IGIHE

Impinduka mu buzima bw’ababyeyi b’Intwaza mu myaka itanu batujwe mu Mpinganzima (Amafoto na Video)

4 9-10-2019 - saa 11:22, Twarabanye Venuste

Jenoside yakorewe Abatutsi yagize ingaruka ku buzima bw’igihugu n’abagituye, yagize benshi impfubyi, abandi baba abapfakazi bisanze mu buzima bw’ingume batagizemo uruhare.

Ababyeyi barokotse Jenoside babanje kwitwa incike kuko bari ba nyakamwe, badafite ubitaho n’umwe ariko binyuze muri gahunda zo kubasajisha neza, bahinduriwe ubuzima, banahabwa izina rishya ry’Intwaza.

Hambere aba babyeyi bibanaga bonyine, bari mu bwigunge kuko imiryango yabo yishwe muri Jenoside.

Mu 2014 nibwo inzu za mbere z’amasaziro y’Intwaza [Impinganzima], zatangiye kubakwa zinatuzwamo abari bamaze kugira intege nke, kandi batagishoboye kugira icyo bikorera, bakoresheje inkunga y’ingoboka bahabwaga n’Ikigega gifasha abacitse ku icumu rya Jenoside (FARG).

Ni umushinga bishimiye kuko bagaragaza ko nubwo basigaye bonyine ariko hari abana babazirikana ndetse n’ubuyobozi bwiza bubaba hafi.

Umuryango Avega-Agahozo uhuriyemo abapfakazi ba Jenoside yakorewe Abatutsi wagaragaje ko hari abanyamuryango bawo bamaze kugera mu za bukuru batagifite imbaraga zo kujyana n’abandi muri gahunda z’iterambere wabafashagamo kuva ushinzwe mu 1995.

Umuyobozi wa AVEGA, Mukabayire Valérie, yabwiye IGIHE ko mu 2013 aribwo babonye ko ikibazo gikomeye basura ababyeyi bose bari bageze mu myaka 65 basanga bakeneye kwitabwaho bari hamwe.

Ubushakashatsi bwakorewe ku banyamuryango 1,462 bwagaragaje ko 89% muri 455 babajijwe bari hejuru y’imyaka 70 y’amavuko, abagera kuri 60% nta muntu bafitanye isano warokotse, 89% bafite ibibazo by’ubuzima n’indwara zidakira.

Yakomeje ati “Ababyeyi bari bageze mu buzima bubi bihebye; kuba Jenoside yarakwiciye abantu bose ukemera ugafata imbaraga zo kubaho ugatwaza ukemera kwiyubaka, kwihangana ugafatanya n’abandi kubaka igihugu byagera aho ugatangira kubona koko ko Jenoside yakumazeho abantu. Barabibonaga ariko mu gihe yari agifite imbaraga zo kwikorera yumvaga ko ashobora gukomera. Ababyeyi bari babayeho nabi cyane, adashobora kwihereza ikintu, ibyo wamuhaye adashobora no kubyifashisha ngo abeho.”

AVEGA yahise atangira ubuvugizi inabona abafatanyabikorwa barimo Umuryango Unity Club Intwararumuri, uhuriza hamwe abagize Guverinoma, abayibayemo n’abo bashakanye bumva icyo kibazo vuba, Madamu Jeannette Kagame akigira icye.

Ku ikubitiro mu 2014 hubatswe inzu z’amasaziro mu turere twa Kayonza, Kamonyi, Rwamagana na Rulindo zifite ubushobozi bwo kwakirira hamwe ababyeyi umunani.

Inyigo yakozwe na Unity Club ifatanyije na Ibuka, Komisiyo y’Igihugu yo kurwanya Jenoside (CNLG), AVEGA na FARG yagaragaje ko ababyeyi bakeneye kwitabwaho bari hamwe.

Icyo gihe byagaragaye ko incike za Jenoside ari 869 muri bo 109 bakeneye gushyirwa hamwe byihuse ngo bitabweho.

FARG yahise yubaka indi nzu mu Karere ka Nyanza yakiriye ababyeyi 19 na Unity Club yubaka izindi ebyiri zakira ababyeyi 16 mu Karere ka Huye, yatashywe mu 2016.

Mukabayire yavuze ko bafatanyije na Unity Club basanze izo nzu zidahagije bemeranya kwagura ibikorwa maze mu 2017 hatahwa inzu yakira ababyeyi 100 i Huye.

Iyo nzu yakurikiwe n’iyo mu Bugesera yakira ababyeyi 80 yubatswe na FARG yatashywe mu 2018 mu gihe indi iri i Rusizi yatujwemo abagera kuri 50 kuva muri Kamena 2019. ikaba iteganyijwe gutaha mu minsi ya vuba.

Imibereho y’Intwaza zatujwe mu Mpinganzima

Intwaza zibayeho ubuzima nk’ubw’undi muntu wese abaho iwe. Bakora imirimo itandukanye, ijyanye n’imbaraga zabo nk’ubudozi kandi bakabona ibyangombwa nkenerwa. Bakora siporo yoroheje, bagakina nko kubuguza n’indi. Bararwara bakavuzwa, barasurwa kandi na bo bagasura inshuti igihe babyifuje.

Abatuye mu Mpinganzima ya Bugesera n’iya Huye babwiye IGIHE ko kuva mu bwigunge, kwigarurira icyizere cyo kubaho, komorana ibikomere, gufashanya mu rugendo rwo gukira ihungabana no kumva bafite umuryango barimo, ari bimwe mu byo bafite, batashoboraga kubona mu buzima bakuwemo.

Niyotwagira Ignatienne yatujwe mu Mpinganzima ya Huye yarafashwe n’indwara y’ubumuga bwo kutabona aza kwitabwaho arakira.

Ati “Imibereho yari mibi cyane ku buryo naje guhuma, naje hano ndeba ibikezikezi. Sinarebaga uretse kumva ijwi cyangwa intambuko. Banyitayeho cyane banjyana n’i Kabgayi barambaga ndahumuka. Iyo ntaza kugera hano se uragira ngo mba nkiriho wa muntu we?”

Niyotwagira Ignatienne (ku ifoto y'ibumoso) yishimiye kuzanwa mu Mpinganzima. Yari yarafashwe n'uburwayi bw'amaso ariko avuga ko ubu abona nyuma yo kuvurirwa i Kabgayi

Nyirankumburwa Veronique utuye mu Mpinganzima ya Bugesera yatangaje ko anezezwa n’ubuzima bushya abayeho.

Yagize ati “Ubuzima twarimo bwari bubi. Mbese gutangira umwaka uri mu nzu wenyine, ukawurangiza ugafata uwundi, ukaba ugomba gukora imirimo yose nk’uko igomba gukorwa, guhinga, gukenera amazi, gushaka inkwi no gushaka ikintu cyose cyatunga umubiri byagaragaraga nk’ibituruhije [...] Uwararaga wenyine ntakiraza, urarana n’undi wakumva unishye umutwe ukamubwira uti ‘ariko uzi ko numva mbabara umutwe!’ urabivuga bakakubwira bati “ihangane cyangwa se haraboneka icyagufasha” wumva ugaruye ubuzima ukumva urihanganye nubwo urwaye.”

Nyirankumburwa Veronique yavuze ko yari abayeho nabi mu bwigunge ariko ubu anezezwa no kumva ari mu muryango

Mu batujwe mu rugo rw’Impinganzima harimo abafite ubumuga basigiwe na Jenoside yakorewe Abatutsi mu 1994, bongeye kugarura icyizere cyo kubaho.

Muri bo harimo Murigande Canisius ukomoka mu Murenge wa Rukumberi mu Karere ka Ngoma ufite ubumuga yagize ubwo yagwaga mu mwobo ahunga, anakurizamo uburwayi.

Yagize ati “Nari naramugaye uku kuguru ntabasha gutambuka, ntacyo nimarira, nkongera nkagira igisonde cyambagamo, ntanabona aho ngikuriramo. Nararwaraga umuturanyi akaza akantekera agakoma agashyira hariya akigendera, mu gitondo akaza kureba uko naramutse, nta buzima bwiza nari mfite. Ngeze hano bamvuje nk’umwaka wose ahari, ngeza igihe nkirira, rwose ubu gukira narakize na sonde bayinkuramo. Ubu ndaho numva nkomeye.”

Murigande Canisius wasigiwe ubumuga na Jenoside yakorewe Abatutsi, yishimira ko yahawe ubuvuzi, bamukuye aho yabaga atabasha guhagarara no kugenda ariko ubu ameze neza

Ukobizaba Pierre we ngo yibuka ukuntu bamujyanye mu Bugesera, yamara ibyumweru bibiri agasanga ibiro byariyongereye kubera kugubwa neza.

Ati “Maze ibyumweru bibiri hano nagiye ku munzani nsanga ibilo byariyongereye, nahageze mfite ibilo 45 nsanga mfite 50. Hano hantu hameze neza numva mpakunze, simvunika singira nte, nta mvune ihaba.”

Ukobizaba Pierre yibuka ukuntu bamuzanye mu Bugesera, yamara ibyumweru bibiri agasanga ibiro byariyongereye

-  Isanamitima n’urugendo rwo gukira ihungabana

Mpinganzima Constance Ukurikirana ubuzima bwa buri munsi bw’Intwaza mu Bugesera yabwiye IGIHE ko guhuza ababyeyi byabakuye mu bwigunge.

Ati “Bakigera muri uru rugo baje bafite intege nke, benshi baje barwaye ubona barihebye, bafite agahinda ariko bahageze bahahurira na bagenzi babo bafite ibibazo. Ubundi buri wese yari azi ko ijuru ryamugwiririye wenyine ariko bahahuriye n’abandi bagenzi babo ubuhamya bwabo nibwo bwabanje kububaka.’’

“Nk’uwabuze abana batandatu, ukabona ahasanze uwabuze 13 uwashyinguye akahasanga utarigeze ashyingura, ibyo byose bikagenda bibubaka. Wa mugani bavuga ngo umubyeyi ahoza undi, bagiye baganira bagahana ubuhamya, iba intambwe ya mbere yo kwiyakira, bakurikizaho ubuzima bwo kubaho muri rusange.’’

Urwishumukondo Geneviève utuye mu Mpinganzima ya Huye yari afite ihungabana ku buryo yahoraga mu bihuru yihishe ariko ubu aramwenyura.

Ati “Kuva nagera aha ndahabwa amata, nduhagirwa, nirirwa neza. Paul Kagame arakagira amahoro n’umugisha. Na bwa bwoba burashira njya aho abandi bari, mfite icyizere cyo kubaho.”

Urwishumukondo Geneviève utuye mu Mpinganzima ya Huye yari abayeho mu bwoba, afite ihungabana ryatumaga yikanga buri wese rimwe na rimwe akajya kwihisha mu bihuru, ariko ubu amerewe neza aramwenyura

Kankindi Julienne utuye mu Mpinganzima ya Bugesera, asobanura ko inkunga y’ingoboka yahabwaga yayikoreshaga nabi kugira ngo yirinde guheranwa no kwitekerezaho.

Ati “Jye nari meze nk’umusazi, n’amafaranga bampaga nayapfushaga ubusa, nta mutima nari mfite kuko najyaga mu biyobyabwenge nk’inzoga nkanywa pe, nkiyahuza itabi ngo mbe napfa nabyo bikanga, naje ndyikoreye ngeze hano bangira inama, ubu ndaseka mfite umutima mwiza.”

Kankindi Julienne utuye mu Mpinganzima ya Bugesera, yasobanuye ko inkunga y’ingoboka yahabwaga yayikoreshaga nabi ngo yirinde gutekereza cyane

Ababyeyi b’Intwaza bahuriza ku kuba ubuzima bwabo bwarahindutse ndetse baganira na bagenzi babo bagahumurizanya, banamarane irungu.

Kantarama Espérance umaze ukwezi n’igice atujwe mu Mpinganzima ya Bugesera yagize ati “Ikintu nkirwana nacyo kandi nacyo ndabizi kizavaho, ni uguhungabana. Nkunze kwikanga, ibintu byagira gutya nkikanga, nkajya nikanga abantu bakaza ari benshi bashaka kumfata ariko narambura ijisho simbabone nkarira namara kurira nkagaruka aho nari ndi. Ubu nta kibazo mfite ndi kumwe n’abandi baranganiriza nkabaganirira.”

Ubwo hatahwaga imwe mu Mpinganzima yubatse mu Karere ka Huye muri Kamena 2017, Madamu Jeannette Kagame, yavuze ko ababyeyi b’Intwaza ari abantu bo gushimwa kubera ubutwari bagize bwo kwihanganira ububabare bwo ku mutima no ku mubiri.

Akanyamuneza k’abatujwe mu Ngo z’amasaziro z’Impinganzima gatuma bamwe bashimangira ko imibereho bafite yabasubije mu bukumi no mu busore.

Ubuyobozi bwa AVEGA nibwo bushinzwe kwita ku nzu z’Impinganzima n’abazitujwemo. Impinganzima imwe igira Umuyobozi ushinzwe ibikoresho, abaganga, umujyanama ku ihungabana, abita ku babyeyi , abatetsi n’abashinzwe isuku. Ibibatunga n’ibikoreshwa bya buri munsi bitangwa na FARG.

Kugeza ubu hari inzu z’amasaziro enye zirimo iya Huye, Bugesera, Rusizi n’iya Nyanza. Muri rusange abatujwe mu Mpinganzima ni 227 barimo abagabo 24 n’abagore 203.

Ubuzima bwa Kantarama Espérance bwarahindutse nyuma yo gutuzwa mu Mpinganzima
Ababyeyi b'Intwaza batujwe mu Mpinganzima babaho ubuzima busanzwe, aha bizihizaga Umunsi w'Umuganura
Ababyeyi bateganyirijwe aho bahurira mu ruganiriro bakisanzura, bakanamarana irungu
Ababyeyi b'Intwaza bashima byimazeyo Madamu Jeannette Kagame witangiye kubatuza neza no guhindura ubuzima bwabo
Abasanzwe mu rugo rw'Impinganzima bakirana urugwiro abaje gutuzwa hamwe na bo bigatuma batuza bakumva bageze mu muryango ubakunda
Abaje mu Mpinganzima bakiranwa urugwiro, aha bakiraga umusaza Munyarubera Evariste
Ku Munsi w'Umuganura, bifatanyije n'abashyitsi babasuye mu kuwizihiza
Madamu Jeannette Kagame asuhuza abifatabiriye gutaha inzu y’amasaziro y’Intwaza mu Bugesera. Mu Rwanda hari inzu z’amasaziro enye zirimo iya Huye, Bugesera, Rusizi n’iya Nyanza
Impinganzima zitahwa na Madamu Jeannette Kagame, uyu mubyeyi yari yishimiye kumuramutsa amushimira umutima w'urukundo n'uburyo ashyira imbaraga mu kubitaho
Buri Mpinganzima ifite ivuriro ryita ku buzima bw'ababyeyi b'Intwaza bayitujwemo

Video: Salomo George na Uwacu Lizerie

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
che 2019-10-10 07:39:14

Wow, erega uru nirwo rukundo!

2
K.J 2019-10-10 00:44:27

ICYAMPA NKAGIRA AMAHIRWE YO GUSUHUZA MADAME WA PEREZIDA WACU, NI UKURI NKUNDA UKUNTU AGIRA UMUTIMA MWIZA, IMANA IMUHE UMUGISHA CYANE.

3
Time 2019-10-09 15:19:35

Nukuri iyi Leta Imana ijye iyiha unugisha kuko niba Malaika murinzi wabarokotse jenoside yakorewe Abatutsi

4
Dd 2019-10-09 06:58:36

Cyokora iyi initiative ya first lady ni nziza pe. IMANA izabimuhembere

Kwamamaza