IGIHE

Ntiwamenya niba ari Ikinyarwanda, Icyongereza cyangwa Igifaransa: Igifefeko cyamize gakondo!

0 24-08-2021 - saa 16:27, Dufitumukiza Salathiel

Reka tubyandike nk’uko bivugitse: “Hahiye, turye show, ari kwapulodinga, ashaka gutwika, yanfolowinguye, turabanza gucilinga, uyu muyoboro usapulayinga hirya, namuhaye mesaje, ni byo biri guterendinga…” Imvugo cyangwa inyandiko nk’izo ni henshi zumvikana, uvuga n’ubwirwa basa n’abemeranyije ko ari bwo buryo bubabereye gukoresha mu bwumvane bwabo.

Mu gihe ahahiye byakumvikanye nk’ahafashwe n’inkongi y’umuriro, urufefeko rumaze kwinjirira Ikinyarwanda rwatumye bifatwa nk’aho ari ukuba ahantu “habaye ibirori cyangwa ibiri kuhakorerwa byagenze neza”.

Haba mu bakuze, abato, abakuru n’abakibyiruka ni hake hacyumvikana uvuga cyangwa akandika ubutumwa runaka akaburangiza akoresheje Ikinyarwanda cy’umwimerere gusa.

Intebe y’Inteko y’Umuco Yungirije ushinzwe iterambere ry’Ururimi, Uwiringiyimana Jean Claude, yavuze ko Ikinyarwanda gisigaye kivangwamo Icyongereza,Igifaransa,Igiswahili n’imvugo z’urufefeko ziba zahimbwe n’itsinda ry’abantu.

Abibonamo ikibazo gihangayikishije kuko nk’ururimi rw’igihugu iyo rwangiritse ni byinshi biba bitakara.

Ati “Ingaruka zirumvikana. Iya mbere ni ukugira imbangikane z’amagambo [arimo amuga yahimbwe n’amatirano], ugasanga ya magambo yashakiwe Ikinyarwanda ntakoreshwa kandi ahari ahubwo ya yandi yakuwe mu zindi ndimi akaba ari yo akoreshwa kenshi.”

“Icya kabiri ni mu rwego rw’uko ururimi rw’Ikinyarwanda rwatakaza imiterere yarwo [ntabwo turahagera]. Ntumenye niba ari Ikinyarwanda, ari Icyongereza cyangwa ari Igifaransa.”

Kubona umuntu ukoresha ururimi gakondo rw’umwimerere biratangaje ndetse bamwe ntibatinya kuvuga ko batasobanukiwe ibyo avuze kandi ko abivuganye ubwiyemezi.

Aho kugira ngo umuntu avuge ko ibi ari byo bigezweho muri iki gihe, ahitamo kuvuga ngo “biri guterendinga (trending)”; aho yakavuze kugura ifatabuguzi agahitamo kuvuga “kugura abonnement” cyangwa “kwiyabonesha”.

Haba abantu ku giti cyabo,abayobozi mu nzego n’imiryango bitandukanye bose bagendera muri uwo mujyo, ibintu biteye impungenge kuko uko bigenda bifata indi ntera ubwoba buba bwinshi ko byazatuma Ikinyarwanda gita umwimerere wacyo.

Ururimi ni kimwe mu birango by’igihugu kuko uretse kuba umuyoboro w’itambutsabutumwa ni umuhuza w’abenegihugu rukaba n’imwe mu nkingi zisigasira umuco.

Umunyamabanga wa Leta muri Minisiteri y’Urubyiruko n’Umuco, Bamporiki Eduard, ni umwe mu bayobozi bake bazwiho gukoresha Ikinyarwanda cy’umwimerere.

Iyo akivuga cyangwa akagikoresha yandika ubutumwa kuri Twitter nk’urubuga nkoranyambaga rusigaye rukoreshwa cyane n’abo mu ngeri zose, usanga aho kwikirizwa cyangwa ngo abamukurikira batangeho ibitekerezo, bafata umwanya munini bagaragaza ko batasobanukiwe ibyo avuze cyangwa banenga ko yakoresheje ururimi rutomoye.

Nyamara mu mezi ashize hari uwo yasubije kuri urwo rukuta yandika ati “Ndi mu kazi ‘petit” biba nk’isomo ryoroshye cyane ritanzwe ku buryo n’uyu munsi hari abakibisubiramo buri saha.

Birasa n’aho mu nyubako y’ururimi Abanyarwanda bageze mu igorofa ya kabiri, bakaba batitaye ku kuba iya mbere iri kwangirika.

“Ni ubusirimu no kwerekana ko bize”

Mu kiganiro IGIHE yagiranye na Uwiringiyimana yasobanuye ko abenshi mu bavanga indimi mu mivugire cyangwa imyandikire babiterwa n’imyitwarire yabo bwite.

Ati “Ni impamvu ebyiri. Hari ukudaha agaciro ibyo uvuga [kuko ahanini ivangandimi rikoreshwa mu mvugo no mu nyandiko bitateguwe mbere]. Wafashe umwanya ukabitegura neza ntibyagaragaramo kuvanga indimi. Icya kabiri ni imyitwarire y’umuntu ku giti cye, aho usanga ajya kuvuga Ikinyarwanda akakivangamo indimi z’amahanga, ahubwo yajya kuvuga rwa rurimi rundi afitemo ubumenyi buke akigengesera.”

Igihangayikishije ni uko abagira uruhare muri iryo vangandimi akenshi ari abize ndetse barimo n’abasobanukiwe iby’indimi. Bamwe mu barangije n’abacyiga muri Kaminuza basobanuye ko kuvanga indimi babikora nk’abishimisha, abandi bavuga ko babikora bashaka kwerekana ko basirimutse.

Umwe yagize ati “Ahanini usanga biterwa n’uko iyo utagashyizemo [ako kuvanga indimi] baba bumva nta kigenda cyawe.”

Mugenzi we yunzemo ko ubwinshi bw’inyandiko n’ibiganiro bisaba kuba abantu bazi indimi nyinshi bituma bisanga bazivanze kubera kuzibonaho kenshi kurusha Ikinyarwanda.

Undi yagize ati “Akenshi abavanga indimi baba bashaka kwereka abandi ko hari indi ntera bagezeho mu bumenyi.”

Ni mu gihe hari uwavuze ko we akora ivangandimi agamije “kwishimisha gusa” babiri bemeza ko byizana batabiteguye, hakaba n’uwasobanuye ko we abikora agamije gutambutsa ubutumwa bitamugoye.

Uwitwa Nyirubukesha Modeste we yagize ati “Impamvu ni uko nko mu cyaro iyo uvuze ntuvange indimi ntibamenya ko wize.”

Abenshi muri bo bahuriza ku kuba Ikinyarwanda gikoreshejwe ari umwimerere byaba ari byiza, izindi ndimi zirimo n’izigishwa mu mashuri zigakoreshwa nazo ukwazo. Gusa na none ngo hari ibyo babura uko bavuga mu rurimi gakondo bijyanye n’urwego runaka.

Amuga aracyari make

Uwiringiyimana yasobanuye ko nubwo Ikinyarwanda kidakennye ariko hari amagambo yabugenewe mu nzego zimwe na zimwe kitarabona. Icyakora yavuze ko Inteko y’Umuco igenda ikora ibishoboka ngo aboneke ndetse amwe yamaze kumurikwa by’umwihariko ajyanye n’urwego rw’imari.

Yakomeje ati “Amuga yose ntiturayabona ariko turabaza ngo n’ahari arakoreshwa neza?”

Yavuze ko hari abashobora kuba batazi neza Ikinyarwanda kubera amateka y’Igihugu bityo kugikoresha batakivanze n’izindi ndimi bikabagora, ariko ko umuntu udafite ikibazo cyihariye kitamunanira kugikoresha neza “usibye imyitwarire ye bwite”.

Uwiringiyimana yatangaje ko Inteko y’Umuco iri muri gahunda yo gufasha abantu guhindura imyumvire, bakumva ko Ikinyarwanda kiri ku rwego rumwe n’izindi baba bahaye agaciro kukirusha, kandi kikaba kinazisumbya kuba ari “ururimi rw’igihugu n’urw’ubutegetsi”.

Asanga imyumvire y’uko Ikinyarwanda kidafite agaciro kamwe n’Icyongereza cyangwa Igifaransa ari ingaruka z’ubukoloni, cyane ko bumwe mu buryo bwakoreshejwe n’abakoloni ari ukubanza kumvisha abantu ko iby’iwabo biciriritse.

Imikoreshereze y’amuga yakomeje kugenda iba ikibazo aho usanga n’ayamaze kuboneka adakoreshwa. Urugero ni “intumwa ya rubanda” ridakoreshwa akenshi ahubwo hagakoreshwa “umudepite” kandi ari iritirano.

Uretse amuga yahanzwe akaba atarinjira neza mu mikoreshereze y’Ikinyarwanda hagakomeza kwibandwa ku matirano, hari n’amagambo bigoye kuyabonera Ikinyarwanda gikwiye.

Inteko y’Umuco ifite gahunda yo gukusanya amuga azajya agenda asimbura amagambo y’izindi ndimi atarabonerwa uburyo avugwa mu nzego zitandukanye.

Hari gutegurwa ubukangurambaga mu itangazamakuru n’ibigo by’amashuri

Itangazamakuru ni rumwe mu nzego zikoresha cyane ururimi ndetse rikurikirwa n’imbaga. Kuba ryakoresha ivangandimi cyangwa rigakoresha ururimi rw’umwimerere byatuma n’abarikurikira umunsi ku munsi bisanga muri uwo mujyo.

Nk’urugero irya siporo n’imyidagaduro rikoreshwamo amagambo y’izindi ndimi kenshi kurusha Ikinyarwanda kandi rirakurikirwa cyane.

Ibyo bivuze ko rikoresheje ururimi rutavangiye riba risa n’iryigisha kandi abarikurikira bumva ko nta kibazo kirimo, nyamara iyo rivanze indimi bituma na ba bandi babifata nk’ubusirimu bumva ko ari bwo koko.

