IGIHE

Urugamba rwo kweguza Trump rugeze mu mahina

0 13-01-2021 - saa 08:42, Ndahayo Emmanuel

Nubwo abura iminsi irindwi gusa ngo ave ku butegetsi, Perezida Donald Trump wa Amerika akomeje kotswa igitutu n’abadipolomate ba Amerika bababajwe cyane n’uburyo uyu mugabo yagize uruhare mu guhamagaza imyigaragambyo karundura yakorewe mu Ngoro Ishinga Amategeko ya Amerika ikagwamo abantu batanu ariko by’umwihariko, ikangiza isura ya Amerika ku ruhando mpuzamahanga.

Kuri uyu wa Kabiri abadepite ba Amerika batoreye umwanzuro usaba Visi Perezida wa Amerika, Mike Pence, kwifashisha ingingo ya 25 y’Itegeko Nshiga maze akambura ububasha Perezida Trump.

Pence yanze iki cyifuzo gusa bamwe mu badepite bo mu Ishyaka ry’Aba-Republicains rya Trump bari bamaze gutangaza ko bashyigikiye icyifuzo cyo kumweguza.

Kuba Pence yaranze icyemezo cy’abadepite, byabahaye uburenganzira bwo gutorera umwanzuro wo gutera Trump icyizere, aho biramutse bibayeho, yaba ari we Perezida wa mbere mu mateka ya Amerika uterewe icyizere inshuro ebyiri akiri ku buyobozi.

Ku ruhande rw’abasenateri, hari amakuru avuga ko abo mu ishyaka ry’Aba-Republicains bagera kuri 20 muri 50 bamaze kuvuga ko mu gihe bagezwa imbere icyifuzo cyo gutera icyizere Trump bagitorera. Kugira ngo ingingo itambuke muri Sena ya Amerika, igomba gutorerwa na bibiri bya gatatu by’abasenateri, kandi abo 20, kongeraho Aba-democrates 50 basanzwe muri Sena, baba bahagije kugira ngo umwanzuro wemezwe.

Umuyobozi w’Aba-Republicains muri Sena ya Amerika, Mitch McConnell yabwiye inshuti ze ko yashimishijwe n’icyemezo cy’Aba-democrates cyo gushyiraho amatora yeguza Trump. Kimwe n’abandi bayobozi bo hejuru b’ishyaka, McConnell atekereza ko ibikorwa bya Trump byatumye ishyaka ryabo muri rusange rigibwaho igisebo gikomeye, ndetse ngo akeka ko iri shyaka ryakabaye ryaregukanye imyaka ibiri y’abasenateri iherutse gutsindirwa n’Aba-Democrates muri Leta ya Georgia iyo badakozwa isoni na Trump n’abamushyigikiye.

Ikindi yishimira ni uko abadepite baramutse batoye gukuraho Trump, bashobora no gushyiramo ingingo yo kumubuza kuzongera kwiyamamaza, bityo bigatuma atazabikora mu matora ya Perezida mu mwaka wa 2024. Ibyo byatuma ishyaka ryabo ryongera kwisuganya, kandi rigahindura isura mbi ryambitswe na Trump.

Mu minsi ye ya nyuma y’irungu ryatewe no gukumirwa n’imbuga nkoranyambaga, Perezida Trump ari kuyikoresha asura ibikorwa bikomeye atekereza ko yagezeho, akabigira urwibutso azahora yibukirwaho n’Abanyamerika.

Kuri uyu wa Kabiri, uyu mugabo yasuye urukuta ruri hagati ya Amerika na Mexique yubakishije, aho yavuze ko “nta ruhare” yagize mu bikorwa by’imyigaragambyo yabereye ku Ngoro y’Inteko Ishinga Amategeko’, ati “ndifuza amahoro”.

Hagati aho, Urwego rw’Iperereza rwa Amerika, FBI, rwatangaje ko umunsi umwe mbere y’imyigaragambyo, rwari rwabonye inyandiko ziyitegura, zari zirimo guhererekanywa na bamwe mu bayigizemo uruhare. Muri izo nyandiko, harimo amakarita agaragaza imiterere y’Ingoro ndetse n’inzira zayo zo munsi y’ubutaka.
Ibi bisobanuye ko Trump ashobora kuba yari azi iby’iyo myigaragambyo kuko bigaragara ko yateguwe mu buryo bwitondewe.

FBI yatangiye iperereza aho abarenga 170 bamaze gufungwa, harimo n’abashobora guhanishwa imyaka igera kuri 20 igihe bahamwa n’ibyaha. Umukwabu wo gushaka buri wese wagize uruhare muri iyo myigaragambyo nawo urakomeje mu gihe kandi inzego z’umutekano zivuga ko ziryamiye amajanja mu gukumira indi myigaragambyo karundura iri gutegurwa mbere y’uko Biden arahirira kuyobora Amerika ku wa 20 Mutarama.

Ibikorwa bya Trump byatumye atererwa icyizere n'abo mu ishhyaka rye, ku buryo bashyigikiye icyifuzo cya kumweguza
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza