IGIHE

Apôtre Gitwaza yasabye abanyafurika kudategera amaboko Abanyaburayi

12 12-08-2019 - saa 15:15, Habimana James

Umuyobozi Mukuru w’Itorero Zion Temple, Apôtre Dr Paul Gitwaza, yavuze ko abanyafurika bagomba guhaguruka bagasenga Imana kandi ntibabe abantu bahora batekereza ko abanyaburayi aribo bazajya babakorera imiti ibavura ibyorezo bakunze guhura nabyo.

Ibi Dr Gitwaza yabigarutseho kuri iki Cyumweru ubwo hasozwaga igiterane cy’ububyutse cyiswe ‘Africa Haguruka’ gihuriza hamwe abantu b’ingeri zose mu ivugabutumwa cyari kibaye ku nshuro ya 20.

Iki giterane cyabaye kuva tariki ya Kane uku kwezi, cyasorejwe muri Stade ya IPRC-Kigali cyitabirwa n’abantu bagera ku bihumbi 10.

Uretse abanyarwanda bacyitabiriye, cyanitabiriwe n’abandi baturutse ku migabane yose y’Isi.

Cyari gifite insanganyamatsiko iri mu Gitabo cya Zefaniya 3:10 igira iti “Afurika zana abaramyi b’ukuri.”

Africa Haguruka yashibutse mu iyerekwa Gitwaza yagize mu 2000, rigamije kuzamura iterambere ry’umugabane wa Afurika no guhembura abawutuye binyuze mu ijambo ry’Imana.

Gitwaza avuga ko inshingano itorero rifite ari “ugukangurira Abanyafurika gusobanukirwa umugambi Imana ifitiye Afurika no kugendera muri uyu muhamagaro.”

Yagarutse kuri yubile y’imyaka 20 Zion Temple imaze ndetse na Afurika Haguruka muri rusange, avuga ko nubwo baciye muri byinshi ariko bashima Imana ko bakiriho kandi bakomeye.

Gitwaza mu buhamya yatanze bwari bukurikiwe n’abantu barenga ibihumbi 75 hirya no hino ku Isi, yagarutse ku bibazo umugabane wa Afurika ufite birimo indwara z’ibyorezo, inzara n’intambara, agaragaza ko abanyafurika bagomba guhaguruka bagasenga Imana kandi bagakora.

Yagize ati "Iyo ureba ibibera muri Afurika niho hari inzara, indwara z’ibyorezo, intambara n’ibindi. Afurika ni umugabane munini ariko ufite ubukene, abanyafurika miliyoni 400 batunzwe n’idorali rimwe ku munsi, miliyoni 318 bo munsi y’ubutayu bwa Sahara nta mazi bafite, niho hari indwara z’ibyorezo."

"Hari ibihugu byinshi byakemuye ikibazo cy’inzara kimwe n’indwara n’ibyorezo, ubu ibyo bintu bisigaye muri Afurika kuko niho turimo kubona Ebola, Malaria, icyorezo cya SIDA n’ibindi, ikibabaje ni uko tujya gushaka inkingo mu Burayi kandi bo baba batanazi izo ndwara kuko ntibazirwaza."

Yakomeje avuga ko muri Afurika ‘dukeneye abaramyi bakomeye kandi bubaha Imana ndetse ko afurika igomba kugira abahanga kandi basenga Imana, ikabaha ubushobozi bwo kwikemurira ibibazo.

Aha niho yahereye avuga ko abanyafurika badakwiye gutega amaboko. Ati “Ubu Abanye-Congo bategereje abanyamerika kuzabazanira urukingo rwa Ebola, aba bantu ntibayizi kuko ntibayirwaye."

"Nta Malaria iba muri ibyo bihugu ariko ugasanga nibo dutezeho inkingo, ni gute badukorera umuti wa malaria? Dukeneye abana biga bakavumbura kandi bagasenga, umuti wa malaria, Sida n’ibindi, ndavuze nti Afurika ntuzongera kugira ibindi byorezo, turahanuria abanyafurika kuvumbura imiti y’indwara zabo."

Gitwaza yavuze ko imitwe ikomeye irimo Boko Haram na Al Shabab igomba guhagarika gukomeza kwica abanyafuruka kuko ari abavandimwe.

Yahanuye ko ibihugu birimo Somalia bigiye kuzavamo abahanga bakora indege, Nigeria bakore ibyogajuru, Zimbabwe ibe ikigega cy’ibiribwa, naho umuti uvura indwara zikomeye ukazava muri Repubika Iharanira Demokarasi ya Congo.

Kuva mu myaka 20 ishize, igiterane cya Africa Haguruka cyaragutse ndetse kinahindura ubuzima bwa benshi binyuze mu masomo, impanuro n’ijambo ry’ubwenge rigitangirwamo.

Mu minsi Afurika Haguruka yari imaze, habaye ibitaramo byabaga mu masaha y’umugoroba nyuma y’amahugurwa atangwa n’impuguke binyuze mu ngeri z’ubuzima zigereranywa n’imisozi irindwi irimo ubuyobozi, umurimo w’Imana, ubucuruzi, umuryango, uburezi, itangazamakuru n’imyidagaduro.

Ubwo hasozwaga iki giterane, Umunya-Nigeria, Prof Vincent Anigbogu washinze Ikigo Institute for National transformation gitanga amahugurwa mu bantu batandukanye cyane cyane afasha abayobozi ku buryo bwo guhindura igihugu, yavuze abanyafuruka bagomba guhagurukira bagasenga Imana Kandi bagahindura umugabane wabo.

Africa Haguruka y’umwaka utaha izaba kuva tariki 12-19 Nyakanga.

Apôtre Gitwaza yavuze ko abanyafurika bakwiye gukora, bakavumbura ibintu bihambaye aho gutega amaboko ku Banyaburayi
Abantu barenga ibihumbi 75 nibo babarurwa ko bakurikiye inyigisho z'iki giterane
Gitwaza yavuze ko ibihugu nka Somalia mu gihe kiri imbere bizavumbukamo ibintu by'ingirakamaro mu mibereho ya Afurika
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2  

1
Eric 2019-08-14 05:38:29

wowe wiyise sisi ndagusetse cyaneeee!ngo ko atajya nyabihu.....wowe se wagiyeyo?aho ajya se ni wowe uhapanga?ubwirwa niki ko atajyayo?ariko mwagiye mureka amatiku n’urwangano koko?ibyo twabonye ntibihagije koko?Tureke ishyari dushyigikire Abakozi b’Imana Imana Ihagurukije muri iki gihe.niba iwanyu nta mukozi w’Imana Uhavuka ihangane usenge mujye no kwiga Theologia mwuzure umwuka wera,musabe impano yo kuvuga Ijambo ry’Imana.Nukuri namwe bizakunda ariko mu gihe bitarakunda mugabanye ishyari.uziko wagira ngo ni wa mugabo ukomeye hirya aha muri ibi bihugu duturanye utumereye nabi ngo twamusize mw’iterambere!!hhhhh

2
King David 2019-08-13 12:13:23

Nabazaga ibyogajuru, indenge no kuvumbura imiti,bimariye iki ubwami bw’Imana! Ese iyi niyo nkuru nziza Yesu yatuzaniye? Ntimubwira abantu ko bagomba gukizwa kuko ibihe byegereje,ahubwo murababwira ko igihe cyo kubaho neza kigeze! Mwarangiza mukabavangiramo nubwenge bwisi bwo kuvumbura .......kandi muzi neza aho ubu bwenge buva(fallen angles). You christians, ntago mugeze mugihe cyo kuvumbura no kubaho neza......nigihe umuntu wese ageze cyo kwisuzuma ngo arebe ko ari munzira Imana ishaka, musome Ijambo ryayo ubudasiba, ubuzima bwanyu mubushiremu mu Mana! Imana ibahe umugisha!

3
Pascal Baylon Ndengejeho 2019-08-13 11:57:43

Gitwaza ni igihangange mu ivugabutumwa. Nibaza impamvu itagira icyo amarira abanyamulenge avukamo. Ese abanyarwanda bamushishikaje kurusha igihugu cye? Nkeka rero Kongo ifite ibibazo biruta ibiri mu Rwanda kandi yagira uruhare rwiza mu gukemura ibibazo biri iwabo.

4
Paco 2019-08-13 05:54:10

@Jambo, So what?

5
aimable 2019-08-13 02:01:59

igihe kirageze ngo habeho impinduka ,arakoze cane apotre no kwiyerekwa yagize imana imwongerere

6
Sisi 2019-08-12 16:25:30

None se Gitwaza, ko tutabona wiriwe za Karongi, Nyabihu, Nyamagabe, Rusizi ko wirirwa muri abo ba nyaburayi! Uba wajyanywe n’iki? Mbega. Ibintu ni magirirane.

7
Sisi 2019-08-12 16:07:37

None se Gitwaza, ko tutabona wiriwe za Karongi, Nyabihu, Nyamagabe, Rusizi ko wirirwa muri abo ba nyaburayi! Uba wajyanywe n’iki? Mbega. Ibintu ni magirirane.

8
JUSTICE 2019-08-12 13:28:12

@beaugars de Jésus :

Niba wumva ko Gitwaza avuze neza , akunda Africa , MUBWIRA AZANE MULI AFRICA UMUGORE WE NABANA
NABENE NYINA , AFITE ABANTU BARENGA 70 BO MUMURYANGO WE YANJYANYE AVUGA KO BAGIYE MUMASENGESHO NTIBAGARUKE !!!!

9
karekezi 2019-08-12 12:15:17

Ariko na Gitwaza akoresha amafaranga menshi aturuka muli Amerika n’Uburayi.Ariko mu byukuri,haba hari ikintu kerekana ko aba bantu bitwa ba Apotres bashyizweho n’Imana koko??
Ba Apotres 13 ba Yesu barangwaga nuko bagenda bazura abantu,bagakiza abamugaye.Ikindi kandi,ntabwo bagendaga basaba icyacumi.Urugero,Intumwa Pawulo yirirwaga mu nzira abwiriza abantu,akabifatanya no kuboha amahema akagurisha.Bali batandukanye n’abavuga ko ari ba Apotres b’iki gihe.

10
ndoli 2019-08-12 11:48:08

Icyubahiro ni icya Yesu ubwami bw’Imana nibuze muri africa intambara,ubukene,nibyorezo bigende mw’izina rya Yesu. Turatura amahoro,gutera imbere ndetse abanyafrica bakizwe mwizina rya Yesu

Paji: 1 | 2  

Kwamamaza