Ishinga Amategeko y’u Rwanda imitwe yombi, raporo yayo y’umwaka wa 2019-2020, yagaragaje ko muri uyu mwaka hagaragaye imibiri isaga 800 y’abazize Jenoside yakorewe Abatutsi.

Raporo ya CNLG y’ingengo y’imari y’umwaka ushize igaragaza ko mu turere twose habonetse imibiri y’Abatutsi bazize Jenoside igera kuri 808.

Abagize inteko bagaragaje ko kuba nyuma y’imyaka 26 hakiboneka imibiri kandi nabwo amakuru y’aho iherereye ntatangwe ku bushake, ari ikimenyetso cy’uko hari intambwe itaraterwa mu guhangana n’ingengabitekerezo ya Jenoside.

Depite Nyirabega Euthalie yavuze ko abaturage badatanga amakuru ku bushake ahubwo ko imibiri igaragara bitewe n’ibikorwa biri gukorerwa aho iri.

Ati “Hari aho berekena imibiri isaga 800 yabonetse muri uyu mwaka gusa aho usanga ku turere 30 muri two 22 hari imibiri yagiye iboneka aho usanga nta muntu wabivuze ahubwo ari nk’uwahingaga cyangwa wacukuraga umusarani ikahaboneka.”

Senateri Dr Kanyarukiga Ephrem avuga ko abantu bakomeje kwinangira ku gutanga amakuru ajyanye n’imibiri y’abazize Jenoside.

Ati “Mu gushaka imibiri y’abazize Jenoside ngo bashyingurwe mu cyubahiro twabonye ko abantu bacyinangiye cyane, ndetse naho twaganiraga n’ubuyobozi wumvaga bavuga ngo tugeze aho tunaniwe turashaka ko mwadukorera ubuvugizi.”

CNLG nayo yemeza ko iki kibazo cyo kudatanga amakuru kigihari aho usanga abantu baseta ibirenga mu kugaragaza ahari imibiri y’abazize Jenoside ngo ishyingurwe mu cyubahiro.

Visi Perezida wa CNLG, Mutakwasuku Yvonne, yavuze ko guhangana n’ibyaha bifite aho bihuriye na Jenoside ari urugamba rudahagarara.

Ati “Mu by’ukuri navuga ngo turacyarwana n’iyo mbogamizi, abantu baracyabitse amakuru, abandi hari n’igihe usanga bari muri ya mashyirahamwe ya ceceka badashaka gutanga amakuru.”

Yakomeje avuga ko n’imibiri iboneka ahanini usanga iva mu musaruro wa gahunda yo mu magereza yitwa ‘Mvura nkuvure’.

Ati “Iyi gahunda iba mu magereza ya ‘Mvura nkuvure’ hari ubwo ikora bamwe ku mutima bagatanga amakuru ndetse n’amahugurwa bahawe atuma iyo ageze hanze agasanga bataranze aya makuru we arayatanga.”

Abagize Inteko bagaragaje impungenge ku bushobozi buhari bwo kubungabuka amateka n’ibimenyetso bya Jenoside yakorewe Abatutsi muri 1994.
Mutakwasuku yavuze ko nubwo bataragera aho bifuza ariko hari ibiri gukorwa ngo amateka arusheho kubungwabungwa.

Ati “Tugenda tugerageza kubungabunga biriya bikoresho hari imiti babitera buri mwaka hariyo bashyira ku myenda ndetse hakaba n’imiti yihariye bashyira ku mibiri. Ntituragira ubushobozi buhagije bwo gutera imiti imibiri yose iri mu nzibutso kugeza ubu bashyira ku ziri ku rwego rw’igihugu cyane cyane Murambi.”

Yasabye inteko ko bakongererwa ingengo y’imari bahabwa kuko kuba amateka atabungabungwa neza harimo n’ikibazo cy’ubushobozi buke.

Iyi raporo y’ibikorwa bya CNLG yo mu 2019/2020 igaragaza ko ibyaha by’ingengabitekerezo ya Jenoside n’ibifitanye isano nayo bigera kuri 246 ari byo byagaragaye mu gihe cyo kwibuka ku nshuro ya 26 Jenoside yakorewe Abatutsi ndetse bikaba byarashyikirijwe ubutabera.

Visi Perezida wa CNLG, Mutakwasuku Yvonne, yavuze ko guhangana n’ibyaha bifite aho bihuriye na Jenoside ari urugamba rudahagarara
Komisiyo y’Igihugu ishinzwe kurwanya Jenoside, CNLG, yagejeje ku Nteko Ishinga Amategeko y’u Rwanda imitwe yombi, raporo yayo y’umwaka wa 2019-2020
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza