IGIHE

Plan International yashimiwe uruhare igira mu iterambere ry’uburezi bw’abana bato

1 8-11-2019 - saa 07:21, Iradukunda Serge

Minisiteri y’uburezi yashimiye Umuryango Plan International Rwanda,ku ruhare ugira mu gushyigikira gahunda z’uburezi cyane cyane ku bana bato zirimo no kubaka amarerero mboneza mikurire mu duce atarangwagamo.

Uruhare rw’uyu muryango mu iterambere ry’uburezi rwagarutsweho kuri uyu wa 7 Ugushyingo mu muhango wo guhemba abana basoje amashuri y’incuke wabereye mu karere ka Bugesera, Umurenge wa Kamabuye.

Umunyamabanga nshingwabikorwa w’umurenge wa Kamabuye Murenzi Jean Marie Vianney avuga ko uruhare rwa Plan international muri uyu murenge ari runini dore ko mbere y’uko bubakira amashuri abana b’incuke bo ku kigo cya Murago bigiraga munsi y’igiti.

Yagize ati “Ku manywa hari igiti bigiragamo noneho imvura yagwa bakajya mu cyumba cy’ishuri ribanza”.

Yongeyeho ko nyuma yo kubona ishuri babikesha Plan international ubu hari icyahindutse mu myigire y’abana . Ati “urebye uburyo bigiraga munsi y’igiti kinini imvura yagwa bakajya kubyigana n’abandi bana ariko ubu hari ibyumba byiza bafite bigiramo birimo ibikoresho bitandukanye, birashimishije”.

Kuri ubu ku kigo mbonezamikurire cya Murago abana bato biga neza ndetse abagera ku 196 barimo abakobwa 101 n’abahungu 85 bakaba basoje icyiciro cy’amashuri y’incuke.

Umuyobozi mukuru ushinzwe iteganyamigambi ry’uburezi muri Minisiteri y’Uburezi, Rose Bagume, yavuze ko bashima ibyo Plan International ikora kuko ubusanzwe biri mu nshingano za Minisiteri y’uburezi.

Yagize ati“Plan international dufitanye amasezerano y’ubufatanye nka Minisiteri y’uburezi, kubaka ibyumba by’amashuri, kumenya abanyeshuri ubundi ni inshingano zacu ariko ku bufatanye bwabo (Plan International) n’urukundo bafitiye aba bana n’igihugu muri rusange baraje baradufasha”.

Bagume kandi yibukije ababyeyi ko bagomba kugira uruhare mu burezi bw’abana babo cyane cyane ab’incuke babajyana muri ibi bigo mbonezamikurire.

Kuri ubu abana basoje icyiciro cy’amashuri y’incuke ni abo mu bigo mbonezamikurire bya Murago, Biharagu, Kampeka na Tunda byose biherereye mu murenge wa Kamabuye.

Gahunga Emmanuel, umwe mu babyeyi bafite abana muri iki kigo mbonezamikurire cya Tunda, yavuze ko aya marerero yaje ari ingirakamaro kuko mbere batabonaga aho basiga abana babo igihe bagiye mu mirimo ya buri munsi.

Umuyobozi wa Plan international mu Rwanda, Mutero William,yavuze ko bahisemo kwita ku bana kuko ari bo Rwanda rw’ejo.

Ati “ibyo dukora aha ni ukugira ngo twizere ko igihugu kiri mu maboko meza tubinyujije mu gushyira imbaraga mu kwita ku bana, Plan international twizera ko iyo gushyira imbaraga mu bana ari amahitamo meza”.

Plan international yibanda mu kuzamura imibereho y’abana ariko bigizwemo uruhare n’ababyeyi nk’aho bashobora kwitekera igikoma abana banywa ndetse bagatanga n’amafunguro barya igihe bari ku bigo mbonezamikurire nk’uko byatangajwe n’umuyobozi wa gahunda yo kuzamura ireme ry’uburezi na gahunda mboneza mikurire y’abana bato muri Plan International Valens Kiberwa Adam.

Umuryango wa Plan International watangiye gukorera mu Rwanda muri 2007 kuri ubu ukaba ukorera mu karere ka Gatsibo, Bugesera na Nyaruguru aho wubatse ibigomboneza mikurire 46 ndetse ukaba utera inkunga n’ibindi ibikorwa bitandukanye bigamije imibereho myiza y’abaturage.

Ku kigo mboneza mikurire cya Murago cyubatswe na Plan International hari uturima tw'igikoni dufasha abana kurya indyo yuzuye
Mbere y'uko Plan International yubaka ikigo mbonezamikurire cya Murago, abana bigiraga munsi y'ibi biti
Kuva aya marerero yaza byafashije ababyeyi kubona umwanya wo gukora indi mirimo
Igihe abana bari mu bigo mbonezamikurire ababyeyi bavuga ko babona umwanya wo gukora indi mirimo neza
Rose Bagume yashimye uruhare rwa Plan International mu guteza imbere uburezi mu Rwanda
Umunyamabanga Nshingwabikorwa w’umurenge wa Kamabuye, Murenzi Jean Marie Vianney avuga ko aho baboneye aya mashuri imyigire y'abana yahindutse
Umuyobozi mukuru ushinzwe iteganyamigambi ry’uburezi muri Mineduc, Rose Bagume yerekwa kimwe mu byumba by'ishuri byubatswe na Plan International
Umuyobozi wa Plan international mu Rwanda Mutero William avuga ko ejo heza h'u Rwanda hagomba guhera mu kwita ku bana
Abana barangije muri aya marerero mbonezamikurire basuhuza abayobozi nyuma yo guhembwa
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Celine 2019-11-08 14:23:16

Waou byiza cyane.congratulation ku bana.
Tubigurije amasomo meza no kugomeza gutsinda.
Barashimishije cyane.

Kwamamaza