IGIHE

Umunyamabanga Mukuru wa FPR Inkotanyi yagiranye ibiganiro na Ambasaderi w’u Burusiya mu Rwanda

0 15-04-2021 - saa 21:11, Akayezu Jean de Dieu

Ambasaderi w’u Burusiya mu Rwanda, Karén Chalyan, yasuye Umunyamabanga Mukuru w’Umuryango FPR Inkotanyi, François Ngarambe bagirana ibiganiro byagarutse ku mubano w’ibihugu byombi.

Ambasaderi Karén Chalyan wari uherekejwe n’Umuyobozi Wungirije muri Ambasade y’u Burusiya, Dr Dr. Mikhail D. Nikitin baganiriye na na Ngarambe kuri uyu wa kane tariki 15 Mata 2021, ku cyicaro gikuru cya FPR Inkotanyi giherereye I Rusororo mu Karere ka Gasabo.

Ambasaderi Karén yashimye umubano mwiza n’ubufatanye buri hagati y’ibihugu byombi ndetse yiyemeza ko igihugu cye kizakomeza guharanira guteza imbere inyungu z’ibihugu byombi.

Ambasaderi Karén yashimye iterambere ry’u Rwanda anagaragaza ko yifatanije n’Abanyarwanda mu gihe bibuka ku nshuro ya 27 Jenoside yakorewe Abatutsi mu 1994.

Umunyamabanga Mukuru w’Umuryango FPR Inkotanyi, Ngarambe yashimiye Ambasaderi Karén Chalyan kuba yarifuje kumusura anizeza ko FPR nk’ishyaka riri ku butegetsi izakomeza gushyigikira iterambere ry’umubano w’ibihugu byombi.

Ngarambe yashimangiye akamaro k’umubano wihariye hagati y’amashyaka ari ku butegetsi bw’ibihugu byombi (FPR Inkotanyi n’Ishyaka ry’Ubumwe bw’Abarusiya), avuga ko ari ishingiro ry’umubano mwiza ibihugu byombi byishimira.

Yijeje ko impande zombi zizakomeza uwo mubano mwiza.

U Rwanda n’u Burusiya bisanzwe bifitanye umubano mwiza ndetse ibihugu byombi bifitanye ubufatanye mu ngeri zitandukanye zirimo uburezi cyane zibanda ku bushakashatsi mu bijyanye n’ikoranabuhanga, gukora imiti nkenerwa kwa muganga, ibitaro no kubaka umubano hagati ya Kaminuza zaho n’iy’u Rwanda (UR).

Umubano ushingiye ku burezi uteye imbere kuko hari abashakashatsi mu by’ibinyabuzima bo muri Kaminuza z’u Burusiya baza gukora ubushakashatsi mu ishyamba rya Nyungwe, kuko hari ibimera n’indabo bisigaye gusa mu Rwanda.Bamaze kuza inshuro eshatu.

Ambasaderi w’u Burusiya mu Rwanda, Karén Chalyan n'Umunyamabanga Mukuru w’Umuryango FPR Inkotanyi, François Ngarambe bagiranye ibiganiro
Impande zombi zemeranyije gukomeza gushyigikira umubano no guharanira inyungu z'ibihugu byombi
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza