IGIHE

Umunsi FAR yacanyweho umuriro, Habyarimana akitabaza Abafaransa ngo Inkotanyi zitamufatana Kigali

0 3-05-2021 - saa 07:22, Iradukunda Serge

Mu 1993 Ubutegetsi bw’uwari Perezida w’u Rwanda, Juvénal Habyarimana bwongeye kubura ubwicanyi bwakoreraga Abatutsi maze birakaza bikomeye Ingabo za RPA zari zimaze iminsi zemeye guhagarika imirwano kubera ibiganiro bya Arusha byari birimbanyije zongera kubura imirwano ngo zitange gasopo ku Ngabo za Ex-FAR.

Muri Mutarama na Gashyantare 1993, Leta ya Habyarimana yongeye gukora ibikorwa byo kwica Abatutsi mu cyahoze ari Gisenyi na Ruhengeri, abahigwaga cyane ni abahaye ubuhamya Komisiyo y’Ihuriro mpuzamahanga rirengera uburenganzira bwa muntu (FIDH) yari imaze igihe ikora iperereza ku bwicanyi bwakorerwaga Abatutsi kuva mu 1990.

Nyuma y’uko abagize iyi komisiyo bavuye mu Rwanda, abiganjemo Ingabo za FAR batangiye guhiga Abatutsi bagize icyo bavuga kuri ubu bwicanyi, bica abasaga 400.

Komisiyo y’Igihugu ishinzwe kurwanya Jenoside (CNLG), itangaza ko guhera tariki 10 Gashyantare 1993 hishwe Abatutsi barenga 60 muri Komini ya Ngarama muri Byumba, intumbi zisigara zanitse ku gasozi zidashyinguwe.

Iki gikorwa cya Leta ya Habyarimana cyabaye nko gukora mu jisho FPR-Inkotanyi yari yaremeye imishyikirano maze yiyemeza kugaba ibitero ngo itange gasopo.

Mu gitondo cyo ku wa 8 Gashyantare 1993, Ingabo za RPA zavuye mu birindiro byazo mu Majyaruguru y’u Rwanda aho zari zimaze igihe zigaruriye zimanuka zigana i Kigali, zifata Umujyi wa Ruhengeri ndetse zikomeza kumanuka zigana mu Murwa Mukuru Kigali.

Muri iki gihe Ingabo za RPA zacanye umuriro kuri FAR, ku buryo mu minsi mike zari zimaze kwigarurira igice kinini cy’Amajyaruguru y’u Rwanda ndetse zanageze ku musozi wa Shyorongi uri mu nkengero z’Umujyi wa Kigali. Iki gihe zari mu birometero 30 uvuye muri Kigali rwagati.

Izi mbaraga za RPA zatumye Leta ya Habyarimana n’Abafaransa bari bamushyigikiye bashya ubwoba maze batangira gukubita hirya no hino ngo Inkotanyi zitabafatana Kigali.

Raporo yitiriwe Muse ivuga ku ruhare rw’u Bufaransa muri Jenoside yakorewe Abatutsi, igaragaza ku wa 11 Gashyantare 2021 uwari Umujyanama wihariye mu bya gisilikare wa Perezida w’u Bufaransa, Francois Mitterrand, Gen Christian Quesnot yamwandikiye amubwira ko “ikibazo barimo giteye inkeke” ngo “ kuko amakuru akesha abasirikare babo bari i Kigali agaragaza ko RPF iri mu mwanya uyemerera gufata Kigali”.

Nyuma y’icyumweru, RPA yiyemeje gutanga gasopo, ku wa 15 Gashyantare 1993 Bruno Delaye wari Ukuriye Ishami rishinzwe Afurika mu Biro bya Perezida Mitterrand yagiriye inama uyu mukuru w’igihugu amubwira ko gukomeza guha ubufasha u Rwanda mu buryo buziguye bisa n’ibitangiye kunanirana, amubwira ko amahirwe basigaranye ari ukwinjira mu rugamba mu buryo bweruye.

Iki gihe ngo Bruno Delaye yari afite impungenge z’uko FAR yaba itagishoboye guhangana na RPA ko ndetse mu gihe yaba ifatanywe Kigali byaba bivuze ko n’Abafaransa bagomba kuyivamo.

Habyarimana yitabaje ab’i Paris

Muri iki gihe ubwo igitutu cy’Inkotanyi cyari kimeze nabi, Leta ya Habyarimana yasaga n’iyabuze aho ipfunda imitwe. Ku wa 18 Gashyantare Ambasade y’u Rwanda muri Uganda yandikiye u Bufaransa ibumenyesha ko ibintu byadogereye ko niba nta gikozwe Inkotanyi zirara muri Kigali.

Iyi nyandiko yagiraga iti “Inkotanyi (RPF) ziyemeje gukomeza guhatana kugera ku iherezo zigafata ubutegetsi ku ngufu. Bari kuvuga ko bageze aho badashobora kwihangana cyangwa ngo basubire inyuma, hakenewe ubufasha bwihuse kugira ngo RPF ihagarikwe ndetse isubizwe mu birindiro byayo bizwi.”

Muri iki gihe Gen Quesnot na we yari akomeje kubwira Mitterand ko Inkotanyi ziramutse zifashe u Rwanda ari igihombo ku Bufaransa. Yavugaga ko kuba Inkotanyi zafata u Rwanda bivuze ko zakwimika Icyongereza, Igifaransa n’u Bufaransa bikabura ijambo mu karere.

Ikindi bavugaga ko u Bufaransa nibunanirwa kurwana kui Habyarimana bizaba igisebko ku Bufaransa mu maso y’ibindi bihugu ’by’abafatanyabikorwa’ babwo muri Afurika, kuko bazabona ko nabo baramutse batewe nta waabatabara.

Mu mugoroba wo ku wa 18 Gashyantare 2021, i Paris hateranye inama yitabiriwe na Gen Quesnot n’uwari Umugaba Mukuru w’Ingabo z’u Bufaransa Jacques Lanxade ndetse n’Umunyamabanga Mukuru muri Minisiteri y’Ububanyi n’amahanga, Dominique Pin yiga by’umwihariko ku buryo bashobora gufasha Perezida Habyarimana.

Mu gitondo cyo ku wa 19 Gashyantare 1993 Perezida Habyarimana yahamagaye i Paris ko “Uganda iri gutanga umusanzu ukomeye mu bikorwa bya RPF ko ndetse amakuru yizewe agaragaza ko Ingabo z’u Rwanda zitazabasha kurinda Kigali no kuyikumiramo Inkotanyi igihe kinini.”

Habyarimana yakomeje asaba "ko Ingabo z’U Bufaransa zamuha ubufasha bwihuse ngo ahagarike izo ‘nyeshyamba’ ndetse azibuze gufata Kigali.”

Mu kiganiro n’ikinyamakuru Christian Science Monitor, Gen Maj Paul Kagame wari uyoboye ingabo za FPR-Inkotanyi, yasobanuye ko FPR yafashe umwanzuro wo kurenga ku masezerano ya Arusha igaba ibitero ku Ngabo za FAR ngo kuko na Leta ya Habyarimana nayo itari ikiyubahiriza.

Yagize ati “Intego zacu ni ugutanga ubutumwa kuri Leta bw’uko mu gihe turi gushakira hamwe amahoro [binyuze mu masezerano ya Arusha] bakwiye kuyubahiriza. Bakomeje kwica ibyo twemeranyijeho i Arusha. Ugomba kuba warumvise ubwicanyi buherutse kubera [mu duce twa Gisenyi na Ruhengeri] kandi bwakozwe na Leta”.

Mu rwego rwo kubahiriza amazerano ya Arusha RPA yakomeje gusabwa gusubira mu birindiro byayo, ikagumana uduce yari yarafashe mbere kugira ngo amasezerano yubahirizwe. Mubyo FPR yasabye kugira ngo isubireyo harimo guhagarika ubwicanyi bwibasiye abatutsi kandi u Bufaransa bugahagarika ibikorwa byo gufasha Leta ya Habyarimana.

Ingabo za RPA zasubiye mu birindiro, Leta ya Habyarimana nayo icisha make ntiyakomeza kwica Abatutsi ku mugaragarokugira ngo idakora mu jisho RPA ikabyutsa ikarushaho kwishyira habi, nubwo umugambi wa Jenoside wo wakomeje gutegurwa.

Nubwo RPA yo yasaga n’itegereje ko amasezerano ya Arusha yasinywe muri Kanama 1993 ashyirwa mu bikorwa, Leta ya Habyarimana yo siko yabigenzaga kuko ishyirwa mu bikorwa ryayo ryakomeje gutinzwa kugeza kuwa 7 Mata 1994 ubwo Jenoside yatangiraga gushyirwa mu bikorwa.

Inzirabwoba (FAR) zagerageje kwirwanaho ariko biba iby'ubusa
Bamwe mu basirikare ba FAR bakwira imishwaro. Aha hari muri Gitarama ubwo bari bamaze kuraswaho na RPA
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza