IGIHE

Guma mu rugo, umwanya mwiza ku banditsi b’ibitabo nyarwanda

0 25-01-2021 - saa 08:25, Hategekimana Richard

Kwandika ibitabo ni ugutanga umusanzu ukomeye ku muryango mugari w’abatuye Isi. Ni ugufasha ab’ubu kurushaho kumenya ibyahise ndetse no kubafasha kurushaho kumenya ibihe barimo. Ibitabo kandi bifasha abazavuka ejo hazaza kurushaho kumenya amateka y’ibihe byahise.

Ibitabo bifasha abantu b’ingeri zitandukanye kwiyungura ubumenyi bubafasha gutera imbere haba mu kwihangira imirimo, kwimakaza indangagaciro na kirazira mu iterambere, ubumenyi bw’Isi n’ibindi.

Mu gihe umujyi wa Kigali uri muri gahunda ya Guma mu rugo, ni umwanya mwiza ku banditsi b’u Rwanda, kujya mu nganzo bagahanga, bakandika ibifasha igihugu nabo ubwabo kwiteza imbere.

Nta mwanditsi ukwiriye kuvuga ko yabuze icyo akora muri Guma mu rugo. Umwanya munini w’abanditsi bawushyire mu gukora ubushakashatsi bandikire u Rwanda, bandikire Afurika bandikire Isi.

Muri Guma mu rugo yabaye umwaka ushize, hari abanditsi bayibyaje umusaruro, irangira ibitabo babigeze kure, ku buryo amezi yakurikiyeho yari ayo kubimurika, abo ni abo gushimirwa.

Ntabwo kwandika bikwiriye kuba ibya bamwe, kuko buri wese afite inkuru yo kwandika. Ni byiza ko Abanyarwanda bose barushaho kwimakaza umuco wo kwandika no gusoma ibitabo kuko ari umuco mwiza wongera ubumenyi n’ubuhanga.

U Rwanda rudutegerejeho ubuhanga n’ubumenyi bwo kurwubaka kandi nta handi bituruka uretse mu gusoma ibitabo. Ni umukoro kuri buri wese, mu rwego aherereyemo yakwandika kandi bikaba umusanzu ukomeye ku bariho bashaka kumenya ibyo mu rwego akoramo n’abazaza nyuma.

Wakubaka u Rwanda ute utandika cyangwa udasoma ibitabo?Wakubaka Afurika ute utandika cyangwa udasoma ibitabo? Wakwandika ute ibitabo utabisoma?

Gusoma ibitabo niwo musingi w’ibikorwa byubaka u Rwanda ndetse n’Afurika.

Mucyo duce imigozi twaziritswe na Bagashakabuhake, ngo ‘Umunyafurika umuhisha mu bitabo? Tubyamagane. Twimakaze umuco wo kwandika no gusoma ibitabo nkuko Nyakubahwa Perezida wa Repubulika adahwema kubidusaba kuko nibyo bizadufasha kubaka u Rwanda ndetse n’Afurika twifuza.

Ibyo ni ibitekerezo bya HATEGEKIMANA Richard

Chairman w’Urugaga rw’Abanditsi mu Rwanda

E.mail: [email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza