IGIHE

Kigali: Hakozwe ikoranabuhanga rikoresha ibiri mu nzu bidasabye gukoresha imbaraga

13 13-08-2019 - saa 13:58, Iradukunda Serge

Bitewe n’imyubakire yo mu gihe cyashize itarahaga umwanya ikoranabuhanga usanga hari imirimo imwe n’imwe umuntu agikora mu nzu ye bimugoye nko kuzimya amatara, gukonjesha cyangwa gushyushya mu nzu ndetse akenshi bigasaba kuba ahibereye.

Urubyiruko rubarizwa muri Sosiyete Inuma Technology rwaje gusanga hifashishijwe ikoranabuhanga iyi mibereho ikwiye guhinduka.

Nyuma y’imyaka itandatu biga ku cyo bakora ngo bakemure iki kibazo, ubu bavumbuye uburyo iyo mirimo yose ishobora koroshywa binyuze mu buryo bw’ikoranabuhanga bushyirwa mu nzu, ukabasha kugenzura ibikorwa byose byo mu nzu yawe hadakoreshejwe imbaraga, uburyo bise ‘Smart House’.

Mu kiganiro na IGIHE, Umuyobozi wa Inuma Technolog, Ndayishimiye David, yavuze ku mikorere y’iri koranabuhanga.

Yagize ati “Inzu ikoresha ikoranabuhanga ikora mu buryo bw’ibikoresho by’ikoranabuhanga bishyirwa mu nzu ikabasha kugira imikorere iteye imbere ndetse ukaba wabasha kugenzura ibiyikorerwamo n’ubwo waba utayirimo.”

Ni ikoranabuhanga rishyirwa mu nzu yawe, rigahuzwa na telefoni ngendanwa ku buryo ushobora kwicara ku kazi ukamenya ko umuntu yinjiye iwawe, ushobora kuzimya amatara yo mu byumba byose bitabaye ngombwa ko ubyinjiramo, ushobora gukonjesha ibiri muri firigo yawe uri ku kazi, inzu ishobora gushyirwamo ubukonje hakoreshejwe amatara n’ibindi.

Ndayishimiye yavuze ko igitekerezo cyo gukora uyu mushinga w’ikoranabuhanga cyaturutse ku buryo babonaga hari ibintu byinshi bitwara umwanya w’umuntu kandi byoroshye kubikora udatakaje igihe.

Ati “Nk’ahantu nagiye niga habaga hari umuntu ushinzwe kuzimya amatara, akabyuka mu gitondo azenguruka yabyibagirwa bigapfa. No muri kaminuza naho nagiye mbibona ugasanga naho hari umuntu ushinzwe kubyuka azimya amatara”.

Ubu buryo aba basore batangije, bushobora no kwifashisha ijwi, aho uvuga icyo ushaka ko inzu ikora bitewe n’uburyo ikoranabuhanga bagushyiriyemo rimeze bikikora.

Ati “Ni inzu yubatse mu buryo bugezweho muba mushobora kugirana ikiganiro, kuba wayivugisha ikaba yamenya ibyo wifuza”.

Iri koranabuhanga rishyirwa mu nzu rifasha kurondereza umuriro w’amashanyarazi kuko icyumba gishobora no kwaka gusa iyo winjiyemo wakivamo kikazima.

Ku bantu kandi bakunda imyidagaduro iri koranabuhanga rifasha kuba buri muntu uri mu nzu yacuranga umuziki ashaka kumva atabangamiye undi. Ni ukuvuga ko inzu ifite ibyumba bitandukanye, buri wese yabasha kumva umuziki ashaka ndetse yakwimukira no mu kindi cyumba uwo muziki ukamuherekeza agakomeza kuwumva.

Ndayishimiye yavuze ko nta we bahanganye ku isoko kuko ibyo bakora byihariye.

Ati “Ibyo twagiye tubona bihari ntabwo ari ibintu ushobora kuvuga uti njye ndashaka ibi cyangwa munshyiremo ibi. Ikindi ibindi bihari hafi ya byose bisaba internet ariko ibyacu twashatse uburyo nta internet.”

Uretse gutanga ibisubizo bigendanye n’ikoranabuhanga, uyu mushinga watanze n’akazi dore ko kuri ubu Inuma Technology ikoresha abakozi 13.

Ndizeye Jean De Dieu umaze amezi umunani ari Umuyobozi ushinzwe Ibikorwa muri iyi sosiyete asanga irikoranabuhanga hari icyo rizahindura mu buryo abantu basanzwe babayeho.

Ati “Iki gikorwa cy’inzu ikoresha ikoranabuhanga ni bumwe mu buryo bwo kuzamura imibereho y’abantu bigendanye n’igihe kigizweho.”

Yavuze ko inzu zose bishoboka ko zashyirwamo iryo koranabuhanga kandi izisanzwe zubatse ntibigombera kubanza kuzisenya.

Kuri ubu iri koranabuhanga bamaze kurishyira mu nzu ebyiri ariko bakaba bafite intego y’uko byagera mu 2020 nibura mu Rwanda hari umubare munini w’abantu bafite ubu bwoko bw’ikoranabuhanga mu nzu zabo.

Bamwe mu bashinze n'abakozi ba Inuma Technology
Ndayishimiye yavuze ko igitekerezo cyo gukora uyu mushinga w’ikoranabuhanga cyaturutse ku buryo babonaga hari ibintu byinshi bitwara umwanya w’umuntu kandi byoroshye kubikora udatakaje igihe
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2  

1
Moise 2019-08-14 13:45:32

Mukomezaho Evangelists, Nibindi Holy Spirirt azabibagezaho pee!

2
Ngombwa 2019-08-14 08:32:04

Aba bana nikitegererezo kurundi rubyiruko n’abahanga ntekerezako ibyo bavuga bakoze twabisobanurirwa neza kuko numva harimo nkibikoresha AI idasanzwe. Ese bakorera hehe kuburyo twabagana

3
Kevine 2019-08-14 08:27:39

Wow that is pretty amazing... Proud of you guys!

4
mr.alex 2019-08-14 05:58:01

Nibyiza cyane kandi abanyarwanda barabikeneye kuko nintabwe nziza muri technology yaba itewe bityo na Africa muri rusange ikabigira mu mazu yabo ntibigume aho muri Europe na America gusa. Africa we must rise again and These Young Rwandans are the heart of this smart living houses! Big courage bana b’U Rwanda. Turabemera cyane

5
Justin 2019-08-14 03:40:55

Urubyiruko nkuru nirwo dukene mu Rwanda pe, batekereza kure, jyewe narinsazwe mbazi kuko mwijyeze kunfasha kugutumiza ibintu kuri amazon muri America, nzabasura ndebe nibyo bindi mwatuzaniye byinzu izi ubwejye, abafite ikorana buhanga ndetse nurubyiruko mushingano babafashe ubundi bijyere kure ndetse nindi mishinga mufite.

6
bro 2019-08-13 12:11:35

ninkamwe rubyiruko dukeneye mwiki gihe p mukomerezaho,mufite na customer care nziza cyane ...service yanyu yo kutugezaho ibintu tuguriye amazon ni nziza cyane

7
rwanda 2019-08-13 09:07:16

ibi ndabona ntacyo byamarira abathrage

8
Isaie 2019-08-13 08:59:30

Nshimiye iritsinda ryatekereje uyumushinga nimwiza cyane.Nabasaba kubishyiramubikorwa vuba kuko nikenshi twagiye twumva abantu bavumbuye ikoranabuhanga urugero :gukoma amashyi amatara akizimya,hari abavumbuye kuba wakoresha amazi ya WASAC bitewe n’umubare w’amafranga washyizemo nkuko bigenda kumuriro etc..... ariko bikarangira tubyumva mubinyamakuru kandi mubyukuri bikenewe.Rero nabasaba kubishyira mubikorwa vuba kdi bakabihendura kuburyo bigera kuribenshi.

Ikindi nasaba Minisiteri y’ikoranabuhanga na innovation kujyabakurikirana bene ababantu bavumbuye ikoranabuhanga runaka bakabafasha kudevelopa umushinga ibyo byatuma igihugu cyihuta mu ikoranabuhanga.Murakoze

9
bigtime 2019-08-13 08:41:34

iyo technology nta myaka 6 wayitekerezaho kuko hanze nka za europe izo system zirakora cane bazita smart house izo software nazo ni ama home assistant so aho kabisa ntavumburwa ryakozwe: hari iyitwa Amazon hakaba niyitwa Siri aya Apple google ifite iyayo microsoft nuko nguko.

10
otis 2019-08-13 08:38:06

Ibise biba mu Rwanda ra?!!!!!!!

Paji: 1 | 2  

Kwamamaza