IGIHE

Icyorezo cya Coronavirus cyashyize ihurizo ku bucuruzi bw’Abanyarwanda barangurira mu Bushinwa

3 12-02-2020 - saa 11:31, Iradukunda Serge, Rabbi Malo Umucunguzi

Icyorezo cya Coronavirus cyibasiye u Bushinwa, kimaze guteza ingaruka zitandukanye ku buzima bw’abantu no ku bikorwa byabo, ku buryo u Bushinwa bwari bumaze kuba igicumbi cy’ubucuruzi mpuzamahanga, nta ngendo zirimo gukorerwayo.

Uretse ibigo bikora ingendo z’imbere mu gihugu, n’ibigo by’indege birimo na RwandAir byahagaritse ingendo zijya mu Bushinwa.

Abakoreraga ubucuruzi muri icyo gihugu bakomeje gukurikiranira hafi ibibera mu Bushinwa, kubera ko iki cyorezo kimaze guhitana abantu 1114 naho 44730 bamaze kwandura iyi ndwara ifata imyanya y’ubukumekero, igatera umusonga ari nawo uhitana umuntu. Ntirabonerwa umuti, havurwa ibimenyetso byayo gusa.

Inkuru nziza ni uko abarwayi 4740 bamaze kuyikira basezererwa mu bitaro, ndetse inzego z’ubuzima mu Bushinwa zemeje ko abandura Coronavirus ku munsi bagabanutseho 48.2 ku ijana urebye hagati ya tariki 4 na 11 Gashyantare 2020.

Ni icyorezo cyafatiranye ikiruhuko

Perezida w’Urugaga rw’Abikorera mu Rwanda, Robert Bapfakurera, yabwiye IGIHE ko ingendo zo mu Bushinwa zahagaritswe u Bushinwa bwinjiye mu kirihuko cy’umwaka mushya ku wa 22 Mutarama aho bagombaga gusubira mu kazi ku wa 2 Gashyantare.

Ati “Abantu b’abacuruzi baba babizi ko bazajya mu biruhuko bagatangira kuzana ibintu byinshi, babipakira vuba, ariko ubu ibiruhuko byigijwe inyuma, bavuga ko bashobora kuzafungura kuri 23 Gashyantare. Ingaruka ntabwo ziragaragara cyane ariko abantu barabyiyumvamo, ku buryo abantu batangiye kujya gushakira ibindi bicuruzwa i Dubai.”

“Ibicuruzwa dutumiza mu Bushinwa cyane cyane ni imyenda n’inkweto ndetse n’ibindi byo gukoreshwa mu ngo, ni byinshi biri kuri 80%. Ibyinshi byari byatumijwe kubera ko abacuruzi bari bazi ko Abashinwa bagiye mu biruhuko, ntabwo ingaruka ziragaragara cyane ariko abantu bafite ubwoba bw’uko badafite uburyo bwo kujyayo.”

Hari abavuga ko ibicuruzwa bimwe ku isoko byahise bizamurirwa ibiciro, nka Muhimpundu Rose umaze imyaka ine arangurira inkweto mu mujyi wa Guangzhou mu Bushinwa.

Ati “Ni ibintu bihita byikora ako kanya, ibiciro byo byarazamutse kubera ko nta handi hantu ubona uba uteganya gukura indi mari. Nk’ikweto umuntu yagurishaga ibihumbi 15 Frw ubu ni ibihumbi 20 Frw cyangwa 18 Frw.”

Hitayezu Gerald urangura imyenda n’inkweto mu Bushinwa, we avuga ko ibihombo bitaratangira kugaragara cyane, ko ahubwo bahangayikishijwe n’iminsi iri imbere.

Ati “Mu Bushinwa n’ubundi ubu bari mu kiruhuko ntabwo igihombo kiragara neza ariko iyo umuntu acuruza areba ibiri imbere ni ukuvuga ko nibirenza ukwezi kwa gatatu nta muti uraboneka cyangwa urukingo, tuzahomba bigaragara.”

Ku rundi ruhande hari abacuruzi banenga bagenzi babo barimo guca igikuba bakavuga ko ibintu byakomeye, kandi bari bararanguye byinshi kuko bari bazi ko mu Bushinwa aya mezi aba ari ay’ikiruhuko, gusa nabo bakagaragaza impungenge z’uko mu minsi iri imbere bahura n’igihombo mu gihe coronavirus yaba itabonewe umuti n’urukingo.

Abacuruzi batangiye gutekereza andi masoko

Umuyobozi Mukuru w’ikigo Heart of Africa Trading (H.A.T) Ltd, gifasha mu gutumiza ibicuruzwa mu Bushinwa, kikagira ibiro i Kigali na Guangzhou, Izabiriza Jeanne, avuga ko abacuruzi bakomeje kugira impungenge.

Bitewe n’uko icyorezo cya Coronavirus cyatangiye u Bushinwa bwinjiye mu kiruhuko, nta bintu byari birimo gutumizwa muri aya mezi, ariko nk’ibyari mu nzira bifite ingorane.

Ati “Icyo twari dufite ni kontineri ziri mu nzira, ariko nta makuru ahagije dufiteho kuko bayaguha zigiye kugera Dar es Salaam, ariko ubu nta bantu barimo kujya mu biro, byose birafunze, ubu abantu bari mu rugo.”

“Gutumiza ibindi bintu byagombaga kubaho nyuma y’ikiruhuko cyo mu Bushinwa, nyuma rero ntabwo barasubira mu kazi, ubu kontineri zirimo kuza nabwo ntabwo dushobora kubona amakuru yose, ubu urazireba ukabona aho zigeze ariko turavugana naho, ntabwo byoroshye mbese.”

Avuga ko niba nta gihindutse mu Bushinwa, abacuruzi bazashaka andi masoko nka Dubai, ariko ho ibintu birahenze kurusha mu Bushinwa ku buryo bishobora kugira ingaruka ku biciro ku isoko.

Ni ingingo ahurizaho na Bapfakurera uyobora PSF. Yagize ati “Itandukaniro ni uko Dubai hari isoko rinini, ariko ibicuruzwa byaho biba bihenze kurusha ibyo mu Bushinwa. Nibikomeza ni ukuvuga ngo dushobora gushakira mu Buhinde ibintu bimwe na bimwe, muri Turikiya, ni byo bihugu dukunze gucuruzanya.”

Avuga ko bataratangira kuganira na Leta ngo barebe niba hari uburyo bashobora koroherezwa gukura ibintu mu bindi bihugu kandi ntibihindure ibiciro ku isoko, “kubera ko Leta iba ishaka umusoro, ariko turabikurikirana kubera ko igihe ntikiraba kinini cyane.”

Avuga ko hanatekerezwa ku bundi buryo bwo gukoramo, ku buryo nk’u Bushinwa busubukuye ibikorwa by’ubucuruzi, n’iyo ingendo z’indege zaba zitarasubukurwa, umuntu ashobora gutumiza ibyo akeneye bakabyohereza bidasabye ingendo z’abantu.

Bapfakurera avuga ko kugeza ubu nta makuru y’ibicuruzwa byaba byaraheze mu Bushinwa, kuko “iyo byamaze kugurwa babipakira muri kontineri, ariko na none nk’ibyo bari batarakora cyangwa bari batarapakira, byo ntabwo byapakiwe, biracyariyo. Ariko ibyo bapakiye biraza nta kibihagarika.”

Kugeza ubu amakuru abacuruzi bafite ni uko ibikorwa by’inganda bizasubukurwa ku 23 Gashyantare igihe icyorezo cya Coronavirus cyaba gicogoye. Nibidashoboka, bizasaba gutegereza itariki nshya.

Perezida w’Urugaga rw’Abikorera mu Rwanda, Robert Bapfakurera, yavuze ko mu gihe icyorezo cya Coronavirus cyakomeza gufata indi ntera, bashobora kwiyambaza ibindi bihugu birimo u Buhinde na Turikiya
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Mukunzi 2020-02-13 15:03:03

nibakomeze kwihangana imana ibari hafi

2
Rugamba 2020-02-13 09:36:30

Nubundi ntacyo najya gushaka yo cg kwigayo nubundi abajyayo nabifashije barya bafungeho bakanywa-kijusi bakaganira bahekenya amenyo... Dore ko batibukaga twe rubanda rugufi tutagira nurwara rwo kwishima... Imana ishimwekuricyo cyorezo cyimpondera nabijuse .

3
bimawuwa 2020-02-12 17:58:17

ahubwo mwavuze ko mwakurikije gahunda ya america na banya buraya umugambi wabo bafite wo kugirango bagabanye umuvuduko wu bukungu bwu bushinwa gukomeza kuzamuka. EBOLA ko yicha kurusha icyo cyorezo ko ntari numva mwahagaritse ingendo zijya muri congo.

Kwamamaza