Uwiringiyimana yavuze ko Inteko y’Umuco ifite gahunda yo kuzajya isohora inyandiko ikubiyemo amagambo yakoreshejwe nabi mu itangazamakuru, n’uko yagombye gukoreshwa.

Ati “Ubu hari gahunda y’uko nibura buri gihembwe Inteko y’Umuco […] dushobora gukora urutonde rw’amakosa yose akorwa muri urwo rwego, tukajya tuyabashyikiriza tukabereka n’uburyo bayakosora.”

Bizajya bikorwa buri nyuma y’amezi atatu, nibirimba bibe nyuma y’amezi abiri.

Uretse mu itangazamakuru, hari na gahunda yo kongera ubukangurambaga ku ikoreshwa ry’Ikinyarwanda mu bigo by’amashuri. Bizanyuzwa mu gutegura amarushanwa y’ubwanditsi n’ubuhanzi mu bakiri bato, ku buryo bazajya bakura bagikoresha neza.

Yavuze ko nk’uko haba amatsinda yo kuvuga neza Igifaransa cyangwa Icyongereza, amashuri azakangurirwa no gushyiraho ayo kuvuga no kwandika neza Ikinyarwanda.

Hagiye hagaragara abana bakura bavuga indimi z’amahanga gusa, bikagira uruhare mu kuba batamenya Ikinyarwanda. Bituruka ahanini kuri gahunda z’imyigishirize y’amashuri amwe n’amwe usanga ababuza kugikoresha, by’umwihariko agendera ku nteganyanyigisho mpuzamahanga. Hari n’ababyeyi badatoza abana babo kukivuga no ku cyandika, bagamije ko bamenya iz’amahanga cyane.

Gahunda y’imyigishirize amashuri yo mu Rwanda agenderaho yemeza Icyongereza nk’ururimi rwigishwamo mu mashuri yose,naho Ikinyarwanda n’izindi ndimi zikenewe zikigishwa nk’andi masomo guhera mu mwaka wa mbere w’amashuri abanza kugeza mu byiciro byo hejuru.

Ubwo Minisitiri w’Intebe yagezaga ku Nteko Ishinga Amategeko ibikorwa bya Guverinoma mu rwego rw’uburezi hagati ya 2017 na 2020, yavuze ko mu 2019 handitswe ibitabo by’Ikinyarwanda bisaga miliyoni byo mu cyiciro cya mbere cy’amashuri abanza hagamijwe ko abana biga Ururimi.

Mu mashuri makuru na za kaminuza, hari hamwe Ikinyarwanda cyigishwa hakaba n’aho kitigishwa. Inzobere mu by’indimi zivuga ko hose cyagakwiye kwigishwa kugira ngo abanyeshuri nibagera mu kazi bazabe bamenyeye kugikoresha bityo ntibagorwe no kubyitoza bakarimo.

Ababyeyi barasabwa guha agaciro Ikinyarwanda kuko ari Ururimi Kavukire umwana ukiri muto yonka ndetse rushingiye ku busabane bwe nabo.

Uwiringiyimana yagize ati “Icyo nasaba Abanyarwanda ni uko twirinda gucutsa abana ku rurimi rw’Ikinyarwanda hakiri kare. Kuko niba umwana yatangiye avuga ururimi kavukire rwe kubera bwa busabane yagiranye n’umubyeyi we, yigera ku myaka ibiri cyangwa itatu ngo ahite amuhagarika amubwira ngo ntuzongere kuvuga Ikinyarwanda. Twicutsa abana bacu imburagihe.”

Kubatumva neza agaciro karwo, yasobanuye ko ari rwo shingiro ry’ubumwe bw’Abanyarwanda, akaba ari rwo ruhetse ubusabane n’ubwumvane bugaragara hagati yabo.

Yakomeje ati “ Wa mwana wacukije ukamubuza kwiga Ikinyarwanda,ukamubuza kukivuga,iyo amaze gukura bimugiraho ingaruka mu gusaba n’abandi Banyarwanda.”

Abacyize cyangwa abakizi bakivangamo izindi ndimi babyita ubusirimu, yababwiye ati “Ubwo busirimu busiribanga umutungo wawe, nta busirimu mbonamo. Ikinyarwanda ni umutungo w’Abanyarwanda, ni akaranga Munyarwanda. Bishyira ingufu mu gushaka kwibagirwa Ururimi Kavukire rwabo”.

Bumwe mu butumwa Bamporiki yigeze gushyira kuri Twitter
Uyu yagaragazago ko ubutumwa atabwumvise bitewe n'uko bwanditse mu kinyarwanda cy'umwimerere
Hari abagaragaza ubushake bwo kumenya Ikinyarwanda cy'umwimerere no kugikoresha
Benshi basigaye bashaka kugaragaza ubushake buke mu kumenya IKinyarwanda na bamwe mu bakizi ntibaterwe ishema nabyo
Aho kumwikiriza, bamwe bagaragaje ko batumva ibyo ubutumwa bwe
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza