IGIHE

Will Smith agiye gusohora igitabo ku mwuka mubi wigeze kuba mu rugo rwe

0 4-10-2021 - saa 16:46, Uwiduhaye Theos

Will Smith wamenyekanye cyane mu Ruganda rwa Sinema i Hollywood muri Leta Zunze Ubumwe za Amerika, aritegura gushyira hanze igitabo gikubiyemo ubuzima bw’urugo rwe na Jada Pinkett rwigeze kuzamo ibibazo.

Uyu mugabo w’imyaka 53 aritegura gushyira hanze igitabo yise ‘Will’ kizaba gikubiyemo ubuzima bwe cyane ariko ubw’urugo rwe rwigeze kurangwamo n’ibibazo by’urudaca.

Muri iki gitabo hari aho uyu mugabo agaragaza ko hari igihe urugo rwageze aho rukajya mu mazi abira. Ati “Ntabwo twari tugishoboye kwigira nk’aho nta kibazo gihari. Twese ntitwari dutekanye kandi byaragaragaraga ko hari ikintu cyagombaga guhinduka.”

Will Smith witegura gushyira hanze iki gitabo cye ku wa 9 Ukwakira 2021 mu kiganiro yagiranye na GQ yavuze ko we n’umugore we kubera ubwumvikane bwigeze kuba buke, hari igihe cyageze buri wese aha umwanya mugenzi we.

Ati “Twahanye umwanya, icyizere ndetse n’umudendezo, ku myizerere y’uko buri wese agomba gushaka inzira ye. Ndetse urushako ntabwo kuri twe yari gereza.”

Mu mwaka ushize, Will Smith n’umugore bahishuye ukuntu batandukanye bakaza kongera gusubirana.

Uyu mugabo n’umugore we Jada Pinkett Smith batangaje ko bigeze gutandukana mu myaka yashize ndetse umugore we agakundana n’undi musore ariko ubu bakaba barongeye guhuza ubumwe.

Jada Pinkett Smith na Will Smith basezeranye kubana akaramata mu 1997 ariko baza gutandukana bucece ku buryo bakomeje babana ariko mu buryo busanzwe batari nk’umugabo n’umugore.

Ibi, ngo byaturutse ku mubano wihariye Jada Pinkett Smith yagiranye n’umuririmbyi August Alsina watangiye mu 2015 nk’uko babitangaje mu kiganiro gica kuri Facebook cyitwa "Red Table Talk" gisanzwe gitegurwa na Jada Pinkett Smith.

Muri iki kiganiro bombi bashashe inzobe, bakuraho ibihuha byari bimaze iminsi bivugwa mu itangazamakuru ku Isi yose. Jada Pinkett Smith yahishuye ko yagiranye umubano w’akadasohoka na August Alsina.

Yakomeje ati “Nagiranye umubano wihariye w’urukundo na August n’ubwo tutigeze tubyerura cyangwa ngo turushinge.”

Uyu mugore yavuze ko yagiranye uyu mubano na August Alsina mu myaka ine n’igice ishize ariko bikaza gukaza umurego ubwo uwe na Will Smith wazagamo ibibazo uruhuri. Icyo gihe yanavuze ko Will Smith yemeye ko uyu mubano ubaho hagati yaba bombi (Alsina na Pinkett).

Uyu mugore yavuze ko yari mu bubabare bwinshi, ndetse umubano w’urukundo rwabo warahungabanye. Yavuze ko hari aho yageze akavumbura ko atazi umugabo we mu by’ukuri.

Arangije ati “Twagerageje ikintu cyose cyadutandukanya ariko ntibyadukundira.”

Pinkett Smith yavuze ko umubano we na Alsina warangiye, ndetse ubu akaba yarasubiranye n’umugabo we. Yavuze ko bombi bahisemo kugirana urukundo rutagendera mu mabwiriza runaka.

Smith yavuze ko hari igihe yumvaga ko bitoroshye kuzongera kuvugana na Pinkett ubwo bari bafitanye ibibazo gusa akamwibutswa n’ubufatanye no gushyira hamwe byabarangaga batarashwana.

Will Smith yarushinganye na Jada Pinkett mu 1997 nyuma yo gutandukana na Sheree Zampino mu myaka ibiri yari yabanje. Bafitanye abana babiri; umukobwa witwa Willow Camille Reign Smith ufite imyaka 20 ndetse na Jaden Christopher Syre Smith ufite imyaka 23.

Uretse iki gitabo kivuga ku buzima bwa Will Smith n’umugore we, ari gutegura na filime izajya hanze ku wa 19 Ugushyingo 2021, yise King Richard.

Will Smith yavuze ko hari igihe cyageze urugo rwe na Jada Pinkett rukazamo ibibazo
Will Smith n'umugore we bari bagiye gutandukana habura gato, bamaze igihe babana ariko urukundo rwabo rwarakonje cyane
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza