IGIHE

Jules Sentore agiye gususurutsa abazitabira igikorwa cyigisha amateka cyatumiwemo Bamporiki

0 5-02-2021 - saa 23:17, Uwiduhaye Theos

Umunyamabanga wa Leta muri Minisiteri y’Urubyiruko n’Umuco, Bamporiki Edouard, umuhanzikazi Mariya Yohana Mukankuranga, Jules Sentore na Jean Paul Niyonzima uri mu rubyiruko ruba muri Perth, bazahurira mu gikorwa cya ‘Amateka Series’ kizasozwa n’igitaramo gakondo.

Ni igikorwa giteganyijwe kuri uyu wa Gatandatu tariki 6 Gashyantare 2021, kizaba hifashishijwe internet. Ibi biganiro bizanyura ku mbuga nkoranyambaga zose za Amateka Series (Twitter, Facebook, Instagram na YouTube).

Kizaba saa Yine za mu gitondo ku bari i Kigali, saa Kumi z’umugoroba ku bari Perth muri Australie na saa Tatu z’ijoro ku bari muri Auckland muri New Zealand.

Abatumiwe muri iki gikorwa bazaganira ku nsanganyamatsiko igira iti “The Genesis of Rwanda: As told through many stories” cyangwa se “Inkomoko y’u Rwanda nk’uko twabibwiwe binyuze mu nkuru nyinshi.”

Iki gikorwa kiri mu mushinga witwa ‘Amateka Series’, watangijwe mu Ukwakira na Ukuboza 2020; ukubiyemo ubukangurambaga bwatangijwe n’urubyiruko ruba mu mahanga hagamijwe kwigisha bagenzi babo ibijyanye n’amateka y’u Rwanda hamwe n’ubugeni mu ngeri zitandukanye.

Ubu bukangurambaga bukubiyemo ibiganiro bizajya bitumirwamo impuguke zitandukanye mu by’umuco, inararibonye zizafasha mu kwigisha urubyiruko ibijyanye n’amateka, abahanzi mu ngeri zitandukanye n’abandi.

Linda Iriza uri mu bategura ‘Amateka Series’ yabwiye IGIHE ko igitekerezo cyo gutangiza uyu mushinga bakigize muri Mutarama 2020.

Ati “Igitekerezo cyo gutangiza ‘Amateka Series’ twakigize muri Mutarama 2020, ubwo twateguraga ibikorwa by’urubyiruko ruba mu Mujyi wa Perth muri Australie. Gutekereza iki gikorwa byatewe n’uko benshi muri twe tutazi byinshi, ndetse hari n’abatazi na bike, ku mateka n’umuco by’u Rwanda.”

Yakomeje avuga ko hahise haduka icyorezo COVID-19 biba ngombwa ko abantu batongera guterana.

Icyo gihe ubwo bari muri ‘guma mu rugo’ ni bwo batangiye gutegura gahunda zose zijyanye n’iki gikorwa ndetse muri Gicurasi 2020 batangira kujya baganira bifashishije ikoranabuhanga.

Muri Kanama 2020, amabwiriza ajyanye no kuguma mu rugo yarorohejwe ndetse hategurwa Umuganura wahujwe na ‘Amateka Series’. Icyo gihe hatumiwemo abantu bakuru batanze ibiganiro ku bijyanye nawo ndetse bababwira amateka yawo byimbitse.

Iriza avuga ko benshi mu rubyiruko ruba muri Perth nibura rwageze muri Australie rufite imyaka itatu ndetse hari n’abahavukiye bituma batagira amahirwe yo kumenya byinshi ku gihugu cyabo cy’inkomoko. Ku bw’iyo mpamvu bashaka kwiga byinshi ku muco Nyarwanda ndetse n’amateka y’igihugu.

Avuga ko bafite intumbero y’uko iki gikorwa kizakomeza ndetse abagitegura bagashishikariza urubyiruko gukora ubushakashatsi, bakandika, bagasangiza abandi ibyo bagezeho kandi bakarushaho kwiga byinshi ku muco wabo.

Ushaka gukomeza kumenya amakuru atandukanye ku bikorwa bitegurwa binyuze mu ‘Amateka Series’ wabasura ku rubuga rwabo.

Jules Sentore ni umwe mu bahanzi bakomeye ku njyana gakondo
Jules Sentore agiye gususurutsa abazakurikira igikorwa cyigisha amateka cyatumiwemo Bamporiki
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza