IGIHE

APR FC yayoboye urutonde rwa Shampiyona itsinze Bugesera FC y’abakinnyi 10 (Amafoto)

0 8-10-2019 - saa 18:26, Eric Tony Ukurikiyimfura

Igitego kimwe rukumbi cyatsinzwe na Manishimwe Djabel mu gice cya mbere cy’umukino, cyafashije APR FC gutsinda Bugesera FC 1-0 mu mukino w’umunsi wa kabiri wa Shampiyona wabereye kuri Stade ya Bugesera i Nyamata kuri uyu wa Kabiri.

Ikipe y’ingabo yakinnye uyu mukino idafite abarimo Mutsinzi Ange na Buregeya Prince bavunitse ndetse na Sugira Ernest wari wicaye mu bafana, yahushije uburyo bwa mbere ku munota wa gatanu w’umukino ubwo Mugunga Yves yahinduraga umupira washyizwe muri koruneri na Wilondja Jacques.

Bugesera FC yasigaye ari abakinnyi 10 mu kibuga ubwo Peter Otema yahabwaga ikarita itukura akiniye nabi umunyezamu Rwabugiri Umar wari umaze gukuramo umupira watewe na Mustapha Francis ku munota wa gatandatu.

Mugunga Yves yananiwe kandi gutsindira ikipe ye ubwo yari amaze gucenga umunyezamu Kwizera Janvier mu gihe na Nzabanita David yahushije uburyo bwiza ku ruhande rwa Bugesera, aho yateye umupira muremure ugaca ku ruhande rw’izamu.

Manishimwe Djabel yatsinze igitego kimwe cyabonetse muri uyu mukino ku munota wa 33 ku mupira yahawe na Bukuru Christiphe, aroba umunyezamu Kwizera Olivier.

APR FC yashoboraga kubona igitego cya kabiri mu gice cya kabiri, ba rutahizamu bayo barimo Mugunga Yves, Usengimana Danny na Ishimwe Kevin bagorwa n’umunyezamu na ba myugariro ba Bugesera FC.

Bugesera FC yabonye uburyo kwishyura ku mupira w’umuterekano watewe na Shaban Hussein ‘Tchabalala’ wari umaze gukinirwa nabi na Rwabugiri Umar inyuma gato y’urubuga rw’amahina, umupira ufatwa n’uyu munyezamu wa APR FC.

APR FC yahise ifata umwanya wa mbere n’amanota ane, izasubira mu kibuga ku wa Gatandatu mu mukino w’umunsi wa gatatu izakiramo Etincelles mu gihe ku wa Gatanu, Bugesera FC izakirwa na AS Kigali.

Abakinnyi babanjemo ku mpande zombi:

Bugesera FC: Kwizera Janvier, Nzabanita David, Ngarambe Ibrahim, Wilonga Jacques, Rubibi Bonk, Bizimana Joe, Mustapha Francis, Ishimwe Issa Papy, Peter Otema, Shaban Hussein na Jimmy Mbaraga

APR FC: Rwabugiri Umar, Manzi Thierry, Mushimiyimana Mouhamed, Imanishimwe Emmanuel, Omborenga Fitina, Niyonzima Olivier, Bukuru Christophe, Manishimwe Djabel, Byiringiro Lague, Usengimana Danny na Mugunga Yves.

Gahunda y’umunsi wa kabiri wa Shampiyona

Uyu munsi ku wa Kabiri

  • Rayon Sports FC vs AS Kigali (Stade de Kigali, 18h00)
  • Bugesera FC 0-1 APR FC

Ejo ku wa Gatatu

  • Gasogi United vs Marines FC (Stade de Kigali, 15h00)
  • Gicumbi FC vs AS Muhanga (Stade Mumena, 15h00)
  • Musanze FC vs Police FC (Stade Ubworoherane, 15h00)
  • Sunrise FC vs Mukura VS (Stade Nyagatare, 15h00)
  • Espoir FC vs SC Kiyovu (Stade Huye, 15h00)
  • Heroes FC vs Etincelles FC (Stade bugesera, 15h00)
Mustapha Francis yafashe umupira ubwo yari amaze gukinirwa nabi na Djabel
Imanishimwe Emmanuel agerageza gucenga Ishimwe Issa Zappy
Byiringiro Lague agerageza kuroba umunyezamu Kwizera Janvier wari wasohotse

Amafoto: Uwihanganye Hardi

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza