IGIHE

Inama mpuzamahanga y’uburezi yateguwe na PIASS yitezweho impinduka mu myigishirize

2 14-02-2020 - saa 10:31, Prudence Kwizera

Abahanga mu burezi bo mu Rwanda n’abo mu bihugu bitandukanye byo ku mugabane wa Afurika ndetse no muri Kaminuza ya Bamberg yo mu Budage bateraniye i Huye mu nama mpuzamahanga yiga ku burezi hagamijwe kubujyanisha n’imiterere y’Isi y’iki gihe yabaye nk’umudugudu kubera ikoranabuhanga n’ikomatanya-bukungu.

Iyo nama y’iminsi ibiri yasojwe kuri uyu wa Kane yateguwe ku bufatanye bw’Ishuri Rikuru ry’Abaporotesitanti mu Rwanda, PIASS, na Kaminuza ya Bamberg yo mu Budage; iterwa inkunga n’Umuryango "Bread for the World" wo mu Budage. Yitabiriwe n’abagera ku 140 baturutse mu bihugu 12.

Bakoze ibiganiro-mpaka barebera hamwe uko uburezi butangwa muri iki gihe n’icyakorwa ngo butezwe imbere butegure abanyeshuri babasha kumva no gusubiza ibibazo bigaragara ku Isi.

Umuyobozi Mukuru wa PIASS, Rev. Prof Elisé Musemakweli, yavuze ko kuri iyi nshuro bahisemo kurebera hamwe uko uburezi bw’iki gihe bwatangwa hagendewe ku bigezweho n’imiterere y’Isi.

Ati “Tugamije kurebera hamwe uburezi dutanga muri iki gihe muri iyi Si yabaye nk’umudugudu, Isi y’ikoranabuhanga na tekinoloji, uruhare bugira mu kumenya neza ibibazo bihari n’uko byakemuka. Twagize abahanga muri byo batanga ibiganiro byerekana uko uburezi bukwiye kwifata.”

Mu batanze ibiganiro harimo umushakashatsi ku bijyanye n’imyigishirize n’imyigire bifite ireme by’umwihariko ku bihugu biri munsi y’ubutayu bwa Sahara, Prof. Dr Annette Scheunpflug wo muri Kaminuza ya Bamberg.

Prof Musemakweli yakomeje avuga ko babyitezeho umusaruro mwiza kandi nabo bazakomeza gukurikirana kugira ngo bigerweho.

Ati “Ikintu cy’ingenzi cyavuye muri iyi nama ni uko abayitabiriye biyemeje kujya guhindura imyigishirize ariko na PIASS ikabibafashamo kuko hari abo twigisha mu ishami ry’uburezi ariko hari n’amahugurwa dutegura kuri bo.”

Guverineri w’Intara y’Amajyepfo, CG Gasana Emmanuel, afungura iyo nama ku mugaragaro yashimiye abayiteguye avuga ko ari ingirakamaro kuko uburezi bufite ireme ari umusingi w’iterambere, imibereho myiza y’abaturage no kubasha gukemura ibibazo bihari.

Ati “Igihe tugezemo ni igihe gisaba kugira icyo uzi n’uko ukizi, igihugu gifite abagituye bagomba kugira ubumenyi bakagira n’uburyo bwo kubukoresha neza kugira ngo bugirire akamaro abandi. Igihugu kidafite abantu bafite ubumenyi bakoresha neza kirazima, iyo udafite icyo uzi uyu munsi cyangwa udafite ubumenyi, uba ufite ibibazo bikomeye cyane.”

Baganiriye kandi ku myigishirize ikwiye muri iki gihe basanga abanyeshuri bakwiye kwigishwa bakaguka mu bitekerezo bagahabwa ubushobozi bwo guhangana ku masoko mpuzamahanga aho gutegereza gushakira akazi mu bihugu byabo gusa.

Prof Musemakweli yavuze ko PIASS yatekereje no ku kibazo cy’indimi gikunze kuba imbogamizi kuri bamwe bigatuma batibona mu ruhando mpuzamahanga cyangwa batabasha gusobanura no gusangiza abandi ibyo bazi.

Ati “Umuntu atazi ururimi biragoye kugira ngo abashe kuganira n’undi amenye ibimurimo n’ibyo amwigiraho, ni yo mpamvu icyo kintu kigomba kwitabwaho. Hano muri PIASS twatangije ikigo cyigisha indimi ku buryo abanyeshuri bacu tubanza kubaha ibizamini kugira ngo tumenye urwego bariho tubigishe.”

Iyo nama kandi yitabiriwe n’abayobozi b’ibigo by’amashuri nderabarezi (TTC); abayobozi b’amashuri yisumbuye y’idini ry’Abapolotesitanti ndetse n’abandi bashinzwe uburezi.

Bamwe mu bayitabiriye bavuze ko yabafashije kongera gusubiza amaso inyuma bareba niba ibyo bigisha bijyanye n’igihe.

Umwarimu muri PIASS, Umuziranenge Gloriose ati “Ni ukongera kureba ibyo twigisha niba bitanga imyumvire ikenewe cyangwa bifasha abo twigisha kugira ubushobozi bwo kumenya ibibazo biri ku isi n’uko babikemura.”

Iyo nama mpuzamahanga ibaye ku nshuro ya kane; PIASS ikaba yariyemeje kujya iyikora rimwe mu myaka ibiri.

Abahanga mu burezi bo mu Rwanda n’abo mu bihugu bitandukanye byo ku mugabane wa Afurika ndetse no muri Kaminuza ya Bamberg yo mu Budage bateraniye i Huye mu nama mpuzamahanga yiga ku burezi
Baganiriye no ku myigishirize ikwiye muri iki gihe basanga abanyeshuri bakwiye kwigishwa bakaguka mu bitekerezo bagahabwa ubushobozi bwo guhangana ku masoko mpuzamahanga aho gutegereza gushakira akazi mu bihugu byabo gusa
Bakoze ibiganiro-mpaka barebera hamwe uko uburezi butangwa muri iki gihe n’icyakorwa ngo butezwe imbere
Bamwe mu bayitabiriye bavuze ko yabafashije kongera gusubiza amaso inyuma bareba niba ibyo bigisha bijyanye n’igihe
Bavuze ko ibyaganiriweho babyitezeho umusaruro mwiza kandi nabo bazakomeza gukurikirana kugira ngo bigerweho
Inama mpuzamahanga ku burezi yateguwe na PIASS yitezweho impinduka mu myigishirize
Iyi nama yatewe inkunga n'Umuryango Bread for the World wo mu Budage
Iyo nama kandi yitabiriwe n’abayobozi b’ibigo by’amashuri nderabarezi (TTC)_ abayobozi b’amashuri yisumbuye y’idini ry’Abapolotesitanti ndetse n’abandi bashinzwe uburezi
Iyo nama y’iminsi ibiri yasojwe kuri uyu wa Kane yateguwe ku bufatanye bw’Ishuri Rikuru ry’Abaporotesitanti mu Rwanda, PIASS, na Kaminuza ya Bamberg yo mu Budage
Umushakashatsi ku bijyanye n'imyigishirize n’imyigire bifite ireme, Prof. Dr Annette Scheunpflug wo muri Kaminuza ya Bamberg atanga ikiganiro
Guverineri w’Intara y’Amajyepfo, CG Gasana Emmanuel, afungura iyo nama ku mugaragaro yashimiye abayiteguye avuga ko ari ingirakamaro kuko uburezi bufite ireme ari umusingi w’iterambere n'imibereho myiza y’abaturage
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Claude 2020-02-14 16:29:31

Nibyo PIASS ni ishuli ryiza rifite icyerekezo

2
Best Future from Today - BFT 2020-02-14 06:22:52

PIASS Turabashuimira uruhare bagira mu iterambere ry’uburezi, amatorero n’isi muri rusange

Kwamamaza