IGIHE

Dr Iyamuremye wagizwe umusenateri yahaye ububasha Mugesera ku buyobozi bw’Urubuga rw’Inararibonye

0 8-10-2019 - saa 16:58, Ferdinand Maniraguha

Dr Iyamuremye Augustin uherutse kugirwa umusenateri yahererekanyije ububasha na Antoine Mugesera ku buyobozi bw’Urubuga Ngishwanama rw’Inararibonye z’u Rwanda.

Dr Iyamuremye yari ayoboye urwo rwego kuva rwajyaho muri Gashyantare 2015.

Tariki 20 Nzeri 2019, Perezida Paul Kagame yagize Dr Iyamuremye umwe mu basenateri bane yemerewe gushyiraho bazinjira muri sena ya gatatu y’u Rwanda.

Kubera ko imirimo y’ubusenateri itabangikanywa n’indi, kuri uyu wa Kabiri Dr Iyamuremye yatanze inshingano yari afite nk’umuyobozi, azihereza Antoine Mugesera, umwe mu bagize urubuga rw’inararibonye.

Dr Iyamuremye yashimye inshingano nshya yahawe na Perezida wa Repubulika, yizeza ko mu mbaraga nke afite azakomeza gukora mu nyungu z’abanyarwanda.

Yagize ati “Birasaba ingufu nyinshi muri iyi myaka yanjye ariko ntibabiyobewe, ndumva n’izo nkeya umuntu ari ugukomeza akazitanga uko ashoboye mu nyungu z’abanyarwanda.”

Yavuze ko inshingano nshya yahawe, zijya gusa n’izo yari asanganywe akaba yizeza ko azakomeza gukorana bya hafi na bagenzi be bagize urwego yari ayoboye.

Ati “Gusezera muri uru rubuga rw’inararibonye ntabwo binyoroheye. Icyo nzi ni uko ntagiye kure yanyu kandi mu mirimo nzajyamo irasa nk’aho ari ibyo twakoraga, ni kuba abajyanama b’igihugu.”

Antoine Mugesera yashimiye Dr Iyamuremye ku bushishozi yayoboranye Urubuga rw’inararibonye. Yavuze ko nk’urwego rwari rushya, yarufashije kwiyubaka haba mu bushobozi n’uburyo bw’imikorere.

Ati “ Yadufashije kubaka inzego z’iki kigo, nticyari kiriho, niwe wa mbere watuyoboye dushyiraho izi nzego. Ni we wa mbere wadufashije dushyiraho amategeko, yadufashije gushyiraho abakozi, ni we watuyoboye dushyiraho gahunda z’imirimo zose. Twari tumaze kugera ahantu hashimishije heza n’ibitanoze twari tumaze iminsi tubinoza.”

Yavuze ko imikorere myiza yazanye muri urwo rwego, yatumye n’umugenzuzi w’imari ahagera agasanga uburyo bakoreshaga umutungo wa Leta nuko bacunga ibya Leta ari nta makemwa.

Yijeje ko bazakomereza muri uwo murongo, bashyira mu bikorwa inshingano bahawe.

Itegeko rishyiraho Urubuga rw’Inararibonye ryatowe n’Inteko Ishinga Amategeko muri Gicurasi 2013, ryasohotse mu Igazeti ya Leta nimero ya 29 yo kuwa 22 Nyakanga 2013, rigaragaza ko ijambo “Inararibonye” risobanura abagabo n’abagore b’inyangamugayo, bafite nibura imyaka mirongo itanu y’amavuko, ubunararibonye n’uburambe mu miyoborere y’Igihugu cyangwa y’izindi nzego.

Izi nararibonye zishyirwaho zikanavanwaho n’Iteka rya Perezida wa Repuburika, biteganyijwe ko zikora ubushakashatsi, zigasuzuma kandi zigatanga umuti cyangwa inama ku bibazo byugarije Igihugu, ku murongo wa politiki Igihugu kigenderaho ndetse no ku mbogamizi zo mu rwego rw’imiyoborere myiza, ubutabera ,ubukungu n’imibereho myiza y’abaturage.

Ubwo hakorwaga umuhango wo guhererekanya ububasha mu rubuga rw'inararibonye z'u Rwanda
Dr Iyamuremye yashimye inshingano nshya yahawe na Perezida wa Repubukika, yizeza ko mu mbaraga nke afite azakomeza gukora mu nyungu z’abanyarwanda
Rucagu Boniface, umwe mu nararibonye z'u Rwanda witabiriye ihererekanyabubasha
Ubwo Dr Iyamuremye yaherezaga ububasha Antoine Mugesera
Antoine Mugesera yashimiye Dr Iyamuremye ku bushishozi yayoboranye Urubuga rw’inararibonye
Bamwe mu bagize Urubuga Ngishwanama rw'Inararibonye z'u Rwanda
Abagize Urubuga Ngishwanama rw'Inararibonye z'u Rwanda hamwe na bamwe mu bakozi bahoraho b'urwo rwego

Amafoto: Dushimimana Ami Pacifique

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza