IGIHE

Ijambo ku rindi! Igisigo ‘Urunigi’ cya Bamporiki mu isabukuru ya Unity Club Intwararumuri

0 18-10-2021 - saa 23:07, Nsengiyumva Emmy

"Urunigi" ni ijambo rifite igisobanuro gikomeye mu mateka y’u Rwanda. Ni ryo Bamporiki Edouard yifashishije mu gisigo yasize mu birori by’isabukuru y’imyaka 25 ya Unity Club Intwararumuri.

Benshi bakunze kunigiriza urunigi mu gatuza ariko igisobanuro cyarwo kizwi na mbarwa. Iyo usubije amaso inyuma, usanga urunigi rukomoka ku rusaro rwasobanuraga umurage ababayeho bagakora ibikorwa bikomeye basigaga, mu mateka y’u Rwanda.

Icyakora bitewe n’uko abantu batandikaga ngo bibe byakwitwa inyandiko n’ibisigo bitaraza wenda ngo umuntu avuge ko ibyo bikorwa yabisiga mu gisigo, babihererekanyaga mu mvugo bati “Urusaro rwa kanaka rurimo iki?”

Nyuma y’intambara u Rwanda rwashyizwemo n’Abanyabungo, bya bigwi byaje gutatana birabura.

Ku Ngoma y’Umwami Ndoli wagize nyina utari uwamubyaye, kuko yagiye kwima adafite nyina biba ngombwa ko bamushakira nyina w’ingoboka aba Nyiraruganzu Nyirarumaga, wabaye igihangange mu busizi bw’i Rwanda.

Uyu mubyeyi wari wamaze kubona ko u Rwanda rugira ibyago ibintu bigasandara kandi abantu babeshwaho n’umurage w’abo bakurikira, yafashe icyari Urusaro aracyubaka kivamo Urunigi.

Urunigi rukaba icyegeranyo cy’ibikorwa by’ibigwi byakozwe n’abantu bariho kugira ngo bizagirire umumaro abazaza.

Ibi byagombaga gufasha ko ibikorwa by’ibigwi by’abantu banyuranye byagombaga kubikwa hamwe bigakora ‘Urunigi’, aho kugira ngo buri wese abike agasaro ke n’undi ake.

Nguko uko yakoze ibisigo nyabami byegeranya ‘Amasaro’ y’abantu akajya mu ‘Nigi’.

Icyakora icyo gihe Nyiraruganzu Nyirarumaga yaravuze ati “Uzagoma, akagirira nabi Abanyarwanda n’u Rwanda, urusaro rwe ntirukage mu runigi.”

Aha ugereranyije ni nko kuvuga ngo ibikorwa bye ntibikajye mu by’abandi bijye bishyirwa ukwabyo.

Bamporiki Edouard aganira na IGIHE yavuze ko igisigo cye, yagize ati “Nahanze iki gisigo nshaka gushimira Madamu wa Perezida wa Repubulika washyize umuyobozi wese wakoraga utwe, watekerezaga utwe, akabegeranya nk’ikimenyetso cya rwa runigi benshi batari banazi.”

Yongeyeho ko ikindi ashimira Madamu Jeannette Kagame [usanzwe ari Umuyobozi Mukuru wa Unity Club Intwararumuri] ari uko yanahanuye ba bayobozi gukora ibizima kugira ngo amasaro yabo ntazakurwe mu runigi.

Bamporiki yavuze ko igikorwa Madamu wa Perezida wa Repubulika yakoze cyo gushinga umuryango ‘Unity Club Intwararumuri’ gifite aho gihuriye n’amateka y’u Rwanda ubwo hatekerezwaga ‘Urunigi’.

Iki gisigo Bamporiki yagituye abanyamuryango ba Unity Club Intwararumuri ku wa 16 Ukwakira 2021 ubwo bizihizaga isabukuru y’imyaka 25 uyu muryango umaze ushinzwe.

Unity Club igizwe n’abayobozi bari muri Guverinoma, abayihozemo, n’abo bashakanye. Uyu muryango washinzwe na Madamu Jeannette Kagame ku wa 28 Gashyantare 1996 hagamijwe gutanga umusanzu mu “Kwimakaza umuco w’ubumwe n’amahoro, byo nkingi z’iterambere rirambye.”

Madamu Jeannette Kagame yavuze ko mu gihe hizihizwa isabukuru y’imyaka 25, hazirikanwa abitanze bakagarura u Rwanda “rukongera kuba u rwa Kanyarwanda.’’

Bamporiki Edouard yasize igisigo 'Urunigi' mu birori by’isabukuru y’imyaka 25 ya Unity Club Intwararumuri

Igisigo ‘Urunigi’ cya Bamporiki Edouard

Urunigi

Urunigi rwacu rwuzuye

Cya kivi cyacu cyushijwe

Masaro yubatse urunigi

Ni mucyo twizihize ingeri

Urunigi rwambikwe Nyiringanzo

Tubone dutangire ikivi kindi

Kizaduhesha urunigi rundi

Ruvuye ku mbuto tubakesha

U Rwanda rwandane ibigwi byacu

Imbuto

Imbuto nziza mwabibye

Imbuto nziza y’umutima

Imbuto nziza y’ubupfura

Imbuto nziza yo kubaho

Imbuto nziza y’ubugabe

Imbuto nziza y’ubugabo

Imbuto nziza y’ubuzima

Imbuto nziza y’ubudasa

Imbuto nziza y’Ubunyarwanda

Imbuto iranda kugera ejo

Imbuto mwabibye yeze izi:

Yeze ababyeyi b’ubupfura

Yeze ababyeyi b’umutima

Yeze abahize kubiba

Yeze abakogoto b’abagabo

Bukeye barwereza urumuri

Bimana u Rwanda rwaanda uku

Ntwararumuri nkumburwa

Muhunde impundu abatararutwa

Aribo Ntwari dutaramye

Nkundira nganzo nkomora umu

Ntumikire izeze ku yabibwe

Intwararumuri zantumye

Ngo nshimire intwari mu rw’inzuzi

Ab’indongozi mbatarame

Muri iki gitaramo cy’imfura.

Mwebwe mwagaruye uru Rwanda

Mukaruvana mu ya rubamba

Imanga yatezwe ngo rutembe

Abakarurwaniye birwanya

Barwima inkunga baruha induru

Mwe mwatabaye ahasaba intwari

Iki gitaramo ndakibatuye.

Rwanda,

Rwanda twaranzwe n’imfura

Rwanda rwandanaga ibigwi

Rwanda rwahoranye impeta

Rwanda rwahoranye ingoma

Rwanda rwahoranye ingabo

Rwanda rwagizwe Kigali

Rwanda rutahizwe ubugiri

Rwanda ruzingatiye ibigwi

Rwanda ntekerezo ishyitse

Rwanda rwahoranye imbuto

Rwanda,

Rwanda rwanzwe n’ibifura

Rwanda rwabuze abavunyi

Rwanda rwabuze abahizi

Rwanda rwabuze ababibyi

Abagabo banga kuba imfura

Ugorwa n’abakakugobotse

Bifata imyaka udataramwa

Inkotanyi zanga kugoheka

Ziratabara uraramirwa

Zirwanya abahize kugoma

Zitsinda abaguhemukiye

Zisana ibyasagarariwe

Zigarura ibyaguha ikuzo Rwanda,

Umugaba akubereye umugabo

Kuri we hashibutse imfura

Kuri we hakuze ibizima

Cyane hubatswe imitima

Ingoma ibihumbi bizaba uku

Ntawe uzongera kugoma

Ntawe uzongera guhona

Ntawe uzongera gutana

Ntawe uzongera konona

Ni igihango tugiranye.

Ngo n’abavuka bakura ubu

Bazabitamikwe mu iyonka

Bazabitozwe mu gukura

Gutaka u Rwanda bikorwe uko

Bazarurwanira rurame

Bazarurinda bibe ihame

Ingoma ibihumbi rweme uko

Nguyu umuhigo twahize

Erega tuvuye ahakomeye twese ntawe ubiyobewe!

None rero ubwo tunyuzwe

Kandi impumu ubwo zishize

Mucyo dushengere ingeri

Nyina w’u Rwanda uru rugari

Mama wa bose bamugannye

Umwe wakanguye imitima

Akaduha u Rwanda tugendana

Muri uru Rwanda tugendamo.

Nkeje uwatuganuje ubumwe

Ari nawe wunamuye ukuri

Imfubyi zongera guseka

Intwaza zikemera kubaho

Ziti tubonye Nyinawumuntu

Ntawe uzagoma muhari

Dukeje mwe mwagaruye igihango

Abarinzi bacyo bagahetwa

Ngo iteka bazabe abatagoma

Kuko mutoza ubutagoma

Imbuto mwabibye yeze nyinshi

Murakagwiza amagana umu

Murakagwira ingoma ijana

Impundu nkumburwa zishyitse

Mubyeyi wunamuye ubumwe

Wanzitse twese twanzuye

Tuti kubana ni ingume

Utwereka iyo tujya turora iyo tuva

Utwunga twanga, turi mu twacu

Uti mwemere mwange ubwungo ni ubu

Tuzabaho, tuzaba umu, tuzakorana, tuzavugana

Tuzubakana, tuzubahana

Ntawabyumvaga muri twe!

Umutware wacu umubera umutwaza

Umutwaza ahagoye ga muratwaza

Umutwaro uremereye mu bunyerere

Ntimwacibwa integere na byose

Intumbero iba kuduhuza.

Uba umukoreye mu ngata

Kuri uru ruhembe rw’ubuzima

Urasana wemye uhiga inzovu

Amagana y’abiyitaga abahanga

Yabuze ubwungo bwatubanya

Uvana ubuhanga mu bitabo

Wimika ubwenge mu mitima

Uduha icyomoro gihamye.

Uti “Aya mazi yaratobwe”

Ariko isoko yo ni nzima

Cyo nimutokore tudahona

Ejo tukavoma ibi birohwa!

Ucyuye umudende w’ubupfura

Ucyuye inganji ingami ijana

Uduhaye ubwema kugeza ejo

Birangiye twese tubyina umwe

Nyina w’u Rwanda turanyunzwe

Ntwararumuri mumfashe muhanike impundu z’urukatsa, abagabo mwese twivuge dushimire intwari dushagaye.

Ubu turizihiza irage, ry’uru rugendo mwagennye

Ntawabyumvaga mu ntango

Twumvaga ari inzira ivunanye

Ariko kubera ubudahigwa

Ubudashyikirwa mu kurora

Kureba hirya ahatabonwa

Kurenga ibyadukomereye

Impuhwe nyinshi n’umutima!

Kumvira twese igihe kimwe

Ubwitange bukomeye,

Mwomoye twese ibikomere

Twese birangiye tunyuzwe

No mu ngamba turahamye.

Imana izabagororere

Twebwe tuzabavuga ibigwi

N’abato baje babimenye

Ejo tutongera gutana.

Mu kivi twusa twize byinshi

Turahana itabi ku itabaro

Usitaye arabona ubwungo

Uzanye urwango tumuha urwamo

Imbuto mwabibye y’ubumwe

Yeze nyinshi zibibwa hose

Biraba impamba mu kivi kije.

Ntwararumuri ntwaje uru

Turi inkomarume z’imena

Baradutoje barahamya

Twaratowe turatumwa

Twaraganujwe turanyurwa

Kuganuza abandi bibe ihame

Iyi mbuto yere amahoro umu.

Abo tubyara batamikwe u Rwanda

Bakotane iteka nk’Inkotanyi

Barutarame

Barwimane

Barwandane

Barushakire imbuto n’amaboko

Baruhe ubwema ingoma igihumbi

Ni ko udutwaye yaduhanuye.

Twonse abana iki gihugu

Bazagitamike abaza ejo

Ntawe uzongera kugoma

Ntawe uzongera guhona

U Rwanda rwacu rweme uko.

Ni igisigo Bamporiki yavugiye mu birori byo kwizihiza isabukuru ya Unity Club Intwararumuri
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza