IGIHE

Isuri, imihindagurikire y’ibihe: Bimwe mu bibangamiye imisozi yo mu Rwanda

0 13-12-2020 - saa 09:30, IGIHE

Ubuhinzi butanoze, Isuri, ikoreshwa ry’ifumbire mvaruganda ndetse n’imihindagurikire y’ibihe ni bimwe mu byagaragajwe nk’ibibangamiye imisozi yo mu Rwanda muri iki gihe.

Byagarutsweho kuwa Gatanu tariki 11 Ukuboza 2020 ubwo hizihizwaga umunsi mpuzamahanga wahariwe imisozi.

Hagiye hagaragazwa ko buri mwaka u Rwanda rutakaza toni zisaga ibihumbi 40 z’ubutaka zitwarwa n’isuri.

Umuyobozi Mukuru w’Umuryango utegamiye kuri leta ubungabunga ibidukikije ARCOS Network, ari na we wawushinze Dr. Sam Kanyamibwa yavuze ko hakenewe ingufu za buri wese kugira ngo imisozi y’u Rwanda ikomeze kuba myiza, iteze imbere abayikoresha ari nako hakomeza kubungabungwa ibidukikije biyibonekaho.

Yagize ati “Imisozi yugarijwe n’ibibazo bijyanye n’ubuhinzi butanoze butuma isuri ikomeza kwangiza imisozi. Ubuhinzi usanga bushyira ingufu mu gukoresha ifumbire mvaruganda. Yego itanga umusaruro ariko igasiga yangije ubutaka, ibi rero hakiyongeraho ko turi benshi hamwe n’imindagurikire y’ikirere bikarushaho kuba bibi cyane.”

Uwo muryango ufatanyije n’abandi bafatanyabikorwa, bafite gahunda yo gutera ibiti bivangwa n’imyaka no gufasha abaturage guhinga ku buryo bunoze.

Dr Kanyamibwa yagize ati “ Ni byiza ko abaturage babona umusaruro mwiza ariko batangiza ibidukikije. Gutera ibiti no guhinga neza bituma ubutaka bumererwa neza bikarwanya na cya kibazo cy’isuri.”

Mu guharanira ko imisozi y’u Rwanda ihora itoshye, Dr Kanyamibwa yavuze ko bakorana n’ingo z’abaturage bageze kuri 30,000. Abo baturage bose baba bari mu muryango w’Inshuti z’Ibidukikije’ cyangwa se ’’Friends of Nature Association’’.

Ati “Abaturage bose dukorana tubashyira mu matsinda matoya y’abantu nka 30 maze tukabahugura tukoresheje uburyo ARCOS Network yashyizeho twita BEST (B=Building sustainable institutions) aho duha ya matsinda kugira imikorere myiza n’ubuyobozi bunoze; abaturage bakumva neza ibyo kubungabunga ibidukikije kandi bakabishyira mu bikorwa; tubafasha no gukora imishinga ibaha inyungu bivuye mu bidukikije ahanini.”

Kanyamibwa yavuze ko mu gihe muryango ayoboye wizihiza imyaka 25 umaze ubayeho, intego ari ugukomeza gufatanya na Leta kurushaho gukaza ingamba zigamije kubungabunga ibidukikije.

U Rwanda ni kimwe mu bihugu bigizwe n’imisozi. Mu gihe iyo misozi ititaweho hakunze kugaragara ibibazo by’isura bitwara ubutaka ndetse hamwe na hamwe bigasenya inzu z’abaturage.

Ingaruka ziterwa n’iyangirika ry’imisozi n’amashyamba zirimo itakara ry’uburumbuke bw’ubutaka, kubura ingufu zituruka ku mashyamba n’ibindi nk’uko uyu muyobozi yabitangaje.

Kugeza ubu 30% by’ubuso bw’u Rwanda bugizwe n’amashyamba ariko hakenewe kuguma guterwa ibiti byinshi mu gihugu, cyane cyane mu bice by’inzuri, imisozi, impande y’imigezi, ku mihanda no guteza imbere ubuhinzi bw’amashyamba.

Umuyobozi Mukuru wa ARCOS Network, Dr Kanyamibwa yavuze ko hakenewe uruhare rwa buri wese ngo hahashywe ibibazo byugarije imisozi y'u Rwanda
Abaturage nibo basabwa uruhare runini mu kubungabunga imisozi batuyeho bayiteraho ibiti
U Rwanda ni kimwe mu bihugu bigizwe n'imisozi myiza, bisabwa kuyibungabunga
Ibirunga by'u Rwanda birufatiye runini ariko byakunze kuvugwaho kuba isoko y'amazi menshi rimwe na rimwe yangiriza abaturage kuko batashyizeho uburyo buhamye bwo gufata no kuyobora amazi abiturukaho
Kugeza ubu 30 % by'ubuso bw'u Rwanda buteyeho amashyamba
Umuryango ARCOS Network wizihiza imyaka 25 ishize ushinzwe, wiyemeje kurushaho gufatanya na Leta n'abaturage mu kubungabunga ibidukikije
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza