IGIHE

Nyuma y’impanuka yamusigiye ubumuga, Rwampungu wakiniraga KBC yashinze ‘salon de coiffure’ (Amafoto)

0 19-04-2021 - saa 13:58, Eric Tony Ukurikiyimfura

Muri Werurwe 2015 ni bwo ikipe ya Kigali Basketball Club yakoze impanuka y’imodoka igiye gukina i Huye, Rutayisire Guy wayikiniraga yitaba Imana. Rwampungu Meshack ari mu bakomeretse cyane icyo gihe ku buryo agendera mu kagare kuko yavunitse uruti rw’umugongo. Kuri ubu, yahisemo gushinga ‘salon de coiffure’ i Remera kugira ngo agerageze kwiyubaka.

Rwampungu Meshack yari umwe mu bakinnyi beza bafite ahazaza muri Basketball y’u Rwanda, ariko inzozi ze muri uwo mukino zarangiye ubwo habaga iyo mpanuka yabereye mu Karere ka Kamonyi mu myaka itandatu ishize.

Yavunitse uruti rw’umugongo, ukuboko kw’ibumoso kwavunitse cyane ndetse n’imbavu zanatumye igihaha cye kigira ikibazo gikomeye, biba ngombwa ko abagwa. Agendera mu kagare mu gihe iyo bibaye ngombwa ko ava aho ari, agiye gukora urugendo rwisumbuyeho, bimusaba gukoresha imodoka yihariye kuko atatega moto cyangwa imodoka rusange.

Mu magambo ye, avuga ko ari “ubuzima buhenze, ariko Imana hari uko ibigenza umuntu agakomeza kubaho.”

Ubwo IGIHE yasuraga Rwampungu Meshack mu mpera z’icyumweru gishize, yamusanze aho yatangije ‘salon’ yogosha umusatsi abantu bakuru n’abana, i Remera, iruhande rw’ahazwi nko kuri ‘Contrôle Technique’, ahateganye n’ahari kubakwa hoteli ya FERWAFA.

Mu kiganiro yagiranye na IGIHE, Rwampungu yavuze ko amaze hafi imyaka ibiri atekereza kuri uyu mushinga ndetse yayimaze yogoshera abantu mu rugo mu rwego rwo kubyiyibutsa kuko yajyaga abikora akiri ku ishuri.

Ati “Gufungura hano ni ibyumweru bitatu bishize, ndi gutangira kubaka iki gikorwa, ariko igitekerezo cyo maze nk’imyaka ibiri nkifite kuko maze imyaka ibiri irenga nogoshera abantu bake mu rugo, ntabikora nk’ubucuruzi ahubwo ari ukugira ngo niyibutse gukoresha imashini yogosha.”

Yakomeje agira ati “ Kera najyaga mbikora, ariko mbikora mu buryo bwo kwinezeza kuko twogoshanyaga ku ishuri, ariko bitari iby’umwuga.”

Muri iyi ‘salon de coiffure’ ye, ubona ko hari byinshi bigikorwa, cyane ko imyanya yo kogosheramo kuri ubu ari ibiri gusa muri irindwi ishoboka.

Yavuze ko yagerageje gutangiza ubushobozi yari afite ndetse yizeye ko iki gikorwa kizagenda cyaguka.

Ati “Nk’uko ubibona ntabwo ari ukuvuga ngo usanze ‘business’ yuzuye 100%, igitekerezo nari ngifite nanategura gahunda yose y’ibikorwa n’ingengo y’imari, nasanze iyo nifuza iri ku mafaranga ari hejuru, mbona gutegereza ngo nzatangire byose maze kubibona, ntazigera ntangira.”

“Urabona ko hari ‘miroir’ ebyiri n’intebe imwe n’izindi ntebe z’abana zifite imodoka, ariko ndavuga nti reka mbigire gutya gahoro gahoro mu bushobozi mfite nzagenda mbyuka, ariko mbirimo. Icya mbere ni uko uwashaka kumenya aho Meshack akorerera, ansange hano, arebe uko bikorwa. Mu bushobozi buke mfite, murumuna wanjye amfasha kubishyira ku murongo, tukogosha bake bake.”

Rwampungu yavuze ko nyuma yo gukora impanuka akavunika umugongo, byabaye urugendo rukomeye kugeza ubwo kuri ubu yumva asa n’umaze kumera neza nubwo bikimusaba kujya kwa muganga kugira ngo bakomeze kumufasha gukira.

Ati “Nyuma yo kuvurwa, habayeho no kumenya ngo ‘gukira neza bikorwa gute?’, aho niho natangiye kwisobanukirwa, kwa muganga bakubwira ko ari ukugira ngo utangire kwigira, wifashe byinshi nubwo waba uri mu kagare, ndavuga nti ‘reka nshake n’ahava agafaranga’.”

Yakomeje agira ati “Nyuma y’impanuka ibintu biba ari bishya, umubiri uba ari mushya, kugendera mu kagare, gusunika, binsaba imbaraga nyinshi zikubye nanjye ntabasha gukora kuko ni ibintu bishya. Ureba uburyo abantu basanzwe birirwa biruka byanga, noneho ukirebaho wowe ukoresha igare ugasanga birikubye.”

Bamwe mu bamufashije kongera kwisuganya muri ubu buzima bushya harimo abo bahoze bakinana n’abo biganaga avuga ko bamubera abakiliya ndetse yizeye ko igikorwa cye kizatera imbere n’ashyigikirwa n’abandi bantu.

Ati “Hari abakinnyi ba Basketball twakinanaga, abanyeshuri twiganaga i Rwamagana, abo bose ni abantu bari hafi navuga narebaga nk’abakiliya banjye, bitavuze ko n’abandi babyumva baza kunshyigikira.”

“Nahise niyumvamo icyizere ko ari ibintu bishobora gushoboka kubera ko abantu bo barahari banshyigikiye, nubwo batari ku rwego rwo kuvuga ko banshyigikira ku mafaranga, ariko mu buryo bwo kuza kwiyogoshesha nayo ni inkunga ikomeye.”

Mu rwego rwo gukomeza kubaka umubiri we, Rwampungu agerageza gukora siporo ndetse ngo yari yatangiye gukina umukino wa Basketball y’Abafite ubumuga ‘Wheelchair Basketball’ mbere y’uko icyorezo cya COVID-19 kigera mu Rwanda.

Ati “Ni siporo ifasha, ririya gare uba wiziritse, ufunze, ni irya siporo ritandukanye n’aya tugenderamo, rifasha mu buryo bwo kwicara ugakomera igice cyo hejuru, umugongo ukagarura iriya mikaya uba waratakaje aho wavunikiye, imvune ikagenda igabanya ubukana. Muganga adutegeka ko buri munsi hari imyitozo mike dukora.”

Yasabye abagira ubumuga batewe n’impanuka cyangwa n’abandi babusanganywe kudacika intege kuko hari byinshi baba bagishoboye gukora.

Ati “Iyo ugize ibibazo nk’ibi hari ibyo uba udashobora gukora, ariko hari n’ibyo ushobora gukora, icyatumye ntacika intege ni ukwishakamo uko nakwigira ntabaye umutwaro ku muntu, nkishakamo ibisubizo. Mu mpanuka nakoze harimo byinshi by’ingenzi natakaje ariko si ko ibyo nari mfite byose byagiye kandi ibyo ngomba kubitanga byose.”

Rwampungu Mechack yize amashuri yisumbuye i Rwamagana muri Agahozo-Shalom Youth Village), akomereza mu ya kaminuza muri ULK (Kigali Independent University) aho yigaga Computer Science, akaba yarasozaga umwaka wa mbere.

Rwampungu kuri ubu ni kapiteni w’Ikipe y’Igihugu y’umukino wa Wheelchair Basketball. Nubwo uyu mukino umaze igihe gito utangiye, ari mu bagize uruhare mu iterambere ryawo.

Ukeneye kugira icyo wamufasha kugir ango akomeze indoto ze zo gutera imbere wamuvugisha kuri iyi nimero: 0784841728.

Rwampungu Meshack ari mu bakinnyi ba KBC bakoze impanuka muri Werurwe 2015 bagiye gukina i Huye
Yarwariye bikomeye mu Bitaro byitiriwe Umwami Faisal nyuma yo gukomereka
Rwampungu yari umwe mu bakinnyi batanga icyizere
Kuri ubu, Rwampungu Meshack yatangije 'salon de coiffure' yogosha abana n'abantu bakuru
Rwampungu Meshack yogosha umwana mu gihe we yicaye mu kagare kamufasha kuva hamwe ajya ahandi
Muri 'salon de coiffure' ye harimo intebe zifasha gutuma abana bogoshwa batuje
Meshack avuga ko yahisemo gutangira 'salon de coiffure' akazagenda ayagura uko azakomeza kubona ubushobozi
Umunyamakuru Ines Ghislaine muri 'salon de coiffure' ya Rwampungu Meshack
Hari abamufasha kogosha abakiliya abona muri iyi 'salon de coiffure'
Mbere yo gushinga 'salon de coiffure', Meshack yogosheraga mu rugo byo kwiyibutsa
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza