IGIHE

1989: Akagambane kagiriwe Muvara wari wagizwe Musenyeri wa Butare, akeguzwa abura iminsi ibiri ngo yimikwe

0 30-07-2020 - saa 07:27, IGIHE

Kuwa 24 Werurwe 1989 saa yine n’igice z’amanywa zo kuwa Gatanu Mutagatifu, Padiri Félicien Muvara yashyikirije Papa Yohani Paul II ibaruwa y’ubwegure bwe nka Musenyeri wungirije wa Diyosezi ya Butare.

Ni ibaruwa Muvara yatanganye agahinda gakomeye habura iminsi ibiri ngo yimikwe nyuma yo kugambanirwa n’abihayimana bagenzi be n’abanyapolitiki batifuzaga ko ajya kuri uwo mwanya ahanini hashingiwe ku bwoko bwe.

Mu Ukuboza 1988 nibwo Papa Yohani Paul II yari yagize Padiri Félicien Muvara igisonga cya Musenyeri wa Diyosezi ya Butare, yungiriza Musenyeri Gahamanyi Jean Baptiste.

Muvara yahawe izo nshingano nyuma yo kuba Umunyamabanga Mukuru w’Inama y’Abepisikopi gatolika mu Rwanda.

Yaragambaniwe, yitwa umusambanyi

Musenyeri Muvara yari umututsi. Umwanya yari ahawe nawo yari agiye kuwungirizaho Musenyeri Gahamanyi w’Umututsi.

Bivugwa ko ubwo butumwa butakiriwe neza mu butegetsi bwari buyobowe n’abahutu. Byongeye kuba abo bihayimana bari bagiye kuyobora ibice bya Butare byari bizwiho kudashyigikira cyane Perezida Habyarimana, byabaye urundi rwitwazo rwongera urwikekwe mu butegetsi, bashaka icyatuma Muvara ataguma kuri uwo mwanya.

Igitabo The Teaching of History of Rwanda, a Participatory Approach, kivuga ko mu batumye Musenyeri Muvara wari ufite imyaka 50 yeguzwa harimo Josephine wari umugore wa Col Nsekalije Aloys wari Minisitiri w’amashuri abanza n’ayisumbuye.

Josephine ngo yari aziranye na Padiri Charles Bizumuremyi wari Umuyoozi Mukuru ushinzwe Uburezi muri Kiliziya Gatolika, akaba Umuhenzanguni w’Umuhutu wari ufitanye isano n’umuryango wa Perezida Habyarimana. Bizumuremyi n’ubusanzwe ngo yangaga Padiri Muvara.

Bizumuremyi yahimbye amakuru y’uko Muvara afitanye umwana n’umugore witwa Veronique Nyirandegeya, bityo ko adakwiriye kuba Musenyeri. Ayo makuru amaze kugera kuri Josephine, yayagejeje ibukuru bisakara muri Guverinoma.

Padiri André Sibomana wigeze kuyobora Kinyamateka, ni undi muntu utarajyaga imbizi n’ishyirwaho rya Musenyeri Muvara, yumvise ibishinjwa Muvara arabikuririza.

Ngo Sibomana yasuye Musenyeri Ruzindana wayoboraga Diyosezi ya Byumba akanayobora Inama Nkuru y’Abepisikopi Gatolika mu Rwanda, amwumvisha uburyo Muvara afite umwana yabyaranye n’umugore bityo adakwiriye kuba Musenyeri. Bivugwa ko na Musenyeri Ruzindana ku giti cye atakundaga Muvara ku buryo izamurwa rye mu ntera atari aryishimiye.

Ibyo kandi ngo byamenyeshejwe Musenyeri André Perraudin wari Visi Perezida w’Inama Nkuru y’Abepisikopi Gatolika mu Rwanda.

Ruzindana yagiye kugisha inama mubyara we Colonel Bagosora ngo bashake uburyo bitambika muri dosiye ya Muvara. Bagosora amaze kubyumva yabigejeje kwa Perezida Habyarimana, abanza kwanga umugambi wo kweguza Muvara kuko yumvaga bishobora kuzavumburwa.

Byageze aho umuyobozi mukuru w’iperereza yigira mu biro kwa Habyarimana, amuhamiriza ko iperereza bakoze basanze Muvara yarabyaye umwana kandi ko inkuru ari kimomo mu baturage ndetse na Nyirandegeya uvugwaho kubyarana na Muvara yahawe amafaranga arabyemeza.

Habyarimana yasabye ko bategura inama agahura na Musenyeri Vincent Nsengiyumva wari Arkiyepisikopi wa Kigali na Musenyeri Ruzindana.

Perezida Habyarimana ku rundi ruhande yahise ategeka Jacques Maniraguha umucuruzi wigeze kuba umudepite gukurikirana icyo kibazo akamenya ukuri kwacyo no gufatanya na Kiliziya kumenya ukuri. Maniraguha yahuye n’umucuruzi w’Umubiligi witwaga ‘Jef’ kugira ngo abafashe kumvisha umupadiri w’umubiligi wavugaga rikijyana mu bapadiri bera witwaga Vanderborght, maze ashyigikire ikinyoma bari bahimbye.

Padiri Muvara yaragambaniwe yeguzwa ku ngufu ku mwanya w'Igisonga cya Musenyeri wa Butare abeshyerwa ko yabyaye umwana

Vanderborght na Padiri Joseph Vleugels bandikiye intumwa ya Papa mu Rwanda bayimenyesha ko basanze Muvara yarasambanye akabyara umwana hanze, bityo adakwiriye kuba Musenyeri kuko byaba ari icyasha kuri Kiliziya.

Ambasaderi w’u Burundi mu Rwanda yashatse kubyinjiramo ngo arenganure Muvara ariko mu biro by’Intumwa ya Papa mu Rwanda bamwumvisha ko amakuru afite atari yo.

Perezida Habyarimana yaje guhura na Musenyeri Nsengiyumva na Ruzindana, nabo bamubwira ko Muvara adakwiriye kuba Musenyeri kuko yabyaye hanze. Iyo nama yarangiye hafashwe umwanzuro wo gusaba Musenyeri Muvara kujya i Roma, agatanga ibaruwa y’ubwegure bwe kwa Papa.

Muvara ntiyabasuzuguye yarabyemeye ajya i Roma kwegura, gusa nyuma yandikiye Abasenyeri Gatolika ibaruwa ibagaragariza agahinda yatewe n’akagambane yakorewe abihayimana bakamwitaza. Yabamenyesheje ko atazigera yihimura kugira ngo adahindanya isura ya Kiliziya Gatolika.

Muvara amaze iminsi yeguye, byaje kumenyekana ko Veronique Nyirandegeya bamushinjaga kuryamana na we batigeze banahura. Uwo mugore na we ubwe yatanze ubuhamya buvuguruza ubwo yari yatanze mbere, avuga ko umwana bitirira Muvara atari uwe, ahubwo ari uw’umuganga w’Umurundi witwaga Batungwanayo.

Aho kwivuguruza no kuvana icyasha kuri Muvara, tariki 10 Gicurasi 1989, Musenyeri Perraudin n’uwari intumwa ya Papa mu Rwanda bandikiye Papa Yohani Paul II bamubwira ko ibyo Muvara ashinjwa aribyo, ko bidashingiye ku moko nk’uko byavugwaga.

Umunyamabanga wa Komisiyo y’Igihugu ishinzwe kurwanya Jenoside, Dr Jean-Damascène Bizimana, umwaka ushize yatangaje ko kugambanirwa kwa Muvara bigaragaza ingengabitekerezo ya Jenoside yari yaramunze bamwe mu bayobozi ba Kiliziya Gatolika mu Rwanda, ku isonga Musenyeri Nsengiyumva na Musenyeri Perraudin.

Yagize ati “ Kuba Vatikani yarashyizeho Padiri Muvara w’umututsi guhabwa ubusenyeri ngo azungirize Musenyeri Gahamanyi nawe w’umututsi, byabaye ikibazo gikomeye ku butegetsi bwa Habyarimana no muri bamwe mu bihaye Imana ba Kiliziya Gatolika bari barasabitswe n’ingengabitekerezo ya Jenoside, ku isonga harimo Musenyeri Perraudin na Musenyeri Vincent Nsengiyumva.”

“Aba basenyeri bombi bakoresheje ububasha bari bafite bahimbira Padiri Muvara icyasha gikomeye ku mupadiri cyo kumubeshyera ko yari afite umwana […] Abantu bose bazi kandi bamenye Nyakwigendera Padiri Muvara bemeza ko yari umupadiri w’intangarugero muri byose, utari ukwiye gukorerwa akagambane nk’akamukorewe; n’ubwo nta n’undi wese wagombye kugirirwa nabi mu buryo ubwo aribwo bwose.”

Padiri Muvara yishwe mu 1994 muri Jenoside yakorewe Abatutsi yiciwe i Butare ari Padiri mukuru wa Paruwasi katedrali ya Butare.

Dr Bizimana avuga ko Muvara yicishijwe n’abandi bapadiri bagenzi be batatu barimo Etienne Kabera, Tadeyo Rusingizandekwe na Martin Kabalira.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza