IGIHE

Ikigo cya Ellen DeGeneres mu Rwanda kizafungura amarembo guhera muri Nzeri 2021

0 6-01-2021 - saa 14:39, Uwimana Abraham

Ikigega “The Ellen Fund” cy’Umunyamerikakazi Ellen DeGeneres cyatangaje ko guhera muri Nzeri uyu mwaka wa 2021, ikigo yubatse mu Rwanda, Ellen DeGeneres Campus, kigamije kubungabunga ingagi zo mu birunga, ari bwo kizugurura amarembo.

DeGeneres ni umugore w’imyaka 61 wamamaye muri Leta Zunze Ubumwe za Amerika kubera ikiganiro cyamwitiriwe kuri Televiziyo kizwi nka ‘The Ellen DeGeneres Show’.

Kuva muri Gashyantare 2019 nibwo mu Kinigi mu Karere ka Musanze, hatangiye imirimo yo kubaka ‘Ellen DeGeneres Campus’ yari yaremeye kubaka mu Rwanda.

Icyo kigo ni impano yahawe n’umufasha we Portia de Rossi (bombi babana ari abagore), ubwo yuzuzaga imyaka 60 y’amavuko.

Ellen usanzwe yarihebeye kubungabunga inyamaswa, amaze guhabwa iyo mpano yahise aza mu Rwanda kwirebera ibikorwa bya Dian Fossey mu kubungabunga ingagi zo mu birunga.

Yahise atangira ibikorwa byo gukusanya inkunga igamije gushinga ikigo mu Rwanda kizibanda ku bushakashatsi bugamije kubungabunga ingagi zo mu misozi miremire ziri gukendera ku Isi.

Muri Gicurasi 2018, nibwo Ellen ufata Fossey nk’icyitegererezo mu buzima bwe yaje mu Rwanda nabwo ari kumwe na Portia de Rossi. Ni uruzinduko yatangaje ko rwahinduye ubuzima bwe dore ko yanakabije inzozi zo kubona ingagi yari amaranye igihe kitari igito.

Yagize ati “Biragoye gusobanura uburyo ibihe byiza nahagiriye byari bimeze. Nubona amahirwe yo kujya mu Rwanda uzayakoreshe. Igihugu ni cyiza, abaturage beza, abantu bavugaga ko iyo ugiye kureba ingagi uba uzegereye, ibi kandi nibyo.”

Ellen DeGeneres Campus niyo izaba irimo ibiro by’Ikigega Dian Fossey Gorilla Fund kimaze imyaka isaga 50 gikorera mu Rwanda binyuze mu gashami kacyo gashinzwe ubushakashatsi ka Karisoke Research Centre mu Karere ka Musanze.

Kizaba kirimo laboratwari, ibyumba by’inama, ibyo kwigishirizamo n’inzu ndangamateka ivuga kuri Dian Fossey wishwe mu Ukuboza 1985.

Mu 1963 Dian Fossey yatangiye urugendo muri Afurika, aho yafashe amafaranga yabitse, agasaba n’inguzanyo mu mabanki, akazenguruka muri pariki nyinshi zo muri Afurika.

Agendeye ku bushakashatsi bwakozwe n’Abanyamerika, ku nyamaswa mu 1959 ku ngagi zo mu misozi miremire, yiyemeje na we gukora ubundi. Ni umwe mu bantu bakoze ibikorwa bikomeye mu Rwanda mu kubungabunga ingagi hakaba hari n’ikigo gikora ibikorwa nk’ibi cyamwitiriwe.

Bitewe n’uburyo yakundaga Dian Fossey, Portia de Rossi yahisemo guha Ellen DeGeneres impano irimo kubaka mu Rwanda inyubako zigamije gufasha abakorera muri Dian Fossey Gorillas Fund mu bikorwa by’ubushakashatsi. Izi nyubako zizitwa ‘Ellen DeGeneres Campus of The Dian Fossey Gorilla Fund’, ni aho umushinga wahereye.

Amateka avunaguye ya Ellen Lee DeGeneres

Ellen Lee DeGeneres ni umunyarwenya, umukinnyi n’umuyobozi wa filime, umwanditsi, umukozi wa televiziyo wavukiye i Metairie muri Leta ya Louisiana, imwe mu zigize Leta Zunze Ubumwe za Amerika.

Yatangiye kuba umunyarwenya wabigize umwuga mu ntangiriro za 1980, aho yazengurutse igihugu cyose akora ibitaramo byo gusetsa, byaje gutuma mu 1982 ahabwa igihembo nk’umuntu wa mbere uzi gutera urwenya.

Kuva mu 1994-1998 yagaragaye mu kiganiro ‘The Ellen’, mu 2003 aza gutangira ikiganiro ‘The Ellen DeGeneres Show’, kigikunzwe n’uyu munsi, kikaba kigaragaramo ibyamamare ndetse n’abantu bakomeye ku Isi.

DeGeneres umaze kwandika ibitabo bine no kwegukana ibihembo byinshi birimo n’ibya Emmy Awards 30. Mu 2016 yashimiwe na Barack Obama wari Perezida wa Amerika, ahabwa umudali uzwi nka ‘Presidential Medal of Freedom’, uza ku rwego rwo hejuru mu mashimwe ahabwa abasivili.

Igishushanyo mbonera cy'Ikigo Ellen DeGeneres kizatahwa mu Rwanda
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza