IGIHE

Ntimugapfobye amateka ya Jenoside yakorewe Abatutsi nararokotse- Kabarari Valens

0 24-02-2021 - saa 23:09, Karirima A. Ngarambe

Umwanditsi Kabarari Valens aheruka gusohora igitabo yise ‘‘Vivant’’ kigaruka ku mateka yabayemo muri Jenoside yakorewe Abatutsi mu 1994, ashimangira ko atazamerera ko hari abapfobya ayo mateka.

Kabarari ni Umunyarwanda w’imyaka 34 wubatse, afite umwana umwe akaba atuye aho bita Meuse mu Bufaransa aho amaze imyaka igera kuri 14 muri icyo gihugu.

Uyu mugabo yageze mu Bufaransa ahakomereza amashuri ye mu bijyanye no gukora flime.

Mu minsi ishize IGIHE yagiranye ikiganiro cyihariye na Kabarari cyagarutse kuri bimwe mu bikubiye mu gitabo cye ‘‘Vivant’’, yahaye igisobanuro cyo mu Kinyarwanda nka ‘‘Ntacyo mukibaye.’’

Yagize ati ‘‘Nanditse kugira ngo abagerageza gupfobya amateka ya Jenoside yakorewe Abatutsi nararokotse batiharira uruvugiro.’’

Yanagarutse ku buryo yasanze u Rwanda yagarutsemo nyuma y’imyaka 14 aruvuyemo ngo aruhure umutima rw’ibyo yaruboneyemo mu 1994.

Yakomeje ati ‘‘Tariki ya 6 Mata, 1994, indege yarimo Perezida Habyarimana yararashwe, bamwe bajya mu mihanda bati ‘Ikinani cyahanutse barabyina’, nanjye aho nari ndi numvaga nasohoka nkajya kubyina mu muhanda na bagenzi banjye, ariko byihuse nabonye mu maso ya Data ko atari igihe cyo kwishimira, ko njye ntemerewe kwishima muri ibyo bihe kuko byagaragaraga ko natwe urupfu rudutegereje.’’

Kabarari Valens yavuze ko buri gihe ikintu kimugaruka mu mutwe ari ijambo se yamubwiye baryamye ku rubaraza i Jali muri Jenoside yakorerwaga Abatutsi.

Yagize ati ‘‘Mwana wanjye bagiye kutwica, ibi yabimbwiye nyuma yaho yari arambiwe mu by’ukuri kuturema agatima nkuko yabikoraga mbere ngo dutuze. Akimara kubimbwira nemeye ko ibintu bikomeye kuko njye kubera ubwana nabonaga kuba turi kumwe twese ari ibintu byiza abavandimwe, ba sogokuru, ba masenge n’abandi benshi twari twateranye.’’

‘‘Twari kumwe kandi na murumuna wanjye witwaga Baganizi Phocas, uwamukurikiraga witwaga Uwamahoro Jeannette abo bombi barishwe, hicwa kandi Data Kabarari Callixte na Mama Mugorewabera Geneviève; harokoka Kanamugire Didas na mushiki wacu w’imfura Kayitesi Judence.’’

Mu kuvuga inkuru yo kurokoka kwe, Kabarari avuga ko yashenguwe bikomeye n’urupfu rwa murumuna wa se witwaga Murenzi Wellars wakoraga icyo gihe mu kigo cyari gishinzwe umuriro n’Amazi cyitwa Electrogaz.

Ati ‘‘Bamwishe bamuteye icyuma ndeba, yari umuntu numvaga ko adashobora gupfa.’’

Kabarari yahisemo kwandika ku mateka ye agamije gutanga umusanzu we mu kubungabunga amateka ya Jenoside.

Ati ‘‘Kwandika rero byaramfashije cyane kuko nsa n’uwatuye umutwaro w’ibyo nabagamo mbere yo kwandika, kuko mbere najyaga mbiganiriza mushiki wanjye Kayitesi ko ntemera ko Murenzi yishwe, kandi naramwiboneye bamwica, ariko nkumva ko umunsi umwe nzongera nkamubona. Maze kubishyira ku rupapuro ni bwo nemeye koko ndabyakira ko yishwe, ko ba sogokuru bishwe, ko ababyeyi banjye bishwe, ko abo tuva inda imwe babiri bishwe n’abandi.’’

Yashimye Inkotanyi zamurokoye aho bari i Jali, zikamufasha kongera kugarura icyizere cyo kubaho.

Kanda hano ubashe kubona igitabo ‘‘Vivant’’ cya Kabarari Valens.

-  Ibikubiye mu kiganiro Kabarari yagiranye na IGIHE

Kabarari Valens aheruka gusohora igitabo yise ‘‘Vivant’’ kigaruka ku mateka yabayemo muri Jenoside yakorewe Abatutsi mu 1994
Ubwo yamurikaga Igitabo ‘‘Vivant’’ mu Bufaransa
Kabarari ni Umunyarwanda w’imyaka 34 utuye mu Bufaransa aho amaze imyaka 14

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza