IGIHE

Minagri yemeje ko nta nzige ziragera mu Rwanda

2 13-02-2020 - saa 11:02, Habimana James

Minisiteri y’Ubuhinzi n’Ubworozi (MINAGRI), yatangaje ko kugeza ubu nta cyonnyi cy’inzige kiragera mu gihugu, gusa ikavuga ko Abaturarwanda bagomba kuba maso no gutanga amakuru ku kintu cyose babonye batazi.

Minagri itangaje ibi nyuma y’aho tariki 11 uku kwezi, abaturage bo mu Murenge wa Musheri mu Karere ka Nyagatare, bavuze ko hari udutsinda tw’udukoko turi kuhagaragara mu masaha y’igitondo no mu masaha y’umugoroba bagakeka ko zaba ari inzige.

Utu dukoko twatangiye kugaragara ku mugoroba wo kuwa Mbere tariki ya 10 Gahyantare, mu tugari dutatu aritwo Nyamiyonga, Nyagatabire na Kibirizi.

Mu itangazo ryashyizweho umukono n’Umunyamabanga uhoraho muri Minisiteri y’ubuhinzi n’ubworozi, Musabyimana Jean Claude, rivuga ko mu gihe icyonnyi cy’inzige cyagaragaye muri bimwe mu bihugu byo mu karere u Rwanda ruherereyemo, bakangurira Abaturarwanda kuba maso no gutanga amakuru ajyanye n’ibyonnyi badasanzwe bamenyereye.

Rigira riti “Minisiteri iramenyesha Abaturarwanda ko iki cyonnyi cy’inzige kitaragera mu Rwanda, kandi ko ubugenzuzi bwa Minagri n’izindi nzego bukomeje, icyonnyi cy’inzige cyagaragaye muri bimwe mu bihugu by’Afurika y’Iburasirazuba mu mpera z’umwaka ushize wa 2019.”

Iyi minisiteri ivuga ko mu rwego rwo kwitegura guhangana n’iki cyonnyi, ku bufatanye n’Ishami ry’Umuryango w’Abibumbye ryita ku buhinzi n’ibiribwa ku Isi (FAO), ikomeje gukurikiranira hafi amakuru y’icyerekezo cy’izi nzige mu karere u Rwanda ruherereyemo.

Uko inzige ziteye

Inzige ziri mu muryango munini w’udukoko tuzwi ku izina ry’ibihore bifite uduhembe tugufi, zikaba zifite amaguru manini y’inyuma azifasha gusimbuka.

Aho zitandukaniye n’ibindi bihore ni uko zifite ubushobozi bwo gukora urugendo rurerure rugera kuri kilometero 150 zidahagaze ziri mu itsinda rinini rishobora kubonekamo izigera kuri miliyoni 150.

Minagri ivuga ko yo n’abafatanyabikorwa mu iterambere ry’ubuhinzi n’ubworozi, inzego z’ibanze, izishinzwe ibikorwa by’ubutabazi, inzego z‘umutekano, biteguye mu buryo bw’ibikoresho n’abakozi gutanga ubutabazi bwihuse mu gihe iki cyonnyi cyaba kigaragaye mu Rwanda.

Magingo aya, ubugenzuzi bukorwa n’izi nzego ngo buragaragaza ko nta kindi cyonnyi kidasanzwe cyateza abahinzi igihombo.

Abahinzi bagirwa inama yo gukomeza gusura imirima yabo buri munsi kandi bagatanga amakuru ku gihe, igihe cyose babonye udukoko cyangwa ibimenyetso bidasanzwe mu mirima yabo, kugira ngo bahabwe ubutabazi bwihuse bibaye ngombwa kandi bakirinda ibihuha.

Ivuga kandi ko bahamagara kuri telefoni ya Minagri 4127, cyangwa bakamenyesha abajyanama b’ubuhinzi n’abagoronome babegereye.

Kuva tariki ya 9 Gashyantare inzige zageze mu gihugu cya Uganda ziturutse mu majyaruguru ya Kenya, zinjiriye mu Karere ka Amudat mu Ntara ya Karamoja.

Abahanga bavuga ko izi nzige zishobora no kugera mu bindi bihugu bitandukanye birimo n’u Rwanda bakurikije uburyo zimeze. Icyakora amahirwe ari mu Rwanda nuko hakonja kandi zikaba zizirana n’ubukonje, no kuba ari igihugu cy’imisozi miremire kandi zo zikunda imirambi.

Aho inzige zigeze zangiza imyaka zikayona, ku buryo zihatinze zishobora kuhasiga inzara itewe n’ibura ry’ibiribwa.

Minagri yatangaje ko nta nzige ziragera mu Rwanda
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Isaac 2020-02-13 13:56:45

Ndabikundira ukuntu muzi guturisha abanyarwanda. Imana ibakomeze

2
Mbaraga 2020-02-13 07:19:01

Ariko se ibyo kumenya ko ari inzige cyangwa ko atari zo biratwungura iki ko n’utwo tundi tutitwa zo turi kwangiza bikabije? Ahubwo nibafate ingamba zikaze barebe ko baduhashya.

Kwamamaza