IGIHE

Amafoto 50 adasanzwe agaragaza ubukana bwa Coronavirus mu mfuruka zose z’Isi

2 2-04-2020 - saa 13:42, IGIHE

Isi irugarijwe cyane! Mu mfuruka zayo zose yashegeshwe n’icyorezo cya COVID-19 giterwa n’agakoko ka Coronavirus.

Ishami ry’Umuryango w’Abibumbye ryita ku Buzima (OMS) ryemeje ku wa 11 Werurwe 2020 ko Coronavirus ari icyorezo cyugarije Isi bitewe n’ubwiyongere bw’abayandura kuva yaboneka mu Bushinwa mu Ukuboza 2019.

U Bushinwa aho iki cyorezo cyatangiriye, hamaze kugaragara abantu banduye bangana na 82394, abapfuye 3316 mu gihe abakize ari 76426.

Ku Isi yose, Coronavirus imaze guhitana abantu 47 518, mu gihe abayanduye bagera ku 940 733, muri bo 196,217 barayikize.

Ni indwara ifite ubukana bukomeye ndetse ibihugu bikomeye ku Isi yabishegeshe bitewe n’ubwiyongere bw’abandura n’abahitanwa nayo. Bimwe byagize umutwaro ukomeye wo kwakira abarwayi benshi icya rimwe, abaganga barananiwe bikomeye ndetse nko mu Butaliyani batangiye kwitaba Imana.

Ku Mugabane w’u Burayi u Butaliyani buri mu bihugu byugarijwe kuko bufite abantu 110574 banduye mu gihe abapfuye ari 13155 naho abakize bakaba 16847.

Ikindi gihugu cyashegeshwe cyane ni Espagne yo ifite abanduye 104 118, abapfuye 9387 mu gihe abakize ari 22647. U Budage bwo bufite abanduye 77981, gusa abapfa bo ntabwo ari benshi kuko bamaze kuba 931 mu gihe abakize ari 18700.

Muri Afurika igihugu gifite ubwandu bwinshi ni Afurika y’Epfo ifite 1380 n’abantu batanu bapfuye mu gihe Algeria ifite ubwandu 847 mu gihe 58 aribo bamaze gupfa. Mu Rwanda, abamaze kubonekaho ubwandu bwa Coronavirus ni 82.

Ku Isi yose inkuru ziganje mu bitangazamakuru ni izijyanye n’ikwirakwira rya Coronavirus. Amashusho n’amafoto agaragaza ubukana bw’iyi ndwara. Nko mu Butaliyani na Espagne imodoka z’igisirikare zifashishijwe mu gutwara imirambo y’abahitanywe na Coronavirus.

Ibitaro byo mu Butaliyani byuzuyemo abarwayi ndetse hari ahatangiye gutekerezwa ko hakubakwa iby’ingoboka bizavurirwamo abagaragaweho Coronavirus.

Mu gihe abashakashatsi bakora ijoro n’amanywa bashaka umuti n’urukingo rwa Coronavirus, abaganga ni bo bahanzwe amaso kuko aribo batanga ubufasha mu kwita ku barwayi ba Coronavirus.

Nubwo iyi ndwara itarabonerwa umuti n’urukingo, kuri ubu havurwa ibimenyetso byayo birimo inkorora, ibicurane, uburibwe b’umutwe n’ibindi.

Ubwitange bwo kwita ku murwayi ugendana uburwayi bwatitije Isi ni ubutwari ndetse abaturage mu bihugu bitandukanye bafata umwanya wihariye wo gushimira abaganga bita ku barwayi ba Coronavirus.

Ingamba zikomeye zafashwe mu buryo busa n’ubuhuriweho mu bihe bya Coronavirus ni ukuguma mu rugo mu kwirinda ikwirakwira ry’iki cyorezo.

IGIHE yifashishije imbuga zitandukanye za internet yakusanyije amafoto 50 agaragaza ubukana bwa Coronavirus, ingamba zafashwe zo kwirinda n’ibindi.

Abakozi bo mu kigo gishyingura abantu, ubwo bihumanuraga bikuraho udukoko nyuma yo guhura n’umurwayi wa Coronavirus mu Bitaro byo mu Mujyi wa Wuhan mu Bushinwa
Abantu bari mu madirishya mu Mujyi wa Mumbai bakomera amashyi abaganga bita ku barwayi ba Coronavirus
Abantu bicara bategeranye nkuko bisabwa mu guhangana n'ikwirakwira rya Coronavirus. Aha ni ku wa 24 Werurwe 2020 ubwo bari bategereje amafunguro yo gutahana mu iduka ry'i Bangkok muri Thailand
Abantu muri Hong Kong ku wa 7 Gashyantare 2020 bitabiriye umuhango wo gushyingura umuganga Li Wenliang waguye muri Wuhan nyuma yo kwanduzwa Coronavirus n'umurwayi yitagaho
Abanyeshuri bo mu Ishuri rya Attarkiah Islamic School bambaye masks mu birori byabereye mu Ntara ya Narathiwat muri Thailand ku wa 17 Werurwe 2020
Abapolisi bahagarika umuvandimwe w'umwe mu mfungwa hanze ya Gereza ya Sant Anna iri muri Modena mu Butaliyani ku wa 9 Werurwe 2020. Imyigaragambyo yatangiye kwaduka nyuma yo kubona ko Coronavirus iri gukwirakwira cyane
Abarwayi ba Coronavirus bari bashyizwe ahavurirwa abarembye cyane mu Majyaruguru y'u Butaliyani
Abarwayi babaye benshi mu Butaliyani no mu bindi bihugu by'i Burayi biha abaganga akazi kenshi
Abashinzwe umutekano mu Mujyi wa Quetta muri Pakistan bagenzura uko amabwiriza yo kutava mu rugo yubahirizwa mu mihanda
Abasirikare batera imiti yica udukoko mu mihanda yo mu Mujyi wa Seoul
Itsinda ry'abatabazi rishaka imibiri y'abaguye mu nyubako ya hoteli yo mu Mujyi wa Quanzhou mu Bushinwa ku wa 8 Werurwe 2020. Iyi hoteli yakoreshwaga nk'ikigo gishyirwamo abantu bari mu kato ka Coronavirus
Aha ni mu Butaliyani. Abaganga bari batwaye uwaketsweho Coronavirus mu bitaro byo mu Mujyi wa Roma
Ibihugu byinshi bigira abahitanwa na Coronavirus biterwa ahanini n'abarwayi baba benshi kubitaho bikagorana
Ibihumbi by'abantu bashaka kwinjira mu iduka ry'i California ku wa 14 Werurwe 2020 ubwo birukankiraga guhaha ibyo kurya n'ibindi bikoresho nkenerwa mu buzima bwo kuba mu rugo
Ibitaro byubatswe bwangu ahazwi nka Central Park muri New York City ku wa 30 Werurwe 2020 ngo bifashe mu kwita ku barwayi ba Coronavirus
Ifoto yafashwe ku wa 5 Gashyantare 2020 igaragaza ikibumbano cyambitswe mask mu Mujyi wa Beijing mu Bushinwa. Ni ubutumwa bwerekanaga ko hakenewe kwita kuri izi ngamba
Ifoto yafashwe n’umuganga igaragaza imirambo y’abarwayi ba Coronavirus imbere mu mbangukiragutabara hafi y’Ibitaro byo muri New York City ku wa 29 Werurwe 2020
Imodoka y'Igisirikare cya Venezuela igenda itera imiti yica udukoko mu gace ka Caracas ku wa 27 Werurwe 2020
Imodoka za gisirikare nizo ziri kwifashishwa mu gutwara imirambo mu bihugu birimo u Butaliyani
Imodoka z’Igisirikare cy’u Butaliyani zigera mu gace ka Bergamo zitwaye imirambo y’abahitanywe na Coronavirus ku irimbi rya Ferrara aho imibiri yatwikiwe nyuma yo gusezerwaho ku wa 21 Werurwe 2020
Isanduku zashyizwemo imirambo y'abishwe na Coronavirus yabitswe i Ponte San Pietro mu Butaliyani mbere yo kwimurirwa aho yabombaga gutwikirwa
Itsinda ry'abaganga ritwaye umurwayi wa Coronavirus mu Bitaro bya Queen Elizabeth muri Hong Kong
Iyi foto yafashwe mu kirere igaragaza Ibitaro bya Leishenshan byubatswe mu Mujyi wa Wuhan byo kwita ku barwayi ba Coronavirus
Ku wa 17 Gashyantare 2020 abarwayi ba Coronavirus baruhukiye muri Wuhan Sports Center yari yahinduwe ibitaro mu kubitaho
Ku wa 21 Werurwe 2020 mu gace ka Bergamo mu Butaliyani umuntu yashyinguwe abagize umuryango we badahari
Abaganga bo mu Mujyi wa Wuhan bafashe amafoto berekana inkovu mask z'ubwirinzi zasize ku masura yabo
Abaganga bo mu Mujyi wa Wuhan mu Bushinwa mu byishimo nyuma y'uko abarwayi ba Coronavirus bari bamaze kuvanwa mu bitaro ku wa 9 Werurwe 2020
Abaganga bo muri Cheongju muri Koreya y'Epfo bagenzura udukoresho twifashishwa mu gusuzuma Coronavirus ku wa 27 Werurwe 2020
Abaganga ni bo bahanzwe amaso ngo bakize Isi yatitijwe na Coronavirus
Abagenzi babiri batembera mu Mujyi wa Wuhan. Aha hari ku wa 27 Mutarama 2020 ubwo abawutuye bari bageze ku munsi wa kane hatanzwe ibwiriza ryo kutava mu rugo
Ku wa 22 Mutarama 2020 abakozi bo mu Mujyi wa Handan mu Bushinwa bakora masks n'ibindi bikoresho by'ubwirinzi byabuze ku isoko mu duce tumwe na tumwe
Ku wa 24 Mutarama nibwo hatangiye ibikorwa byo kubaka ibitaro byihariye byo kwita ku barwayi mu Mujyi wa Wuhan
Ku wa 27 Werurwe 2020 Papa Francis yasengeye muri Basilica ya St Peter's itarimo abantu
Abaturage bo muri Leta Zunze Ubumwe za Amerika na bo bugarijwe na Coronavirus
Mu Bushinwa usibye inkovu, abaganga babaga banagaragazaga umunaniro mwinshi cyane
Mu Butaliyani abaganga barananiwe bitewe no kwita ku barwayi benshi cyane
Mu Butaliyani abaganga bari ku gitutu bitewe n'ubwiyongere bw'imfu za hato na hato z'abahitanwa na Coronavirus
Mu Butaliyani inzego z'umutekano zitabajwe mu gutwara abahitanywe na Coronavirus
Mu Mujyi wa Manchester mu Bwongereza hashyizweho ibyapa biburira abagenda mu muhanda kuguma mu rugo mu kwirinda ikwirakwira rya Coronavirus
Mu Mujyi wa Roma mu Butaliyani abantu bumvise misa yo ku wa 29 Werurwe 2020 bari mu ngo zabo
Muri Iran abatera imiti babanza kwambara ku buryo bubarinda neza
Abarwayi ba Coronavirus mu Butaliyani barembye bikomeye bashyirwa mu byumba byabugenewe
Ntuzabigerageze! Abakundana basomana ubwo basezeranaga berekeje mu biruhuko by'ibirori by'umwaka mushya bizwi nka Lunar New Year i Beijing ku wa 24 Mutarama 2020
U Butaliyani buri mu bihugu byazahajwe na Coronavirus mu bihugu by'i Burayi
Uko bamwe mu barwayi batwarwa mu Butaliyani mu gihe bajyanywe mu cyumba bakenera kwitabwaho cyane
Umuganga agerageza kuruhuka mu Bitaro bimwe byo mu Mujyi wa Wuhan ku wa 16 Gashyantare 2020
Umuganga wo mu Mujyi wa Cremona mu Butaliyani yagaragazaga ko afite umunaniro ukabije ndetse bamwe batangiye kwandura Coronavirus
Umukozi atunganya ahantu hashyirwa abarwayi bari mu kato mu kigo kiri mu gace ka Guwahati mu Buhinde. Ifoto yafashwe ku wa 28 Werurwe 2020
Umukozi muri Minisiteri y'Imibereho myiza muri Dominican atera imiti ihangana n'udukoko dutandukanye mu nzira iri Santo Domingo
Umusirikare asuzuma umuriro w'umwe mu bashoferi bo mu Mujyi wa Wuhan ku wa 23 Mutarama 2020
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
diego 2020-04-03 08:10:48

Ese kuki mu Rwanda bo baterekana aharwariye arwayi rusange ba covid - 19
Bakerekana batatu gsa barwariye muri vip

2
hangi 2020-04-02 08:20:12

Ntangiye kugira ubwoba!!!

Kwamamaza