IGIHE

Perezida Kagame yavuze ko u Rwanda rushikamye ku ngamba rwihaye zo kugabanya imyuka yangiza ikirere

0 13-12-2020 - saa 12:45, Uwimana Abraham

Perezida wa Repubulika Paul Kagame yongeye guhamya ingamba u Rwanda rwihaye mu guhangana n’ihindagurika ry’ikirere, zirimo kugabanya imyuka ihumanya ikirere ku kigero cya 38% mu myaka 10 iri imbere, ndetse no kwitabira gukoresha ikoranabuhanga rifasha mu kutangiza ibidukikije.

Ibi Perezida Kagame yabitangarije mu Nama Mpuzamahanga yiga ku Bikorwa Ntangarugero ku Ihindagurika ry’Ikirere (Climate Ambition Summit), yabaye ku wa 12 Ukuboza 2020 hifashishijwe ikoranabuhanga, ikaba yarateguwe ku bufatanye bwa Chile, u Bufaransa, u Butaliyani, n’u Bwongereza, ikitabirwa n’abakuru b’ibihugu na za guverinoma batandukanye.

Perezida Kagame yavuze ko kuva muri Gicurasi uyu mwaka, u Rwanda rwatangaje ingamba zivuguruye kandi ntangarugero rwiyemeje mu guhangana n’ihindagurika ry’ikirere, nk’uko bikubiye mu masezerano y’i Paris, avuga ko ari ingamba zihuye n’icyerekezo n’ubundi u Rwanda rwihaye.

Yagize ati “Izi ngamba zerekana icyerekezo cy’u Rwanda cyo kuzaba ari igihugu giteye imbere, kandi gifite ibipimo biri hasi by’imyuka ihumanya ikirere bitarenze umwaka wa 2050.”

Yongeyeho ati “Dufite kandi gahunda yo kugabanya imyuka ihumanya yoherezwa mu kirere ku kigero cya 38% bitarenze mu 2030, ugereranyije n’aho duhagaze kuri ubu.”

Yavuze ko ibi bizagerwaho binyuze mu kunoza uburyo bwo gutunganya ingufu, gukoresha inganda neza, gucunga imyanda, ubwikorezi ndetse n’ubuhinzi, ibi ngo bikazatuma imyuka ihumanya ikirere bigabanukaho toni miliyoni 4,6.

Perezida Kagame yavuze ko kwita ku kurengera ibidukikije hagabanywa imyuka ihumanya ikirere, ndetse hanarindwa urusobe rw’ibinyabuzima ari cyo gisubizo kirambye, ahamya ko u Rwanda rwiyemeje kwitabira gukoresha uburyo bwose bw’ikoranabuhanga ritangiza ikirere.

Ati “Iterambere rigezweho mu gukoresha ingufu kamere, harimo uburyo bwo gukoresha ikoranabuhanga ry’uburyo bwo gukonjesha butangiza ikirere, biratanga icyizere cy’uko kubaka ubukungu butangiza ikirere bishoboka. U Rwanda rushishikariye kwitabira gukoresha iri koranabuhanga ryose.”

Perezida Kagame yabwiye abitabiriye iyi nama ko batagomba kwitesha aya mahirwe yo kugira isi nziza bahangana n’ihindagurika ry’ikirere, avuga ko ibikorwa ntangarugero mu guhangana n’ihindagurika ry’ikirere ari byo bizatuma isi ibaho neza ndetse ikagira uburumbuke kurushaho.

Mu 2016 nibwo u Rwanda rwashyize umukono ku masezerano avuguruye ya Montréal yerekeye gukumira ibintu byangiza akayunguruzo k’imirasire y’izuba, atangira kubahirizwa mu 2017.

Aya masezerano agamije ko ibinyabutabire bya Hydrofluorocarbons (HFCs), akenshi bituruka mu byuma bikonjesha nka za frigo, ibitanga ubuhehere bizwi nka ‘Air Conditioner’ n’ibindi byacika burundu ku Isi, guhagarika ikora n’ikoreshwa ry’iyi myuka bikaba bishobora kugabanya dogere 0.5 ku gipimo mpuzandengo cy’izamuka ry’ubushyuhe bw’Isi mu myaka 100.

Perezida Kagame yavuze ko kwita ku kurengera ibidukikije hagabanywa imyuka ihumanya ikirere, ndetse hanarindwa urusobe rw’ibinyabuzima ari cyo gisubizo kirambye ku kurandura ingaruka z'imihindagurikire y'ibihe
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza