IGIHE

U Rwanda mu bihugu bikomeje gutera imbere cyane mu bukerarugendo

0 6-04-2019 - saa 12:54, Habimana James

Ibihugu bitatu byo muri Afurika y’Iburasirazuba biri muri 12 bikomeje gutera imbere mu kugira ahantu hakunzwe na ba mukerarugendo.

Raporo y’ikigo gishinzwe iby’ubukerarugendo ku Isi, 2019, yavuze ko Ethiopia aricyo gihugu kirimo gutera imbere mu buryo budasanzwe ku hantu hasurwa na ba mukerarugendo, u Rwanda rukaza ku mwanya wa gatandatu naho Uganda ku wa 12.

Ikinyamakuru The East African cyavuze ko urwego rw’ubukerarugendo muri Ethiopia rwateye imbere ku kigero cya 48.6% mu 2018, rukaba rugize 9.4% by’ubukungu bw’iki guhugu rukanatanga imirimo miliyoni 2.2.

Kugeza ubu abangana na 8% by’abatuye iki gihugu bakora mu rwego rw’ubukerarugendo.

U Rwanda narwo rukomeje gutera imbere mu bukerarugendo, iyi raporo yagaragaje ko ari ku kigero cya 13.8% naho Uganda ikaba kuri 11.3%.

Mu 2018 Kenya nayo yari kuri 5.6%, uru rwego rutangayo imirimo miliyoni 1.46, naho 8.8% by’ubukungu bw’iki gihugu biva mu bukerarugendo.

Mu bihugu 185 byakoreweho ubu bushakashatsi no mu duce 25, byagaragaye ko urwego rw’ubukerarugendo rugize 10.4% by’ubukungu bw’Isi, imirimo ingana na miliyoni 319 niyo yahanzwe.

Iki cyegeranyo kivuga ko urwego rw’ubukerarugendo ruzakomeza gutera imbere mu 2019, nubwo ubukungu bw’Isi bukomeza kugenda ku kigero kiri hasi.

Muri rusange iyi raporo yagaragaje ko mu myaka itanu ishize urwego rw’ubukerarugendo rwagiye rutanga akazi byibuze ku muntu umwe muri batanu.

Mu Ukuboza 2018, u Rwanda rwaje ku rutonde rwakozwe n’ikinyamakuru Forbes, rugaragaza ahantu heza buri wese akwiye gusura mu mwaka wa 2019, akaba yizeye kugira ibihe atazigera yibagirwa.

Ni urutonde rwakozwe nyuma yo kugenzura ibirebana n’ibishya biri aho hantu, umutekano, ibikwiye gusurwa bitarakendera, ibizagusigira urwibutso n’impinduka zikomeye mu buzima bwawe.

Mu gukora uru rutonde umunyamakuru wa Forbes ufite ubunararibonye mu birebana n’inkuru zivuga ku bukerarugendo yanifashishije inararibonye zikora mu bigo bitegura ingendo, dore ko ari nabo baba bazi aho bahanze amaso bifuza ko ababagana berekeza.

U Rwanda kandi rwiyemeje gukora ibishoboka ngo mu 2024 inyungu ruvana mu bukerarugendo izabashe kwikuba kabiri igere kuri miliyoni $800 zivuye ku zigera kuri miliyoni $440 nk’intego rwari rufite mu 2017.

U Rwanda ruzwiho kugira Ingagi zo mu birunga zikundwa na ba mukerarugendo ku Isi
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza