IGIHE

Israel n’ibihugu by’Abarabu basinyanye amasezerano y’amahoro

0 16-09-2020 - saa 09:55, Ndahayo Emmanuel

Israel n’Ubwami bwa Leta Zunze Ubumwe z’Abarabu (UAE) ndetse n’ubwami bwa Bahrain, byasinyanye amasezerano y’amahoro nyuma y’imyaka myinshi ibi bihugu bitumvikana.

Ni amasezerano y’amateka, yasinywe na Benjamin Netanyahu, Minisitiri w’intebe wa Israel na ba Minisitiri b’Ububanyi n’Amahanga ba UAE na Bahrain, ahagarariwe na Perezida Donald Trump wa Leta Zunze Ubumwe za Amerika.

Aya masezerano agena ko mu guteza imbere umubano hagati y’ibihugu byombi, impande zombi zizafungura ambasade mu kindi gihugu, iyo ikaba intangiro yo gutangira imibanire izibanda ku mutekano, ubucuruzi, ubukerarugendo, ingendo zo mu kirere, ubuzima, ikoranabuhanga n’ibindi bitandukanye.

Kugira ngo aya masezerano ashyirwe mu bikorwa, bivugwa ko Israel yasabwe guhagarika umugambi yari ifite wo kubaka ku butaka ibihugu byinshi by’Abarabu bifata nk’ubwa Palestine.

Ku rundi ruhande, bivugwa ko UAE yasinye aya masezerano nyuma yo kwemererwa na Amerika kuzagurishwaho indege kabuhariwe z’intambara zizwi nka F-35s.

Trump yavuze ko aya masezerano ari intangiriro y’umubano mwiza hagati ya Israel n’ibindi bihugu by’Abarabu, bisanzwe birebana ay’ingwe na Israel kubera icyo byitwa ‘kwigarurira ubutaka bwa Palestine’.

Yagize ati “Bagiye gukorana, ubu babaye inshuti. Hari n’ibindi bihugu [by’abarabu] bizakurikiraho mu minsi iri imbere”.

Jared Kushner, Umujyanama Mukuru wa Perezida Donald Trump, ni umwe mu bakurikiranye cyane ibiganiro biganisha kuri aya masezerano. Bikekwa ko yifashishije Iran, yagaragarije ibihugu by’Abarabu ko kwifatanya na Israel byarushaho kubaha ingufu zo guhangana na Iran, kuko ari nayo iteje ikibazo nyamukuru mu karere k’Uburasirazuba bwo Hagati.

Hari kandi abavuze ko mu gihe amatora ya Perezida yegereje muri Amerika, Trump yahisemo ko aya masezerano ashyirwaho umukono mu rwego rwo kwerekana ko ku rwego mpuzamahanga, hari ikintu ubuyobozi bwe bwakoze gikomeye, ibishobora kuzamwongerera amahirwe yo kuzatsinda amatora, dore ko asangwanywe amanota macye ugereranyije n’uwo bahanganye, Joe Biden.

Israel yari isanganywe umwuka mubi n’ibihugu by’Abarabu, ndetse yagiye anateza intambara mu bihe bitandukanye. Igihugu cya Misiri na Jordan ni byo byonyine byari bisanganywe umubano uri ku rwego rwo hasi na Israel, ariko ibi bikazahinduka mu gihe ibindi bihugu by’Abarabu byasinya amasezerano nk’aya y’ubufatanye hagati yabyo na Israel.

Muri White House hari abashyitsi batumiwe barenga 800, barimo na Ambasaderi w’u Rwanda muri Amerika, Mathilde Mukantabana.

Aba bayobozi ni bo basinye aya masazerano y'amateka hagati ya Israel, UAE na Bahrain
Ambasaderi Mathilde Mukantabana yari ahagarariye u Rwanda muri uyu muhango
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza