IGIHE

Abadepite batumije abaminisitiri batatu ngo batange ibisobanuro ku bibazo bitandukanye

7 13-02-2020 - saa 22:48, Twarabanye Venuste

Inteko Ishinga Amategeko yatumije Minisitiri w’Ibikorwaremezo, uw’Ibidukikije n’uw’Imari n’Igenamigambi ngo batange ibisobanuro ku bikorwa binyuranye Abadepite basanzemo ibyuho mu ngendo bagiriye mu gihugu hose hagati y’Ukuboza 2019 na Mutarama 2020.

Ni umwanzuro Inteko Ishinga Amategeko, Umutwe w’Abatepite wafashe ushingiye kuri raporo ku byagaragaye mu ngendo z’abadepite yasesenguwe kuri uyu wa Kane tariki 13 Gashyantare 2020.

Ni ingendo abadepite bakoze bagamije kwegera abaturage n’ubuyobozi bw’inzego z’ibanze zabegerejwe, mu rwego rwo kumenya ibirebana n’iterambere ry’ibikorwaremezo by’ibanze birimo imihanda, amazi, amashanyarazi n’ibikorwaremezo by’ikoranabuhanga.

Nk’intumwa za rubanda uretse ibikorwaremezo, banaganiriye n’abaturage ku birebana n’uruhare rwabo mu bibakorerwa, ndetse banarebera hamwe uburyo abagize umuryango Nyarwanda bita ku bibazo bahura nabyo, imyitwarire ikwiye kubaranga n’uburyo bwo kwishakamo ibisubizo.

Visi Perezida w’Umutwe w’Abadepite, Edda Mukabagwiza, yavuze ko bishimiye intambwe yatewe mu iterambere ry’ibikorwaremezo n’impinduka nziza bikomeje kugira ku baturage.

Ati “Izi ngendo zafashije abadepite kumenya uko inzego zegerejwe abaturage zishyira mu bikorwa politiki, ingamba na gahunda igihugu cyiyemeje kugenderaho n’ibibazo bihari, birimo n’ibyo basanze bishobora kubazwa inzego na Minisiteri bireba.”

Izo Minisiteri zisabwa ibisobanuro zirimo iy’Ibikorwaremezo, iy’Ibidukikije n’Iy’Imari n’Igenamigambi nk’umwe mu myanzuro yafashwe n’Inteko rusange.

Minisitiri w’Ibikorwaremezo arasabwa gutanga ibisobanuro ku bibazo birimo icy’imihanda yubakwa bikagaragara ko itujuje ibisabwa, ingamba zihari zo gukemura ikibazo cy’amazi y’imvura yangiza ibikorwaremezo, icy’amateme n’imihanda byangiritse ariko kubisana bikaba birenze ubushobozi bw’uturere.

Asabwa kandi kuzagaragaza ingamba zihari zo gusana amavomo atagikora n’adakora neza, guteganya ingengo y’imari yo kunganira ikorwa ry’imihanda ya VUP kugira ngo ibashe gutsindagirwa, kubaka ibiraro n’inzira z’amazi bikomeye no kugaragaza imiterere y’ibishushanyo mbonera by’uturere n’imijyi n’aho bigeze bishyirwa mu bikorwa.

Minisitiri w’Ibidukikije yatumirijwe kugaragaza ingamba zihari zo gukemura ikibazo cy’amazi ava mu birunga yangiririza abaturage, ingamba z’imicungire y’amashyamba ya Leta mu gihugu n’ibisobanuro ku birebana n’imicungire y’umutungo kamere w’amazi akomoka ku masoko, ku mvura n’akoreshwa mu ngo na gahunda yo kuwubyaza umusaruro ukwiye.

Minisitiri w’Imari n’Igenamigambi we asabwa kugaragaza aho ikibazo cyo kwishyura abaturage ibirarane by’ingurane kigeze; kugaragaza ingamba zihari zo kurangiza burundu ikibazo cy’ibirarane Ikigo cy’Ubwiteganyirize mu Rwanda RSSB gifitiye amavuriro n’ibigo nderabuzima.

Undi mwanzuro wafashwe uganisha ku gusaba Ibiro by’Umugenzuzi Mukuru w’Imari ya leta gukora igenzura ryimbitse ku ishyirwa mu bikorwa ry’imishinga y’iyubakwa ry’imihanda igamije guteza imbere ubuhahirane n’imigenderanire mu turere.

Uretse ibikorwaremezo byari byabahagurukije, raporo yerekana ko abadepite basanze hari izindi gahunda zitaragera ku rwego rwifuzwa zirimo izo kuringaniza urubyaro, igikoni cy’umudugudu n’umugoroba w’ababyeyi. Inzego zirimo iz’abunzi, inshuti z’umuryango,amasibo, inzego z’abagore, iz’urubyiruko n’iz’abafite ubumuga na zo ngo ntiziragera ku ntego yazo.

Muri rusange Inteko Rusange yatangaje ko igiye gushyikiriza imyanzuro Minisiteri y’Ubutegetsi bw’Igihugu, iy’Ikoranabuhanga na Inovasiyo na Minisiteri y’Ubuzima mu rwego rwo gukemura ibibazo abadepite babonye mu gihe cy’ingendo.

Visi Perezida w’Umutwe w’Abadepite, Edda Mukabagwiza, yavuze ko basanze hari ibimeze neza n'ibikwiye kubazwa inzego na minisiteri bireba
Visi Perezida w’Umutwe w’Abadepite, Edda Mukabagwiza; Perezida w'Umutwe w'Abadepite, Mukabalisa Donatille na Visi Perezida mu Nteko Ishinga Amategeko ushinzwe Imari n’Abakozi, Sheikh Musa Fazil Harerimana mu Nteko rusange yateranye kuri uyu wa Kane
Inteko rusange y'Umutwe w'Abadepite yatumije abaminisitiri batatu ibasaba gutanga ibisobanuro bitandukanye
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
sakega 2020-02-14 22:11:37

Ese ko batavuga Ku kibazo cy’abasenyewe mu bishanga? n’uko hajya haboneka amazu yo gukodesha kuko hasigaye hubakwa imiturirwa gusa ,abakene bo bazaba he?

2
Sulaiman 2020-02-14 02:37:18

Abadepite nange ndabashimiye kuriyi raporo nokuba bamanutse bakegera/bakamenya ibibazo byabaturage.
# Imihanda byonikibazo haraho ubonako bayubaka arugusondeka kandi reta yabitanzeho amafaranga menshi ese nta Campany ikora supervisions Ibayahawe akokazi ubwose niba ihari ikemeza ibitaribyo bage babiryozwa.

# Kutishyura imyenda yabayuragye nabyo bitanga ishusho mbi kandi bikabarisha nabi uwo ubereyemo amafaranga ibinabyo abo bireba bazabihindure

# Mperuka ahanini twumva barwiyemeza mirimo baba bafitiye imyenda abaturagye harya iyo reta ifitiye umwenda abaturagye yo bayirega hehe? Niba cash zibazitaraboneka hakwiye kubaho uburyo umuturagye yegerwa akaganirizwa agahabwa igihe azishyurirwa ahogutegerezako ibibazo byinshi biboneka munama y’umushyikirano.
# uturima twigikoni, imigoroba yababyeyi nibindi bamudugudu namwe mushyiremo ingufu kandi abaturagye natwe tugye tubyitabira.
Murakoze mugire umunsi mwiza wa “sevarante “

3
kaks 2020-02-14 00:58:21

Hari ikibazo kitarasubizwa "KUKI NTA KAJUWALITE TUJYA TUBONA ????????"

4
Figo 2020-02-14 00:32:59

Inteko muri gukora akazi neza! icyo nicyo cyaburaga rwose; kumanuka hasi mu mudugudu n’utugari. naho ibyokugarukira ku karere ntibyari bihagije. Mukomereze aho, bityo amategeko mushyiraho azajya aba ashingiye ku bifatika. Igisigaye ni ugutangira gutekereza uko mwajya munegera abandi bafatanyabikorwa ndetse n’ibigo bikora ubushakashatsi.

5
Kazigaba 2020-02-14 00:09:42

Izi gahunda zikurikira uzitabira uko zakabaye waba uri imburamukoro. Mujye mushyira mu gaciro, izi gahunda umuturage wo mu cyaro yazitabira zose akazabona ibimutungirq umuruango?
kuringaniza urubyaro, igikoni cy’umudugudu n’umugoroba w’ababyeyi. Inzego zirimo iz’abunzi, inshuti z’umuryango,amasibo, inzego z’abagore, iz’urubyiruko n’iz’abafite ubumuga

6
Mutuyimana Kussi vedaste 2020-02-13 23:03:24

Yewe aba chauffeur nabo bajye bakurikiranwa kuko birumvikana ko uwo amaze Gukura ubundi ziriya Ni imodoka zisaba imbaraga gusa wenda ntimwatubwiye niba yitabye Imana cyangwa yarokotse

7
mozayo 2020-02-13 21:54:55

bazasure na RCS ibazwe impamvu yakira ifu yamasaka ivanzemo ibindi binu(merange) kd muri DAO barasabye ifu y’amasaka gusa kd atukura. kuburyo biha amahirwe barwiyemezamirimo bamwe kubona amfranga kuko igituma bagemura ibitari mumasezerano kd bakishyurwa ibiri mumasezerano no muri DAO ataribyo bagemuye.

Kwamamaza