IGIHE

Icyogajuru RWASAT-1 kizohereza mu Rwanda amakuru ya mbere mu kwezi kumwe

0 8-10-2019 - saa 19:00, Rabbi Malo Umucunguzi

Inzego zirimo gufatanya mu mushinga w’icyogajuru cya RWASAT-1, zatangaje ko mu kwezi gutaha kizoherezwa mu isanzure, ku buryo nyuma y’iminsi mike amakuru ya mbere kizaba cyamaze kuyageza mu Rwanda.

Kuri uyu wa Kabiri nibwo Minisitiri w’Ikoranabuhanga na Inovasiyo, Ingabire Paula, Ambasaderi w’u Buyapani mu Rwanda, Takayuki Miyashita, Umuyobozi w’Urwego Ngenzuramikorere, RURA, Lt Col Nyirishema Patrick na Prof Takayoshi Fukuyo wo muri Kaminuza ya Tokyo, bagiranye ikiganiro n’abanyamakuru ku mushinga w’icyogajuru cya mbere cyakozwe n’abanyarwanda, RWASAT-1.

Ku wa 24 Nzeri ahagana 18:03 ku isaha y’i Kigali, nibwo icyogajuru RWASAT-1 cyoherejwe mu kirere, kizamurwa na rockette yiswe H2-B.

Cyazamukiye mu Buyapani mu kigo cyagenewe kuzamura ibyogajuru, Tenegashima Space Center. Ku wa 28 Nzeri nibwo ahagana 13:13’, igisanduku gifunzemo ibyogajuru birimo RWASAT-1 cyiswe ‘Kounotori 8’, cyakiriwe na robot mu gice kigenzurirwamo serivisi z’ibyogajuru mu isanzure, International Space Station (ISS), ari naho iki cyogajuru kikiri kgeza magingo aya, gitegereje koherezwa mu isanzure.

Prof Takayoshi yagize ati "Gahunda ni ukugerageza gukemura ibibazo bijyanye n’imibereho ndetse n’iterambere twifashishije icyogajuru, muri Kaminuza ya Tokyo twatangiranye na gahunda yo kubaka ubushobozi bw’ibihugu cyane cyane bya Afurika."

"Iki cyogajuru gifite camera ebyiri zizafasha mu gukurikirana ibijyanye n’ubuhinzi, ubu iki cyogajuru kiri muri International Space Station, twizera ko mu cyumweru cyo ku wa 18 Ugushyingo, tuzohereza icyo cyogajuru mu isanzure.”

Yavuze ko mu cyumweru kimwe cyoherejwe mu isanzure, RWASAT-1 kizatangira gutanga amakuru, akazajya abonwa n’u Rwanda ndetse na Kaminuza ya Tokyo.

Yakomeje ati “Turacyari kunoza gahunda yokohereza RWASAT-1 mu isanzure, ariko nizera ko nyuma yo kucyohereza, mu masaha make dushobora kubona amerekezo yacyo, nyuma tukagenzura uko gihagaze n’uburyo camera zirimo gukora zohereza amakuru, ndatekereza ko mu cyumweru kimwe nyuma yokoherezwa, dushobora kugenzura ko twabona amakuru yose.”

Minisitiri w’Ikoranabuhanga, Ingabire Paula, yashimiye Guverinoma y’u Buyapani ku ruhare rwayo mu gukora no kohereza mu kirere iki cyogajuru, binyuze mu guhanahana ubumenyi muri uru rwego.

Yavuze ko mu mwaka ushize u Rwanda n’u Buyapani byasinye amasezerano y’ubufatanye, ndetse muri uwo mwaka hari abanyarwanda batangiye guhurirwa mu Buyapani, harimo abagize uruhare mu gukora iki cyogajuru.

Muri uyu mushinga wa RWASAT-1, Guverinoma y’u Rwanda yashyizemo $250 000, Guverinoma y’u Buyapani ishyiramo $675000.

Ati “Uyu mushinga ugamije kubaka ubushobozi mu kumenya uko byubakwa no kugira ngo amakuru ava muri ibyo byogajuru tubaje kuyabyaza umusaruro.”

Uyu mushinga uzakoreshwa n’inzego nka Minisiteri y’ubuhinzi mu kumenya ubutaka n’ibihingwa bushobora guhingwamo, ndetse n’izindi nzego bizaba ngombwa.

Lt Col Patrick Nyirishema yakomeje ati "Turi mu gihe cyiza mu bijyanye n’ibyogajuru, aho mbere wasangaga icyogajuru ari ikintu kinini gitwara miliyoni amagana z’amadolari, ariko ubu ni ibyogajuru bito kandi bihendutse byoherezwa hafi, kandi bishobora gukoreshwa ibintu byinshi.”

Yavuze ko nyuma y’umushinga wa RWASAT-1, hari ibindi bizakorwa, ibi byogajuru bito bikaba bimara mu isanzure imyaka iri muri ibiri cyangwa itatu hakoherezwa ibindi, ibyo bigatanga umwanya wo kwifashisha ikoranabuhanga riba rigezweho, kurusha koherezwa mu isanzure icyogajuru kizatindayo kandi gihenze cyane.

RWASAT-1 ngo kizaba kiri mu kirere ibihugu byose bisangiye, ku buryo ibihugu bikwiye kwishyira hamwe ku buryo aho icyogajuru kigeze, buri gihugu gishobora kubyungukiramo mu bijyanye n’amakuru.

Lt Col Nyirishema yakomeje ati “Amakuru uvana ku byogajuru ufite araguhendukira kuko ugucuruzaho agomba kukungukaho […] Twashatse kuba mu bakora izo serivisi ahubwo wenda tukaba twazicuruza no ku bandi.”

“Mu buhinzi dusanzwe n’ubundi twaka amakuru, bizadufasha kubona serivisi mu gukurikirana amazi ari mu butaka ashobora gufasha mu bikorwa by’ubuhinzi, gukurikirana imyaka iba yahinzwe n’ibindi kuko cyo kiba kiri hejuru kibasha kubona byinshi.” Ibi byogajuru kandi bishobora kwifashishwa no mugucunga umutekano.

Ambasaderi w’u Buyapani mu Rwanda ugomba gusoza inshingano kuri uyu wa Gatanu, Takayuki Miyashita, yavuze ko atewe ishema no kuba uyu mushinga ukomeye warabaye ari we ambasaderi w’igihugu cye mu Rwanda.

Umuyobozi Mukuru wa RURA, Lt Col Nyirishema Patrick na Minisitiri w'Ikoranbuhanga na Inovasiyo, Ingabire Paula, mu kiganiro n'abanyamakuru
Iki cyogajuru giheruka koherezwa mu kirere, gitegereje koherezwa mu isanzure
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza