IGIHE

Abahanzi bahimbaza Imana bakusanyije arenga miliyoni 5 Frw yo gufasha Ishimwe wamugajwe n’impanuka

1 10-09-2019 - saa 11:34, Nsengiyumva Emmy

Ku gitekerezo cy’umuhanzi Eddie Mico, abahanzi baririmba indirimbo zihimbaza Imana bakoze igitaramo cyo gutabariza umwana w’umukobwa w’imyaka 10 witwa Ishimwe Esther ufite uburwayi bukomeye yatewe n’impanuka yakoze mu 2018.

Iki gitaramo cyiswe ‘Stand For Esther Charity concert’ cyabereye muri Galaxy Hotel ku wa 8 Nzeri 2019 kuva saa Cyenda n’igice z’amanywa.

Cyari cyatumiwemo abahanzi banyuranye barimo Eddie Mico, The Pink, René Patrick, Aline Gahongayire, James & Daniella, Joy Kaqueen, Dinah Uwera, Colombus, Dj Spin, Kavutse Olivier, Arsene Tuyi, Ashimwe Dorcas n’abandi benshi.

Abacyitabiriye bishyuye 5000 Frw arimo icyo kunywa kidasindisha.

Ishimwe Esther ukomoka i Kabuga mu Mujyi wa Kigali, yahuye n’uburwayi bukomeye yatewe n’impanuka y’imodoka yakoze muri Werurwe 2018 ubwo yavaga ku ishuri arimo gutaha.

Imodoka yamugonze yataye umuhanda imusanga ahagendera abanyamaguru iramukubita agwa ku nkengero z’umuhanda, arakomereka cyane.

Iyo mpanuka yamusigiye uburwayi bukomeye usibye kuvunika amagufa, yanamusigiye ibikomere ku bwonko. Kugeza ubu ntabasha kuvuga ndetse no kugenda.

Umuryango wa Ishimwe wagerageje kumuvuriza mu Rwanda ariko bikomeza kugorana kugeza ubwo bagiriwe inama ko bamujyana kumuvuza mu mahanga.

Abaganga bavuze ko Ishimwe avuriwe mu Buhinde ashobora gukira uburwayi afite. Hakenewe nibura amadolari 20 000 (miliyoni hafi 18 Frw) ngo avurwe.

Ni muri urwo rwego abahanzi baririmba indirimbo zo guhimbaza Imana bishyize hamwe bategura igitaramo cyo gukusanya inkunga yo kuvuza uyu mwana w’umukobwa w’imyaka 10 y’amavuko.

Eddie Mico yatangarije IGIHE muri iki gitaramo hakusanyijwe arenga miliyoni eshanu z’amafaranga y’u Rwanda yo gufasha uyu mwana.

Ati "Muri iki gikorwa twakusanyije asaga miliyoni 2 348 641 Frw n’amadolari ya Amerika 3300 yose wayateranya akavamo arenga 5 000 000 Frw.’’

Muri aya mafaranga yakusanyijwe harimo ayatanzwe ako kanya n’andi abantu biyemeje gutanga mu minsi ya vuba.

Usibye aya mafaranga uyu muhanzi yatangaje ko bagiye gukomeza ubukangurambaga kugeza igihe amafaranga yo kuvuza uyu mwana abonetse.

Mico yashimiye buri wese witanze ngo iki gikorwa kigende neza, ahamya ko ari urugendo bagikomeje kugeza ubwo bazaba bamaze kubona amafaranga yose akenewe.

Abahanzi bahimbaza Imana bakusanyije arenga miliyoni 5 Frw yo gufasha Ishimwe wamugajwe n’impanuka
Iki gitaramo cyitabiriwe n'abantu batari bake
Aline Gahongayire ari mu bahanzi bakunzwe mu muziki uhimbaza Imana bitabiriye iki gitaramo
Ishimwe na we yitabiriye igitaramo cyakusanyirijwemo inkunga yo kumufasha kujya kwivuza
Hashyizweho uburyo bwo gukomeza gufasha uyu mwana urwaye kugira ngo azabashe kujya kwivuza
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
UWINEZA.DAVID 2019-09-10 06:00:35

AMAKURU YA NZARORA.MARCEL

Kwamamaza