IGIHE

Abantu 2046 biganjemo Abanyakigali barajwe muri za stade kubera kurenga ku mabwiriza ya COVID-19

0 1-08-2020 - saa 14:13, Iradukunda Regis

Polisi y’Igihugu yatangaje ko abantu 2046 barimo 925 bafatiwe mu Mujyi wa Kigali barajwe muri za stade zitandukanye mu gihugu kubera kutubahiriza ingamba za leta zo guhashya icyorezo cya COVID -19.

Abafashwe ni abari barengeje isaha ya saa Tatu yagenwe yo kuba abantu bageze mu rugo.

Ku rwego rw’igihugu, iki gikorwa cyabaye ku mugoroba wo ku wa 31 Nyakanga 2020, cyakorewe mu duce dutandukanye cyafatiwemo abantu 2046.

Abafashwe barajwe muri stade mbere y’uko barekurwa mu gitondo cyo kuri uyu wa Gatandatu tariki ya 1 Kanama 2020 nyuma yo kuganirizwa no kwibutswa ko icyorezo cya COVID-19 kidakwiye gukerenswa.

Mu Mujyi wa Kigali iki gikorwa cyabereye mu Turere twa Nyarugenge, Kicukiro na Gasabo.

Abantu 471 bo mu Karere ka Nyarugenge barajwe kuri Stade ya Kigali i Nyamirambo mu gihe muri Gasabo 242 bafashwe baraye kuri Stade ya ULK ku Gisozi naho kuri Stade Amahoro i Remera haraye abasaga 120.

Umwe mu bafashwe bakarazwa i Nyamirambo uvuga ko ari inshuro ya kabiri afatwa, yabwiye itangazamakuru ko yemera amakosa kandi agasaba imbabazi.

Agize ati “Bamfashe narengeje isaha yashyizweho yo kuba umuntu ari mu rugo, yari inshuro ya kabiri. Maze kubona ko aya ngaya ari amakosa akomeye cyane. Niyemeje kuzajya ngera mu rugo kare. Ikindi ndabisabira imbabazi, ntibizasubira.”

Umuyobozi Nshingwabikorwa w’Akarere Nyarugenge, Ngabonziza Emmy, yavuze ko igikorwa cyo gufata abarenze ku mabwiriza cyasabye ubufatanye bw’inzego zitandukanye.

Yagize ati “Igikorwa cyo gufata aba bantu cyabayeho ku bufatanye n’inzego zitandukanye. Inzego z’ibanze n’iz’umutekano ni bo babigizemo uruhare rukomeye. Cyasabye imbaraga zidasanzwe kuko twashakaga gufata abantu benshi hagamijwe kwigisha kuko tubona ko bamaze kudohoka. Aba baratubera abavugizi ku bandi batekereza nkabo.”

Mu bafashwe hari harimo abashoferi, abamotari n’abanyamaguru bose bafashwe mu masaha ya nyuma ya saa tatu yagenewe kuba abantu bose bagomba kuba bari mu rugo mu rwego rwo kwirinda ikwirakwira rya Coronavirus.

Umuvugizi wa Polisi y’u Rwanda, CP John Bosco Kabera, yavuze ko babona kutubahiriza iyi saha abantu basa n’abadohotse ku mabwiriza yashyizweho mu guhashya Coronavirus.

Yagize ati “Mu by’ukuri dusanzwe tugerageza kugenzura ko abantu bubahiriza amasaha yo kuba bari mu rugo, ariko bimaze kugaragara ko bamaze kubigira umuco. Bigaragara ko hari abantu badatinya iki cyorezo bakumva ko ari ibintu bisanzwe, ntabwo bisanzwe rero bagomba gukomeza kukirinda.”

Mu gihugu hose hafashwe abagera ku 2046, abenshi bakaba ari abo mu Mujyi wa Kigali ahafatiwe abantu 925.

Mu Karere ka Huye hafashwe abantu 282 barenze ku mabwiriza yo kwirinda COVID-19 barajwe muri Stade Huye.

Kuri Stade Amahoro i Remera, abaharaye basaga 120
Kuri Stade ya ULK harajwe abagera kuri 242 barenze ku mabwiriza yo kwirinda Coronavirus
Umuyobozi Nshingwabikorwa w'Akarere ka Gasabo, Umwari Pauline, yabwiye abafashwe n'abaturage muri rusange ko nibakomeza kutubahiriza amabwiriza bishobora gutuma gahunda ya Guma mu Rugo isubizwaho
Umuyobozi Nshingwabikorwa w’Akarere ka Nyarugenge, Ngabonziza Emmy, yavuze ko igikorwa cyo gufata abarenze ku mabwiriza ya Coronavirus cyari kigamije kwigisha abaturage
Umuvugizi wa Polisi, CP John Bosco Kabera, yaburiye abatubahiriza amabwiriza yo kwirinda COVID-19, ababwira ko batagomba kubyumva nk'ibintu byoroshye
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza