IGIHE

Ubuhamya bwa Uguyeneza warwaye agahinda gakabije akajya ahabwa inkwenene na bamwe mu nshuti ze

0 19-02-2021 - saa 21:32, Uwiduhaye Theos

Bamwe barwara agahinda gakabije “Depression” ntibabimenye cyangwa se bakabimenya batinze kuko atari ibintu wahita wiyumvamo cyangwa se ubimenye ako kanya kuko uba wumva ari ubuzima wabayemo cyangwa ubayemo bwatumye umera gutyo!

Ariko, siko biri ahubwo ni indwara nk’izindi kandi iravurwa igakira. Ibiranga ufite ubu burwayi ndetse n’ubundi bujya gusa nkabwo harimo ukugaragaza impinduka mu myitwarire, imyifatire, imitekerereze bikaba byanagira ingaruka mu bikorwa umuntu yakoraga mu buzima busanzwe cyangwa mu busabane yagiranaga n’abandi.

Umuganga w’Inzobere mu kuvura indwara zo mu Mutwe, Kanyandekwe Dr Simon, yigeze kubwira IGIHE ko izi ndwara ziterwa n’uruhererekane rw’impamvu nyinshi.

Ati “Ziterwa n’uburyo ubwonko bw’umuntu bwaremwe [nta budahangarwa], akenshi usanga bavuga ko umuntu ashobora kurwara kurusha abandi. Uko umuntu yabayeho mu muryango akomokamo cyangwa aho yakuriye, ibibazo yahuye nabyo akiri umwana [nk’ihungabanga] n’imibereho y’umuntu aho asanzwe aba byaba mu muryango cyangwa n’ahandi.”

Uguyeneza Alliah ni umwe mu bagize uburwayi bwa ‘Depression’ ndetse abubana igihe kinini biturutse ku kuba yarakuze adafite se ndetse nta rukundo rw’ababyeyi babiri yigeze yerekwa.

Mu kiganiro yagiranye na 1K Studio, uyu mukobwa wiga Amategeko muri kaminuza yagaragaje uko yagize ubu burwayi n’uko yabukize.

Uguyeneza yavukiye mu muryango w’abana batatu ni imfura ariko ntabwo yigeze agira amahirwe yo kubana na se.

Ati “Nabuze papa nkiri muto, ntabwo nigeze ngira ayo mahirwe y’uko hari umuntu wabiganiriza, ni ibintu byasabye uko ngenda nkura mbona ko hari ikibura ko nabuze umubyeyi.”

Akomeza avuga ko bitajyaga bimutera ikibazo akiri umwana, ariko uko yagiye akura bikaba byaragiye nabyo bikura kugera aho bimubanye byinshi cyane akajya yigunga.

Ati “Ntabwo byajyaga bintera ikibazo cyangwa se ngo mbyiteho mbere ariko iyo uri umwana urakura ugatangira kubona ibintu runaka. Gusa uko nagiye nkura najyaga ku ishuri abandi bana bakambaza ngo twirirwa tukubona mama wawe akuzana, Papa wawe arihe? Ntabwo nigeze ngira imbaraga zo kubwira bagenzi banjye ko data yapfuye. Narababwiraga nti muzamubona.”

Yemeza ko ibi bintu iyo aba yarabivuzeho bitari kumugendekera uko byagenze ahubwo byari kuba byiza mu buzima bwe akanabyakira ariko akavuga ko byamwangije cyane akiri muto.

Uyu mukobwa avuga ko yarwaye ihungabana ari mu mashuri yisumbuye yaba ari kumwe na bagenzi be we akaba ari kwitekerereza ibindi ku ruhando bitandukanye ni byo barimo.

Ati “Narwaye ihungabana ndi mu mashuri yisumbuye naba ndi kumwe na bagenzi banjye nkitekerereza ibindi bitandukanye n’ibyo bari kuvuga, nkisanga ndi njyenyine. Agahinda gakabije kwirirwa urira. Ukumva ko agahinda kawe karuta ak’abandi. Kandi iyo urwaye agahinda uba wumva abandi bari mu Isi bari mu munezero.”

Akomeza avuga ko abantu batangiye kujya bavuga ko adakunda kuvuga kandi ari ukubera agahinda ariko batazi ko ari ko. Yarabyukaga buri munsi akumva adashaka guhura n’abantu ahubwo ashaka kubaho wenyine kandi nabwo akirirwa.

Ati “Naje kubimenya bitewe n’uko nabonaga abandi. Hari ukuntu abandi bagira agahinda cyangwa amarangamutima ariko bikarangira. Ariko njye amarangamutima yarivangaga cyane ukabona umunota umwe urishimye ariko utishimye mu by’ukuri ahubwo ari ukugira ngo wiyibagize ibyo uri gucamo.”

Avuga ko agahinda ke katangiye gukura ubwo yari ageze mu mashuri yisumbuye kuko akiri umwana nabwo yari agafite ariko katarakura cyane nk’uko byaje kugenda nyuma.

Ati “Agahinda kanjye katangiye gukura cyane ngeze mu mwaka wa mbere w’amashuri yisumbuye. Ahantu nigaga kwiyandikisha wasangaga ababyeyi bose bazanye umwana nkihagera muri uko kwiyandikisha ninjye njyenyine wari uri kumwe n’umubyeyi umwe. Abantu bakajya bambaza ngo twabonye mama wawe turashaka kubona na papa wawe ariko batazi ko ari ibintu binkora ku mutima.”

Avuga ko akiri umwana yarakazwaga n’ibintu bito, ibi nabyo bikaba ari ibintu yaje kumenya ko byari kimwe mu bimenyetso by’ubu burwayi. Ngo yagiye kwiga mu mashuri yisumbuye biba ibindi bibazo kubera ko yaganirizwaga n’abandi bamubaza ikibazo yaza kugitekerezaho nyuma akarira.

Yatangiye kwiyumvamo ubu burwayi inshuti ye ya mbere abibwiye imugira umusazi biramubabaza cyane, ariko ntiyacika intege abibwira undi mugenzi we.

Ati “Hari inshuti yanjye natangiye mbibwira aba arasetse. Arambwira ngo niba urwaye agahinda urumva twebwe turwaye iki? Icyo gihe byarambabaje cyane. Nyuma nabwiye indi nshuti yanjye ko nshobora kuba ndwaye agahinda. Yampuje n’umuvandimwe we wari inzobere mu kugira inama abantu barwaye agahinda aramfasha, nyuma nza gukira. Numvaga atari ibintu nkeneye nanjye nabyiganiriza ariko iyo ufite umuntu ubwira biba byiza.”

Arakomeza ati “Maze kugirwa inama ni bwo narebye ku bintu nanyuzemo nkumirwa. Nkirangiza icyo gihe cy’agahinda kababaje naratekerezaga nti iyo ngira umuntu wanganirije nkiri muto ntabwo byari kugenda gutya.”

Agira inama abantu barwaye agahinda kujya batobora bakabivuga kuko biba byiza kandi bikabafasha guhita bakira mu buryo bworoshye.

Uguyeneza Alliah afite imyaka 19. Yari mu bakobwa 11 bahataniye ikamba rya Miss Supranational uyu mwaka ariko yatangajwe muri batatu batabashije gukomeza mu kindi cyiciro.

Nyuma yo kugirwa inama, Uguyeneza Alliah yakize agahinda gakabije
Uyu mukobwa yarwaye agahinda nyuma yaho se apfuye akiri muto
Uguyeneza Aliah ufite imyaka 19 yari ari mu bakobwa bitabiriye Miss Supranational uyu mwaka ariko ntiyabasha kugira amahirwe yo kugera kure
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza