IGIHE

Byinshi kuri Banki yihariye izatera inkunga imishinga irengera ibidukikije mu Rwanda

1 13-01-2020 - saa 08:11, Nkurunziza Ferdinand

U Rwanda rwiyemeje gushyira ingufu zishoboka mu kurengera ibidukikije zirimo ishyirwaho rya banki itera inkunga imishinga iri muri uru rwego.

Iyi banki biteganywa ko izitwa ‘Rwanda Catalytic Green Investment Bank’, yitezweho kongera amafaranga yashorwaga mu mishinga igamije kurengera ibidukikije mu gihugu.

Izaba ikora nk’izindi banki ariko yibanda gusa ku gutanga inguzanyo no gushora imari yayo mu mishinga igamije kurengera ibidukikije.

Uru rwego rw’imari ruteganywa gushyirwaho, ruzafasha mu gukangurira ibigo byigenga gushyigikira ishyirwa mu bikorwa ry’imishinga itangiza ibidukikije mu gihugu.

Umukozi ushinzwe itumanaho mu kigega cya leta gisanzwe gitera inkunga imishinga irengera ibidukikije (Fonerwa), Doreen Nakure, yabwiye IGIHE ko Fonerwa ari yo ishinzwe gukurikirana by’umwihariko ishyirwaho ry’iyo banki, cyamaze gushyiraho itsinda ry’inzobere rizatanga ishusho nyayo y’imiterere n’imikorere y’iyo banki mu gihe cya vuba.

Ati “Ubu twamaze guha akazi umuryango ‘Coalition for Green Capital’ kizadusesengurira ndetse kikaduha imiterere y’ishusho y’iyo banki ku rwego mpuzamahanga. Ibijyanye n’ingano y’amafaranga iyo banki izatangiza bizagaragazwa n’inyigo iri gukorwa n’icyo kigo gifatanyije n’abandi bafatanyabikorwa.”

The Coalition for Green Capital ni umuryango udaharanira inyungu, wibanda cyane ku guteza imbere isoko ry’ingufu zidahumanya, binyuze mu gushyiraho banki ziteza imbere imishinga irengera ibidukikije.

Kuva mu mwaka wa 2009, uyu muryango ufatanya n’ibihugu, ndetse n’imiryango itari iya Leta gushyiraho ibigo by’imari bishyigikira imishinga migari irengera ibidukikije, kigakora ubuvugizi, ndetse kigatanga ubujyanama n’ubugenzuzi mu mikorere y’ibyo bigo.

Kugeza ubu ntibirasobanuka neza niba iyi banki izaba ari iya Leta cyangwa iy’abikorera; gusa Nakure avuga ko bizaterwa n’ibintu byinshi bikiri kuganirwaho ubu, ariko akagaragaza ko byagakwiye kuba igikorwa cy’abikorera.

Iyi banki nitangira, izajya itera inkunga imishinga ya Leta n’abikorera igamije kurengera ibidukikije, habanje kurebwa niba yujuje ibisabwa.

Nakure avuga ko iki gitekerezo cyo gushyiraho iyi banki kiri gushingira ku mahame yihariye ajyanye no kugena uburyo bwo kwifatira ibyemezo mu ishoramari, ubushobozi bwo kwiyongerera imari ivuye mu bigo by’imari ndetse no mu bikorera, hashingiwe cyane cyane ku bikorwa by’indashyikirwa bya banki mpuzamahanga zitera inkunga imishinga irengera ibidukikije, ubufasha bwa Fonerwa ndetse n’abandi bagira uruhare muri iri soko.

Amakuru ajyanye n’itangizwa ry’iyi banki mu Rwanda yatangarijwe bwa mbere mu kiganiro cyatangiwe mu nama ya Cop 25 iherutse kubera muri Espagne mu mpera z’umwaka ushize yigaga ku ruhare rwa banki zigamije guteza imbere ibidukikije mu gutuma ibihugu bigera ku ntego zabyo.

Igitekerezo cyo gushyiraho banki nyarwanda itera inkunga imishinga irengera ibidukikije, kije nyuma y’uko Afurika y’Epfo na yo yashyizeho iyo banki ifite imari shingiro ya miliyoni 100 z’amadorali ya Amerika.

Umuyobozi ushinzwe ibijyanye n’imihindagurikire y’ikirere muri Banki Nyafurika itsura Amajyambere (AfDB), Anthony Nyon, ubwo yari mu nama ya COP 25, yatangaje ko hakenewe ingamba zihamye mu guhanga ikoranabuhanga rishya rigamije guhangana n’ibibazo by’imihindagurikire y’ibihe.

Ati “Ku bw’iyo mpamvu, Banki Nyafurika itsura Amajyambere, binyuze mu bufasha bw’ikigega kigamije kurengera ibidukikije, iri gukorana n’ihuriro rya banki zigamije kurengera ibidukikije mu kureba uburyo butandukanye bwo gushyira igishoro mu bikorwa bifasha kurengera ibidukikije ku rwego rwo hasi, ari na ko tuzamura uruhare rw’abikorera.”

Leta yashyizeho ikigega Fonerwa cyahawe inshingano zo gufasha u Rwanda kugera ku bukungu butangiza ibidukikije binyuze mu gutera inkunga imishinga ya Leta n’abikorera iri muri uyu murongo.

Kuva iki kigega cyashingwa muri 2013, hahanzwe imirimo 138 000 itangiza ibidukikije. Mu 2017, habarurwaga ko ubutaka bungana na hegitari 21 847 bwatunganyijwe hagamijwe kwirinda ko butwarwa n’isuri ndetse hegitari 12 998 z’inkombe n’imigezi n’ibiyaga zarasubiranyijwe, hegitari 41 116 ziterwaho amashyamba, ndetse imiryango 65,340 ifashwa kubona ingufu zikomoka ku mirasire y’izuba mu gihe toni miliyoni 65 z’imyuka ihumanya ikirere zakumiriwe.

Icyo gihe Fonerwa yari imaze gutanga inkunga ya miliyoni 100 z’amadorali, iyi nkunga ikaba ihabwa imishinga yatsinze binyuze mu marushanwa.

Umushinga w’uruganda rw’amashanyarazi rutanga megawati 8.5 ruri mu karere ka Rwamagana, ni urugero rwiza rw’ishoramari ryakozwe mu rwego rwo kurengera ibidukikije.

U Rwanda rwihaye intego ko mu 2050, ruzaba rwagabanyije umwuka uhumanya ikirere ku rugero rwifuzwa.

Imishinga igamije kurengera ibidukikije niyo izajya iterwa inkunga n'iyi banki
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
#gukunda igihugu# 2020-01-13 01:29:09

Bihutishe iki gikorwa dutangemo imishinga myiza turyamanye ahubwo baradutindiye.
ukora umushinga wajya murwego rubishinzwe bakakubwira ngo bazohereza abatechnicien ugategereza ugakukirwamo.hari ahantu nadepoje dossiye nanubu ubanza barayibitse mukabati.nari nacitse intege ariko ibyiyi bank biranshimishije reka dutegereze.

Kwamamaza