IGIHE

Uko Sr Murekatete yarokotse Jenoside abifashijwemo n’Umuryango w’Abenebikira abarizwamo (Video)

1 1-08-2020 - saa 10:44, IGIHE

Kimwe n’abandi barokotse Jenoside yakorewe Abatutsi mu 1994, Anne-Marie Beata Murekatete, umubikira wo mu Muryango w’Abenebikira afite ubuhamya burebure bw’uburyo yabayeho mu bihe by’ivanguramoko n’uko yaje kurokoka abifashijwemo na bagenzi be b’abenebikira babanaga.

Anne-Marie Beata Murekatete w’imyaka 69 ni umubikira mu Muryango w’Abenebikira ukorera i Save mu Karere ka Nyanza mu Majyepfo.

Sr Murekatete yabonye izuba mu 1951, avukira mu Murenge wa Ngera mu Karere ka Nyaruguru.

Mu mabyiruka avuga ko atabonaga ibintu by’ivanguramoko cyane kuko yari akiri muto kandi bitarakwira hose.

Mu buhamya bwe avuga ko ubwo yari arangije amashuri yisumbuye aribwo yatangiye guhura n’ibibazo by’ivangura kuko byanamubujije kujya muri kaminuza kandi yari abifitiye amanota.

Yagize ati “Ndangije ayisumbuye habaye ibintu bikomeye cyane, habaye ibyo bita Muyaga mu 1973 yarebaga abize amashuri n’abakozi b’Abatutsi ku buryo n’abo twabyirukanye benshi babigiyemo abigaga muri kaminuza barirukanwa n’abari mu mirimo.”

Yakomeje agira ati “Aha nari mukuru narabibonye kandi nanjye mbyangezeho kuko ntahawe icyo nari nkwiriye, abo narushaga amanota bemerewe gukomeza kaminuza njye sinemererwa.”

Nyuma yo kwimwa amahirwe yo gukomeza muri kaminuza, Sr Murekatete icyo gihe wari utarahitamo kwiha Imana yagiye gukora i Kibeho muri Groupe Scolaire Mère du Verbe Kibeho ari naho yafatiye umwanzuro wo kwiha Imana mu 1978 maze mu 1981 ahamya isezerano rwo kwinjira mu muhamagaro mushya.

Nyuma yo kwiyemeza gukorera Imana, yinjiye mu Muryango w’Abenebikira wamuhaye amahirwe yo gukomeza kaminuza, maze mu 1981 ajya kwiga mu yahoze ari Kaminuza Nkuru y’u Rwanda, aho yarangije mu 1986.

Muri iki gihe cyose Sr Murekatete avuga ko Abatutsi batotezwaga mu mashuri no mu kazi ko ariko iri vanguramoko ritigeze rigera mu muryango w’abenebikira abarizwamo.

Ati “Mu bihayimana nta byari bihari, mu muryango wacu nta byari bihari n’ikimenyimenyi nibo banyohereje kwiga ndetse njyana n’undi mugenzi wanjye w’Umututsikazi. Icyo gihe rero mu bihayimana nta vangura ryahabaga mu muryango wacu w’abenebikira buri wese bagiraga uko bamufata bigendanye n’icyo ashoboye, bakamuha n’ubutumwa bakurikije imirimo ikenewe n’ubushobozi abifitiye nta vangura nahaboneye.”

Nyuma yo kurangiza kwiga mu 1992, Sr Murekatete yahawe inshingano zo kuyobora ishuri riri i Save rya ‘Groupe Scolaire Sainte Bernadette’ ari naho Jenoside yasanze akora.

Kimwe n’abandi Batutsi benshi ibihe bya Jenoside ntibyoroheye Sr Murekatete dore ko yahigwaga n’umuntu bari bariganye.

Ati “Mu gihe cya Jenoside navuga ko banshakishaga kubera ko nari muri uwo mwanya ukomeye kandi hari icyabikajije umuntu wayoboraga ubwicanyi aho yari umugabo twiganye kuba nararokotse ni nk’igitangaza cy’Imana ariko cyaciye ku bantu.”

Sr Murekatete akomeza avuga ko uku kurokoka uyu mugabo wamuhigaga witwa ‘François Ndayisenga’ abikesha kuba mu muryango wabo baranze kwivangura.

Ati “Byatewe n’uko mu muryango tutivanguye umwanzi aradushaka aratubura. Twese twari hamwe hari n’abantu benshi barimo ababikira bari bakiri bato, bashakishije kuducamo ibice no kugira ngo bavangure biranga niho Imana yaturindiye muri uko kubana neza no kutitandukanya.”

Ubu bumwe bwari muri uyu muryango bwatumye umwe mu bayobozi babo akora urutonde ruriho amazina yose y’ababikira maze arujyana mu buyobozi asaba ko barindwa na Leta.

Umuryango w’Abenebikira wakomeje kuba muri iki kigo kugeza ku wa 1 Nyakanga Ubwo inkotanyi zahabakuraga zikabajyana i Nyanza mu mujyi kugeza ubwo umutekano wagarukaga neza bagasubira mu kigo cyabo.

Nk’umwe mu bari mu rwego rw’Uburezi, Sr Murekatete avuga ko nyuma ya Jenoside yakorewe Abatutsi mu 1994 uru rwego rwari rufite ibibazo cyane ko abana benshi bari barahungabanye, abandi bafite ipfunwe ry’ibyo ababyeyi babo bakoze muri Jenoside.

Ati “Umurimo w’uburezi nyuma ya Jenoside wari unyuranye n’ubu ngubu, abana bose bari bafite ibibazo bikomeye sinanavuga abarokotse, abarokotse bari babifite kuko batari bafite imiryango ibitaho bakomeretse ku mutima no ku mubiri. Abandi bari mu Rwanda nabo bari bafite ibibazo bikomeye n’ipfunwe ry’ibyabaye n’umujinya hari n’abandi bana twari dufite bari bavuye hanze bahungutse bari mu bukene, ababyeyi babo badafite aho baba.”

Sr Murekatete yagaragaje ko gushyira ibintu ku murongo ngo bongere guhuza impande zombi yari intambara ikomeye.

Yakomeje ati "Ntibyari byoroshye kubahuza bose no kubagorora no kubanyuza mu nzira nziza no kubaha uburere no kubumvisha ko bahangana n’ubuzima bakiga kugira ngo bazigirire akamaro yari intambara ariko yarashobotse kandi yarangiye neza.”

Sr Murekatete Anne Marie avuga ko yarokotse Jenoside abifashijwemo n'Umuryango w'Abenebikira abamo wanze kwitandukanya
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza