IGIHE

Umubare w’abakoresha WhatsApp wageze kuri miliyari ebyiri

0 13-02-2020 - saa 13:29, Iradukunda Serge

Kugeza ubu hafi kimwe cya gatatu cy’abatuye Isi bari gukoresha urubuga nkoranyambaga rwa WhatsApp.

Sosiyete ya Facebook yatangaje ko umubare w’abantu bakoresha WhatsApp hirya no hino ku Isi wazamutse uva ku bantu miliyari 1.5 bayikoreshaga mu 2018 ugera kuri miliyari ebyiri.

Uyu mubare kandi nabwo wari uherutse kuzamuka uva kuri miliyari 1 wariho mu 2016 ugera kuri miliyari 1.5 mu 2018.

Facebook ari nayo ifite WhatsApp mu itangazo yashyize hanze yagaragaje ko nta gahunda ihari yo guhagarika uburyo butanga umutekano ku butumwa bw’abayikoresha buzwi nka ‘End-to-end encryption’

Abashyiraho amategeko na Guverinoma z’ibihugu bitandukanye zakunze kugaragaza ko ubu buryo bwa End to End encryption bubangamira iperereza ku byaha birimo iterabwoba, ikoreshwa ry’abana n’ibindi.

Umuyobozi wa WhatsApp, Will Cathcart, yagize ati “Mu mateka yose y’ikiremwamuntu, abantu bagiye babasha kuvugana hagati yabo mu buryo bw’ibanga kandi ntidutekereza ko ibyo bigomba kuvaho muri sosiyete igezweho.”

Cathcart yongeyeho ko WhatsApp izajya itanga amakuru yifuzwa igihe bizaba byagaragajwe ko ari ingenzi mu iperereza.

Imibare yo mu 2018 igaragaza ko n’umubare w’abakoresha izindi mbuga nkoranyambaga za Sosiyete ya Facebook wazamutse nk’aho ubwayo ikoreshwa n’abagera kuri miliyari 2.5 mu gihe Instagram yo ikoreshwa na miliyari imwe.

Umubare w’abakoresha WhatsApp wageze kuri miliyari ebyiri
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza